Сейфолла ақынның сыйлығы

Кіндік қаны тамған қасиетті туған жеріне деген құрметі әркез шексіз, жерлестерімен хат-хабар алмасып, байланысып тұратын ақын Сейфолла Оспанның есімі әдеби қауымға етене таныс. Биыл 85 жасқа толып жатқан ақынның өмірі мен шығармашылығы ауданымызда кеңінен насихатталуда. Жақында ақын, С.Сейфуллин ауылындағы №137 орта мектептің директоры, аудандық газеттің тұрақты оқырманы әрі жанашыры Бағдат Есназардың «Сейфолла ақынның сыйлығы» тақырыбындағы жазбасын әлеуметтік желіден оқып қалдық. Шығармашылық топ ақылдаса келе ақынның мерейтойы қарсаңында тағылым аларлық тәлімді жазбаны басылым бетіне жариялауды жөн көрдік.

Жақында қазір Байқоңыр қаласында тұратын әрі шәкіртім, әрі туыс інім Дарханбек Әбдірахманов хабарласты. Амандық-саулық сұрасқаннан кейін «Аға, сізге Алатаудың бөктеріндегі ару Алматыдан Сейфолла Оспан көкеміздің беріп жіберген аманаты, құнды дүниелері бар еді» деді. Өзім ауылда болмаған соң «Үйге тастап кете бер» дедім де рақметімді айттым. Дарханбектің айтуынша, ақын ағамыз заттарды алған соң маған міндетті түрде хабарлассын деп нықтап тапсырыпты.

Бірер күннен кейін үйге келіп, ақын ағамыздың ізетті інімнен беріп жіберген заттарын қарасам, оралған үш бөлек дүние екен. Ашсақ, үш бөлек кілемше. Кәдімгі қазақы дүние. Оралған кілемшелерге зер салсақ, мұқым қазақтың мақтанына айналған үш тұғырлы тұлғаның тоқылған суреттері бейнеленіпті. Олар – данышпан Абай, ержүрек Махамбет және ақын Жұмекен. Тәуелсіздігіміздің тұғырын биіктетіп тұрған – үш ақын, үш данышпан!

Содан бойымды әлдебір қуаныш билеп, өзім әлі күнге өлеңдерін қайталап оқудан жалықпайтын үш сұңғыла ақынның суреттері тоқылған кілемшелерді қатарластырып жайып қойып, суреттеріне қарай-қарай көкеме хабарластым.

Телефонды алғашында Күләй апа алып, ауылдың, ағайын-туыстың амандығын білгеннен кейін, тұтқаны көкеме берді. Ақын ағамыздың көру қабілетінің нашарлап қалғанын да білемін.

– Ассалаумағалейкум! Мен ауылдан Бағдатпын ғой, денсау­лығыныңыз қалай?

– Бағдатжан, амансың ба! Ағаң жақсы, Аллаға шүкір...

– Дарханбектен беріп жіберген дүние­леріңізді алдым, көке.

Тамағын бір қырнап алып ақсақал әңгі­месін әріден бастады.

– Бағдат, қазақтың үш классигінің кілем­шеге тоқылған суреттері менің үйімде бұрыннан бар еді. Биыл 85 жасқа толамын ғой. Бұл – мерейлі жас. Ел ағалары алқалап жатса, мерейтойды ел ішінде атап өткен де мәртебелі емес пе! Сол кезеңде мен беріп жіберген кілемшелер өзім оқыған қарашаңырақ мек­тебімнің бір бөлмесінде тұрса деген ойым бар еді. Осыдан бірер жыл бұрын Сәкен Сейфуллин ауылының мекте­біне үйдегі кітап қорымдағы біршама бағалы кітаптарды беріп жібергенімді білесің ғой. Білім ошағына тарту ететін жақсы кітаптарым әлі де бар. Осыларды өзіңе ауызба-ауыз айтайын деп едім, балам. Аман бол. Елге сәлем айт, – деді.

Иә, биыл ақын, Қазақстан Жазушылар одағының мүшесі, жерлестер мақтанышына айналған Сейфолла Міркемелұлы Оспанның 85 жылдық мерейтойы. Әдеби және діни мол білімі арқылы жан-жағына білім шыра­ғын жаққан, заманының тақуасы атан­ған Міркемел кәлпенің ұлы, Сыр елінің, оның ішінде Сырдария ауданының һәм біздің С.Сейфуллин ауылының атағын аспандатып тұрған талантты тұлға ғой бұл кісі.

Ұлы жазушылар – Мұхтар Әуезов, Сәбит Мұқановтың көзін көрген, Мұхамеджан Қаратаев, Қанапия Дәрібаев, Қалтай Мұха­мед­жановтармен дәмдес болған, қазақ әде­биетіне олжа салған шәкірттер тәрбие­леген, ұлттық өнердің сан бағытының дамуына елеулі үлес қосқан – ақын, сыншы, аудармашы һәм шешендігі мен көсемдігі бір бөлек Сейфолла көкеміздің дені сау болсын. Күләй апамен бірге бес баласынан өрген немере-шөберелерінің қызығын көре берсін.

Бұйырса, мерейтой лайықты аталып өтілер. Менің бұл жолғы ойым ойлы оқыр­манға, өздеріңізге Алматыдан арнайы беріп жіберген құнды дүниелер һәм өнер туындылары мен, яғни есімдері ел жадында мәңгі қашалған ұлылардың суреттері тоқылған кілемшелерді таныстыру...

Бағдат ЕСНАЗАР