Өресі биік өнерлі өрендер
![](/uploads/posts/2023-09/medium/1695712066_05f9f1f9-c0d9-4b74-818e-64f331ddf3be.jpg)
Ауылдық клуб үйі ұйымдастырған мерекелік іс шараларда әуелете ән шырқап, көрермен көзайымына айналған кішкентай бүлдіршіндердің өнеріне тәнті болдық. Бұл – «Жадыра» шығармашылық орталығының «Балалар хоры» үйірмесінің өнерпаздары. Топ құрамында қыз балалармен қатар ер балалар да өнер көрсетеді. Түрлі дауыста ән шырқағанда бір-бірін толықтырып, үлкен әншілерден кем түспейтін кішкентай өнерпаздарды клуб үйінің мәдени ұйымдастырушысы Райхан Шүкірәлиева ұйымдастырып, өнерге баулып келеді. Өз кезегінде талабы мен таланты таудай әнші бүлдіршіндерді дайындап, түрлі байқауларға қатыстырып жүрген жетекші кішкентайлардың ертеңінен көп үміт күтетінін айтады.
Топ құрамында сегіз қыз бала бар. Сондай-ақ алты ер бала өнер көрсетеді. Олар Айсана Жорабек, Ханшайым Алмасбекқызы, Күннұры Айдарбек, Аружан Бақтияр, Ақбота Мұрат, Інжу Алпысбай, Айсара Қияс, Айзере Сағынай және Раян Махмұт, Әбунасыр Ермекбай, Нұрлыхан Хасымхан, Ернұр Жамаладдин, Жанмәди Айқожа, Мирас Шәкірбек. Қазіргі таңда ауылдық округтегі №44 орта мектептің бесінші сыныбына аяқ басқан оқушылар мектеп өмірімен қатар клуб үйі жанындағы үйірменің белсенді мүшелері. Қай-қайсысы болсын мектепішілік және ауылда өткен іс-шараларға белсене қатысып, оқуға да, қоғамдық іс-шараларға да үлгеріп жүреді. Әнші бүлдіршіндер сабақты үздік оқиды. Ән өнеріне ден қойып, мәдениетімізді сұлу сазбен бойларына дарытып жүрген талапты бүлдіршіндер түрлі сайыстарға да жекелей қатысып, жүлделі орындарға ие болып жүр. Атап айтар болсақ, топтың беделді мүшесі Айсана облыстық ХХҮ «Бозторғай» балалар шығармашылық байқауына қатысып, ІІІ орынды жеңіп алды. Ал Ханшайым «Кең дүние төсіңді аш, мен келемін» атты республикалық балалар мен жасөспірімдер арасындағы өнер байқауына және «Мұрагер» орталығының ұйымдастыруымен жасөспірімдер арасында өткен «Жарқыра жұлдыз» атты республикалық байқауға қатысып, бас жүлдемен марапатталған. Сонымен қатар облыстық «Ақкөгершін» балалар байқауына қатысып, «Алғыс хат» иеленген. Күннұры аудандық мәдениет үйінде өткізілген «Бозторғай» балалар шығармашылығына арналған ән байқауына қатысып, «Алғыс хатпен» марапатталған.
– Хор үйірмесі ішінен іріктеліп шығып «Балауса» балалар тобы аталып, клуб жанынан ұйымдастырылған бүлдіршіндер тобы көпшілік іс-шараларға қатысып, көрермен көзайымына айналып жүр. Жоғарыда айтып өткен марапаттар балғындардың кішкентай ғана жетістігі. Әрі үлкен белестердің бастамасы деп білеміз. Талабы таудай әнші қыздарымыз болашақта Бибігүл Төлегенова, Майра Ілиясова секілді әнші-апаларының жолын жалғап, қазақ өнерін әлемге таныта берсін деп тілектестік білдіреміз, – дейді кішкентай әншілердің ұстазы Р.Шүкірәлиева.
Баланы жастайынан өнерге баулу орынды. Бұл – бір жағынан тәрбие көзі болса, екіншіден балалардың сабақтан тыс бос уақытын тиімді пайдалануына мүмкіндік болып табылады. Сондай-ақ баланың ынтасы мен қызығушылығына орай, талантын әркез жетілдіріп, дамытып, білмегенін үйретіп, бағыт-бағдар беру маңызды. Сонымен қатар, болашақта үлкен өнер иесі, дарынды азамат болуына жасалған алғашқы қадам деуге негіз бар. Қазіргі таңда балалар мен жасөспірімдер тәрбиесі қоғамда аса маңызды. Осы ретте, балғындарды ұлттық өнерге баулып, қызығушылығын шыңдап жүрген шығармашылық орталық жұмысына сәттілік тілегіміз келеді. Ал өнер айдынына бет алған кішкентайлардың ертеңі мол үміт күттіреді.
А.МҰХАНБЕТҚАЛИ