Маусымашар бастау алды
Бірнеше жылдық тарихы бар аудандық «Жайдарман» мектеп лигасы жаңа маусымның шымылдығын түрді. Биыл аудан бойынша тіркелген 10 топ өзара бақ сынайды. Өткен аптада мәдениет үйінде маусымашар өткізіліп, Тереңөзек кенті мен елдімекендерден келген топтар өнер көрсетті. Өз кезегінде маусымашарға облыстық Қазақстан КВН Одағы Қызылорда облыстық филиалының директоры Руслан Тәкісбай, талантты жайдарманшы Нұрлан Совет, аудандық жастар ресурстық орталығының директоры Айгүл Ахметова, кент мәдениет үйінің маманы Ербол Бекжүнісов шақырылды.Өткір әзіл мен қағытпа қалжыңға негізделген ойын барысында ерекше көзге түскен топтар көрермен көзайымына айналды. Өткен жылы аудандық мектеп лигасының чемпионы атанып, Астана қаласындағы фестивальде өнер көрсеткен №210 Оспан Әбілпаттаев атындағы орта мектеп оқушылары маусыммен қоштасты. Алдағы ойындарында олардың замандастары білім ошағының мерейін тасытатын болады.
– Жыл сайын Сырдария ауданы жастарының өнерін тамашалап келеміз. Әрбір топтың деңгейін білеміз. Осалдық танытқан топтарға бағыт-бағдар көрсетіміз. Болашақта республика көлемінде облыс намысын қорғайтын жас таланттар шығарына сенімдіміз. Әрине өнерпаздарға тынбай еңбек ету керек. Сахна адамды шыңдайды. Еркіндікке үйретеді. Бүгінгі ойын үшін ұйымдастырушыларға алғыс айтамын, – дейді «Қазақстан КВН Одағы» Қызылорда облыстық филиалының директоры Руслан Тәкісбай.
Балтабай АЯБЕКҰЛЫ
