Адал еңбегімен абыройға бөленген

Өмір – қамшының сабындай қысқа, көзді ашып-жұм­ғанша өте шығатын қас-қағым сәт. Бабаларымыздан қалған бұл есті сөзді елге адал қызмет етіп, өзіндік орнын қалыптастырған азаматтар қапияда өмірден өткенде терең түсінеміз. Ұзақ жылдар Сырдария ауданының дамуына белсене атсалысқан Мырхиев Бағдат Мырхыұлы да сондай азаматтардың санатынан еді.

Ауданымызды тумасы, ұзақ жылдар ауылшаруашылығы саласында ең­­бек еткен Бағдат Мырхыұлы көзі ті­рі болғанда биыл жетпіс жасқа толар еді. 16 жыл бұрын өмірден өткен азамат аудандық фитосанитария меке­месінде, аумақтық басқармада еңбек еткен. Кейін ауданның коммуналдық шаруашылығында жұмыс істеп, өзекті мәселелердің шешілуінде өз қол­таңбасын қалдырған. Көзкөр­гендердің айтуынша, Бағдат Мырхыұлы бас­шылық тарапынан өзіне жүктелген міндетті асқан жауапкершілкпен ат­қарып, ұжымның жақсы басшысы, қо­ғамның қадірлі азаматы ретінде көп­шілік құрметіне бөленген. Бұл оның өмірлік мол тәжірибесінің, адал еңбегі мен маңдай терінің жемісі екені анық.

Мақала жазу барысында ауданның Құрметті азаматы Жантемір Айсиннің пікірін білдік. Сырдария ауданының даму белестерінен толыққанды хабардар ардақты азамат байырғы за­мандас-досы Бағдат Мырхыұлының аза­маттық болмыс-бітімі, қарым-қабі­леті туралы әңгімеледі.

– Бәкең сөзге де, іске де мығыз азамат еді. Қай ортада да сыйлы болатын. Үлкенге де, кішіге сөзі өтімді азамат ауданымыздағы бірқатар мекемеде еңбек етті. Ол кездер қиын әрі барлық салада күрделі мәселелер көптеп кездесетін уақыт еді. Сол мәселелерді шешуге іскер азаматтардың қа­рым-қабілеті ауадай қажет екені бел­гілі. Біздің жадымызда Бағдат Мыр­хыұлының бейнесі майталман маман ретінде сақталып қалды. Ол қай істі бастаса да, қандай жұмысты қолға алса да сол іс толық аяқталғанша тыным таппайтын. Сондай-ақ айналасын қуанышқа бөлеп, бәрімен тең араласатын азамат еді. Сыйлас, сырлас, сапарлас болдық. Абыройға адал еңбегімен қол жеткізген азаматтың өмірде ертерек өткені өкінішті. Көзі тірі болса жетпіске толып, бейнетінің зейнетін көрер еді. Марқұмның жатқан жері жайлы болсын теп тілейміз, – дейді Жантемір Айсин.

Кейіпкеріміз экология басқар­ма­сының Сырдария аудандық бөлімінің бас­­­шысы ретінде де еңбек еткен. Бұл басқармаға ауданның эко­логиялық, санитарлық жағдайын жақ­­­сарту міндеті жүк­телетіні белгілі. Бұл міндеттер қор­шаған ортаны көр­кейтумен, таби­ғатты аялаумен тығыз бай­ланысты. Осы ретте Б.Мыр­хы­­ұлы­ның бастамасымен дария­­ны жа­ға­лай қоныстанған ауданның эко­­ло­гия­лық ахуалын жақсарту мақ­са­тында ке­шенді жұмыстар жүр­гізілгенін айтып өтуіміз қажет. Ел-жұрт сол жыл­­дары Б.Мырхыұлы бастаған азаматтар мен бөлім түрлі үндеулер жасап, халықтың санасына ой салу жұ­мыс­тарын көптеп ұйымдастырғанын жақ­сы біледі. Тіпті қоршаған ортаны қор­ғау саласындағы заңнаманы одан әрі жетіл­діруге де ауданымыздан тиісті ұсыныстар енгізілген. Сол ұсы­ныстар аясында заңға да бірқатар тү­зетулер енгізіліпті.

Шаруашылықта, өндірісте жұмыс істеп мол тәжірибе жинаған азамат еңбек жолында Іңкәрдария ауылында парторг болып еңбек етті. Партиялық жұмыстарды ұйымдастырушы болу – екінің бірінің қолынан келмейтін. Бұл жұмысқа істің ретін білетін, қоғаммен тез тіл табыса алатын, жігерлі де білікті азаматтар бекітілетін. Бағдат Мырхыұлы бұл талаптардың да үде­сінен шығып, ауылдың қоғамдық-саяси жұмыстарының басы-қасынан та­­былды. Өзі өмір сүрген қоғамның да­му­ына белсене атсалысты. Аудан басшыларының сенімді серігі, тап­сырмаларының мүлтіксіз орындаушысы болып, аудан орталығынан шалғай орналасқан Іңкәрдария елді мекенінің еңсесін тіктеу үшін тер төкті. Ол еңбегі еш кеткен жоқ. Түрлі марапаттарға ие болды. Б.Мырхыұлы үшін марапаттың ең жоғарғысы, ол – ел-халықтың ыс­тық ықыласы еді. Ықылас-пейілден кенде болмаған азамат қызметте абыройлы болса, отбасында да аяулы жар, ардақты әке, жақсы ата бола білді. Бұл туралы бізге Б.Мырхыұлының өмірлік се­рігі Ғалия Нұрадинқызы әңгімелеп, өз естелігімен бөлісті.

– «Отан отбасынан басталады» дей­­тін болсақ, біздің отбасымыздың тірегі де, қамқоршысы да – Бәкең еді. Ол кісі ағайын-туысқа да қадірлі болды. Қай кезде де қайырлы істерді ат­қарып, өмірде дүние жинағаннан гөрі, дос жинағанды тәуір көретін. Біз үш ұл, екі қыз тәрбиелеп, немере сүй­дік. Бір өкініштісі, азаматым небәрі 54 жасында өмірден өтті. Бүгінде ұр­­пақтары өсіп-жетіліп, еңбек етуде. Ұрпақтарымыз аман болсын деп ті­лей­мін, – дейді Ғалия Нұрадинқызы.

Ақын Абай Құнанбайұлы «Адамзат – бүгін адам, ертең топырақ» деп тебіренген екен. Иә расында да бүгін бармыз, ертең жоқпыз. Бірақ өмірден өтсе де көңілден кетпейтін, ізгі ісі мен азамат­тық болмыс-бітімі ұмы­тылмайтын азаматтар болады. Олар­дың есімін де, еңбегін де ел-жұрт ұм­ыт­­­пайды.

Ақтөре ИБРАГИМҰЛЫ