Биыл спорт күні­не орай ау­дан­­­да бір­не­­ше ау­дан­дық жарыс ұйым­дас­­ты­ры­лып, үздіктер анық­тал­­ды. Апта басы­нан басталған спорттық ойын­дар апта бойы­­на үздік­сіз жалғас тапты. Спорт күніне орайластырылған іс-шаралар легі спорт саласының қыз-келін­шектері арасындағы қол күре­сінен бастау алды. Сайысқа аталған салада аудан намысын қорғап жүрген қыз-келіншектер атсалысты. Білекте де, жүректе де күші тасыған арулар саламатты өмір салтын сақтаудың маңыздылығын көрсетіп, жарыс жолында бақ таласты. Нәтиже бойынша Айнара Жеткергенова І орынды, Алия Ғазизова ІІ орынды, Гүлмира Тәштаева ІІІ орынды жеңіп алды.

Келесі күні атаулы сайыс футбол­дан аудан ашық біріншілігімен жал­­­ға­сын тапты. №11 Сырдария ауданы­ның олимпиадалық резерв­тің мамандандырылған балалар жас­өспірімдер мектебінің ұйымдас­тыруымен өткен шағын футболға 2012-2013 жылы туған жасөспірімдер қатысты. Өз мәресіне жеткен тартысты додада ала доп шеберлері үздік атанып, марапатталды. І орынды «Мансұр-Шаған» командасы жеңіп алды. Жүлделі ІІ орын №137 мектеп командасына, ІІІ орын аудандық спорт клубы спортшыларына бұйырды. Сондай-ақ Сәбит Сағадат «Үздік ойыншы», Биасыл Өмірбай «Үздік қақпашы», Азамат Маратбеков «Үздік шабуылшы», Асылжан Сәбит «Үздік ойыншы» номинацияларымен марапатталды. Жарыс жеңім­паздары демеушілер ұсынған дип­лом және естелік сыйлықтармен марапатталды.

Бір аптаға жалғасқан спорт бәсеке­лері ұлттық спорт – садақ атумен жалғасты. Ұлттық дәстүрді ұлықтап, спорт­ты насихаттауды мақсат еткен жарысты спорт клубы ұйымдастырды. Тартысты өткен сайыс қорытындысы бойынша І орынды Шерхан Кеңес, ІІ орынды Сейілхан Кеукенов, ІІІ орынды Асхат Төлеуов жеңіп алды. Сондай-ақ шахмат­тан жасөспірімдер мен ардагерлер арасында тартысты ойын болды. Жеңімпаздар арнайы алғыс хатпен марапатталды. Спорт күніне арналған іс-шаралар легі ересектер арасында Қалғандария көлінде жүзу, гір көтеру, арқан тарту спорт түрлерінен аудандық жарыспен қорытындыланды. 50 метрге жүзуден І орынды Мейірхан Ишанбек, ІІ орынды Мардан Оспанов, ІІІ орынды Ерсұлтан Қошқаров жеңіп алып, ақшалай сыйлықпен марапаттал­ды. Ал гір көтеруден Айдар Ерасыл, Нұрасыл Нұрбай, Бақытбек Төлегенов үздіктер қатарынан көрінді. Арқан тарту сайысынан аудандық ішкі істер бөлімі жүлделі І орынды, қоғалыкөлдік спортшылар ІІ орынды, аудандық спорт клубы ІІІ орын­ды жеңіп алды.

Айта кетейік, бүгінде аудан бойынша оқушылар мен тұрғындарды қоса есептегенде 14 793 спортшы бар. Бұл – халықтың 39 пайызы дегенді білдіреді.

– Жылдан жылға спортпен шұғыл­данушылар қатары артып келеді. Был­тыр­ғы көрсеткішпен салыстырғанда спортқа ден қоюшылар саны 100 шақты адамға артқан. Тұрғындар спортпен шұғылдануы үшін ең бірінші кезекте спорт нысандары да халыққа қолжетімді деңгейде болуы тиісті. Мәселен, қазіргі таңда ауданымызда 2 стадион, 5 спорт кешен, 28 спорт зал, 21 жапсарлас спорт зал, 74 жазықтық құрылғы жұмыс жасауда. Жалпы 130 дене шынықтыру және спорт нысаны халыққа, оның ішінде спортпен айналысамын деген жасөспірімдерге қалтқысыз қызмет көрсетіп келеді. Аталған спорт нысандары тегін негізде қызмет көрсетеді. Мемлекеттік спорттық тапсырыс аясында «Мансұр» спорт клубында балалар мен жасөспірімдерге арналған ақысыз түрде спорт секциялары жұмыс жасап келеді. Онда 5-15 жас аралығында балалар жаттығуда және былтырдан бастап каратэ, таеквондо, үстел теннисі спорт түрлерінен секциялар ашылды. Жастар жанына спортты серік ету арқылы дені сау ұрпақ қалыптастырып қана қоймай, тәрбиелі әрі саналы жастардың қатарын арттыруға мүмкіндік мол, – дейді аудандық дене тәрбиесі, спорт және туризм бөлімінің бас маманы Әйгерім Мешітбаева.

Биыл 18 тамыз – спорт күні ретінде тойланады. Қасым-Жомарт Тоқаев Қазақстан халқына жыл сайынғы Жолдауында бұқаралық спортқа, дене шынық­тыруға және балаларды қолдауға басым­дық беру керектігін айтып келеді. Әр облыста, ірі облыс орталықтарында спорт секцияларын ашуды тапсырды. Мемлекет басшысының тапсырмасы бойынша дене шынықтыру мен бұқаралық спортты дамытудың 2020-2025 жылдарға арналған кешенді жос­пары қабылданды. Бұл мереке өмірін спортпен байланыстырған спортшылар, жаттықтырушылар, балалар мен жасөспірімдер үшін ерекше. Осы орайда сала мамандары мен спортшыларды кәсіби мерекемен шын жүректен құттықтаймыз!