Тіршілік тынысы Tirshilik-tynysy.kz ақпараттық агенттігі
» » Қолдан келсе, кәсіп қыл

Қолдан келсе, кәсіп қыл

Ел экономикасын жан-жақты дамытудың ұтымды жолдарының бірі – кәсіпкерлік саласын жандандыру. Қазіргі таңда жаңа кәсіп түрін қолға алып, ерінбей еңбек етіп, көптің қажетін өтеп жүрген кәсіпкерлер саны артып келеді. Бұл бір жағынан жеке тұлғаның өз бетінше еңбекке араласып, тәуелсіз және сүйікті ісімен айналысуына мүмкіндік болса, екіншіден тұрғындарға қолайлы жағдай жасап,­ қажеттіліктерін өтеудің бірден-бір жолы. Мысалы, аудан бойынша­ бірша­ма кәсіпкер өз несібесін еңбек­тен тауып отыр. Бұл халықтың қажет-жара­ғын қаладан іздемей-ақ, жұмы­сын жеңілдетуіне жағдай жасап келеді.

Өз еңбегімен берекелі кәсіп түрін айналдырып отырған бүгінгі кейіпкеріміз – Ерасыл. Ол – Айдарлы ауылының тумасы. «Ер – туған жерге» демекші, үлкен қалада білім алып, тәжірибесін толықтырған азамат туған ауылы Айдарлыға қайта ат басын тіреген. Осында тұрғындар игілігі үшін еңбек етіп, өз ауылын көркейтуге күш салуды мақсат еткен Ерасыл 1995 жылдың тумасы. Кішкентайынан әкесінің қасында құрылыс, мал ша­руашылығы секілді ер азаматқа тән жұмыстарды еркін меңгерген ол жастайынан үйренген ісін жандандырып кәсіпке айналдырып отыр. Яғни бүгінде цементтен түрлі қалып құйып, төсеніш тас пен жол бойын бөліп тұратын бордюр жасау ісімен шұғылданып жүр. Жаңаша кәсіп түрін шағын ауылда жандандыру үлкен жетістік деуге болады. Ауыл азаматтары бұндай құрылыс заттарын шығарса, тұрғындар үшін бағасы да қолжетімді болмақ.

Ерасыл Жұмахметовтің негізгі мамандығы – заңгер. Мектеп қабырғасын тәмамдағаннан кейін Шымкент қа­ласындағы іргелі білім ордасында білім алып, аталған саланың кәсіби маманы болып шыққан. Кейіпкеріміз заң саласын қанық білу өмірдің кез келген тұсында пайдалы екенін айтады. Оқуы мен тоқуы келіскен ол адал еңбек еткен адамның бәсі биік әрі қоғамға қажет екенін айтады.

Ерасыл бастапқыда әкесі Есенкелдінің шаруашылығына қолғабыс етіп, еңбекке араласқан. Таң ертемен басталатын күйбең тіршілікте өзіне керек тәжірибені жинақтай жүріп, жақында цементтен түрлі плита, бордюр құюды кәсіпке айналдырған. Кәсібін жақында ғана бастағанымен, бет алысы жаман емес. Бүгінде Ерасылға сапалы өнім үшін тапсырыс берушілердің қарасы қалың. Ал кейіпкеріміз адал еңбекпен ризық табу өмірлік ұстанымы екенін айтады.

– Кәсіпкерлік саласы жан-жақты дамып келеді. Мемлекет тарапынан да кәсіпкерлерге тиімді жағдай жасалып, түрлі бағдарламалар іске асырылып жатыр. Ел Президенті биылғы Жолдауында да кәсіпкерлерді қолдау, кәсіпкерлік саласын жандандыру туралы сөз қозғады. Бұл аталған саланың жан жақты даму деңгейін көрсетіп отыр. Біз әзірге жұмысты өз қаражатымыз есебінен жүргізіп келеміз. Қажетті аппараттарды Шымкент қаласынан алдырдық. Жұмыс қарқын алып келеді. Алда жоспар көп. Сәтін салса, мемлекеттік грантқа сынға түсіп, кәсібімізді жандандырсақ деген ниеттеміз, – дейді жас кәсіпкер.

Бүгінгі таңда өзімен бірге екі ауыл тұрғынын жұмыспен қамтып отырған жас кәсіпкердің алдағы жоспарларына сәттілік тілегіміз келеді.

А.МҰХАНБЕТҚАЛИ
19 қыркүйек 2023 ж. 144 0