Гүлзат ӘБДІКӘРІМОВА, «Қоңыр» тобының әншісі: Менің байлығым – өнерім

Аудандық газет «Шалғайда жүрген бір түлек» айдары бойынша еліміздің түкпір-түкпірінде еңбек етіп келе жатқан туған жердің перзенттерімен сұхбаттар ұсынып келеді. Бүгінгі кейіпкеріміз өнерімен көпшілікке танылған талантты жан. Музыка саласын жетік меңгерген өнер иесінің туған жеріне деген ықыласы ерекше. Оқырмандар назарына халықаралық байқаулардың жеңімпазы, «Қоңыр» тобының әншісі Гүлзат Әбдікәрімовамен жүргізілген сұхбатты ұсынамыз.

– Гүлзат Мейрамбекқызы, ту­ған жеріңіз Сыр топырағы талант­тардың өлкесі. Өнерге баулыған ата-анаңыз туралы және әркез ыс­тық көрінетін ауылыңыз жайында айтып берсеңіз?

– Мен топырағы киелі, тұғыры биік Аманкелді ауылынан түлеп ұшқанмын. Біздің ауылдан білімді, дарынды, талантты, өнерлі адамдар көптен шыққан. Қырық жылға жуық білім саласында еңбек еткен атам – Әбдікәрім Абдулаев өз заманында ақындығымен елге танылған. Халық баласын оқытып, жұртшылықтың алғысына бөленген. Химия, биология пәнінен сабақ берген Әбдікәрім атам өнерімен де ерекшеленген. Ол домбыра шертіп, атбегілікпен айналысқан. Әжем – Мұқаш Жүсіпова да педагогика саласының майталманы. Менің бойымдағы өнердің барлығы атамыздан дарыған деп есептеймін.

Әкем Мейрамбек Әбдікәрімұлы мен анам Назира Бодыбаева да өнер саласында еңбек етіп келеді. Ата-анам өнердегі алғашқы ұстаздарым десем болады. Ал өмірде – ақылшы, жанашырларым. Олар менің өнерге құштарлығым мен қабілетімді 5 жасымда байқаған. Сахнаға ата-анамның жетектеп алып шыққаны күні кешегідей есімде.

Айта кету керек, қазіргі таңда әкем Аман­келді ауылында өнер мектебін басқа­рып отыр. Өкініштісі, біздің кезімізде мұн­дай өнер ұясы болған емес. Қуанатын жағдай қазіргі жас таланттарға барлық мүм­кіндік қарастырылған. Өз басым «Қа­зан­ғап» атындағы музыкалық колледж­ге кәсіби бағдарсыз түстім. Музыкалық білім­нің қалануы балаға үлкен көмек болатыны сөзсіз. Бірге оқыған басқа ауданның түлек­терінен музыкалық шеберлікті, кә­сіби­лікті көп байқадық. Осы күні өнер мектебінен түрлі аспапта ойнайтын музыканттар шық­қанына қуанамын. Расында, өнер мек­тебінен тәлім алған оқушы музыка саласын таңдамаса да өмірлік тәжірибе жинай­ды. Ауыл топырағынан өнер­лі жастардың көптеп шыққанына марқайып отырамыз.

Біз отбасымызда 3 қыз, 2 ұлмыз. Әкеміз бен анамыз өнер жолында жүргенде танысып, отау құрған. Түр­лі салада қызмет етсек те өнермен болашағымызды байланыстырғанбыз. Мәселен, Ұлпан пен Құралай кәсіби ән айтуға машықтанған. Інім Бағдәулет медицинада оқып жатса, кенже інім Дулат 8 сыныпта білім алуда. Дулат – кәсіби домбырашы.

– Өнерлі отбасынан шыққан талантты арудың ең алғашқы арманы қандай? Өнерді қалай бағалайсыз?

– Менің байлығым – өнерім. Өнерлі адамның мандайында бақ болатыны сөзсіз. Қай кезде де өнердің жолы оңай деп айтпас едім. Алланың берген сыйын ұстап жүру, оны дамыту, шыңдау күрделі. Музыка саласының мамандарына сабырлық пен тиянақтылық керек. Сондықтан менің арманым – киелі өнердің мәртебесін көтеру.

– Өзіңіз топ жарған байқау­лардың мәртебесі мен деңгейі жоғары екенін білеміз. Сол туралы тарқатып айтсаңыз?

– Менің алғашқы қатысқан байқауым «Әнші балапан» болатын. Ол кезде 6 жастағы бүлдіршін Тереңөзекте өткізілген байқауда топ жарған еді. Содан кейін облыстық «Бозторғай» байқауында жеңізпаз атанып, халықаралық өнер бәсекесіне жолдама алдым. Сонымен бірге Сочи қаласында «Кинотаврик» байқауының лауреаты атандым. Ал Сербия мен Венгрия мемлекеттерінде өткізілген байқаулардың жеңімпазы атануым мен үшін зор мәртебе.

Осы кезеңде әрі қарай өнер жолына түсетінім айқындалды десем қате­леспеймін. Осыған дейін үлкенді-кіші­лі бай­­қауларда бақ сынап жүрміз. Шығар­машылық адамы бір орнында тоқтап қалмауы тиіс. Үнемі кәсіби тұрғыдан жұмыс жасап, өз-өзін дамытқаны дұрыс.

– Көпшілік біле бермейтін өнер жұлдызының бойынан қандай қа­си­ет­терді байқауға болады?

– Негізінен, өнер адамдарының бойында қарапайымдылық көрініс тапқаны абзал. Қарапайымдылық сөзінің астарында көп мағына жатыр. Шыдамдылық, сабырлық, тазалық басты қасиет. Ең бастысы, қарапайым болудан емес, қарабайыр болудан қорқамын. Барынша адам қарапайым болған сайын әдемілігін жоғалтпайды, жүзі жарқын болады. Бір сөзбен айтқанда қарапайым болсаң, қадірлі боласың.

– Тыңдармандарыңыз сізді «Қо­ңыр» тобының әншісі ретінде жақсы таниды. Топ мүшелері мен негізгі бағытын айтып берсеңіз?

– «Қоңыр» этно-эстрадалық тобы 2007 жылы құрылған. Келесі жылы 15 жылдық мерейтойымызды атап өту жоспарда бар. Қазіргі уақытта дайындық жұмысы жүргізіліп жатыр. Жаңа әндер жазылып, шығармашылық иелерімен ты­ғыз байланыс орнатудамыз. Топтағы Мархабат және Бауыржан ағаның тәжі­рибесі мол. Олар аспапта ойнап, музыканы түрлендіріп отырады. Топ мүшерімен жақсы тіл табысып, аз уақыттың ішінде бауыр бастым.

Шын мәнінде, «Қоңыр» этно-эстра­далық тобының ұстанатын негізгі бағыты – қазақтың ертеректе жазылған әндерін жаңартылған нұсқада халыққа ұсыну. Ұмыт бола бастаған әндерді жаң­ғыртуға да басымдық береміз. Халық­тың барлық өкілі тыңдай алатындай әндерге өндеу жұмыстары жүргізіледі. Ескі әндерді жа­рық­қа шығармас бұрын әндер көп «сүз­гіден» өтеді. Біздің шығармашылық ұс­таны­мымыз күрделі, әрі қиын. Себебі, әр­бір әніміз кәнігі мамамандардың сараптауынсыз сахнаға жіберілмейді.

– Өзіңіз білім алған мектеп, ұстаздарыңыз жайлы не айтасыз?

– Аманкелді ауылындағы №42 Қуаныш Баймағанбетов атындағы мек­теп-лицейде 9 сыныпқа дейін білім алдым. Әрине, үлкен өмірге қанат бітірген алтын ұямызды ұмытпаймыз. Өз басым, демалысқа шыққан уақытымда ауылға жиі барып тұрамын. Сол кезде міндетті түрде мектебіме соғып, ұстаздарыма сәлем беремін. Әңгіме барысында балалық шақтың естеліктерін ойға оралтып, бір серпіліп қайтамыз. Бұл ретте, ұстаздарыма айтар алғысым шексіз! Қасиетті шаңырақты ұмытпауымыз керек. Өз басым, «Қазанғап» атындағы музы­калық колледжде, Алматы қаласын­дағы «Құрманғазы» атындағы ұлттық консерваторияда оқысам да, мектеп кездегі қызық­ты күндерім барлығынан қымбат көрінеді.

– Жеке шығармашылығы­ң­ы­з­ға жіті көңіл бөлесіз бе?

– «Қоңыр» тобынан бөлек халық ән­­дерін шырқаймын. Алдағы уақытта авторлық әндер жаздыру ойда бар.

– Жерлестіріңізге айтар тілегіңіз.

– Жерлестеріме айтарым, тек амандық­та, қуанышта, жақсылықта жолығуға Алла нәсіп етсін. Аман-есен әлемді жайлаған індеттен құтылып, жақ­сы күндерде қауы­шайық деп тілеймін.