Ауданымыз үшін аса маңызды

Аудан әкімдерінің сайлауы Сырдария мен Шиеліде өтетінін естіп, біліп, саяси науқанның маңыздылығын түсініп отырмыз. Бұл таңдау бекерден бекер жасалмағаны анық. Сырдария – бекем бірлік пен көркем тірліктің ордасы.

Сырдария ауданының соңғы елу жылдағы әлеу­меттік-экономикалық, қоғам­дық-саяси және рухани-мәдени да­муынан толық хабардармыз. Ауда­нымыз та­лай белесті бағындырып, маңызды науқандарды абы­роймен өткізді. Бұл аудан халқының бірлігінің, ын­тымағының белгісі екені анық.

Аудан әкімдерінің сайлауын өткізу туралы облыстық мәслихат шеші­мінің Сырдарияға түсуі жай­дан-жай емес. Меніңше, сырдариялықтар саяси маңызды науқанға белсене қатысып, өз таңдауын жасайды. Өйткені бұған дейін өткен Президент сайлауында және Парламент пен жергілікті мәс­­­­­лихат депутаттарының сайлауында ауданның қатысу көрсеткіші жоғары болды. Оның үстіне бұл ауданымыз үшін аса маңызды сайлау болмақ.

Бұрын ауыл әкімдерін аудандық мәслихат депутаттары сайлайтын. Ал аудан әкімдері ҚР Президент Әкім­шілігінің, аудандық мәслихаттың келісі­мімен және облыс әкімінің өкімімен тағайындалатын. Бұл туралы Президент өз ұсынысын айтып, әкім­дерді халық сайлау қажеттігін айтты. Бұл – демократиялық дамуы­мыздың белгісі.

Мемлекет басшысының тапсырмасы бүгінде нақты жүзеге асуда. Әкімді халық сайласа, билік пен бұқараның арасы жақындай түседі. Сайланған әкім де жауапкершілікті сезінеді. Мұның бәрі «Халық үніне құлақ асатын Үкімет» қағидасында айқындалған жос­парлармен ұштасады. Сондықтан дәл қазіргі уақытта әкімдерді халықтың сайлауы өте дұрыс қадам. Бұған халықтың саяси сауаты да, белсенділігі де жетеді деп ойлаймын. Саяси науқанның ауданымызда жоғары деңгейде өтетініне сенемін.

Алма Бақтиярова,
Сырдария ауданының
Құрметті азаматы

Фото: ашық дереккөзден