Тіршілік тынысы Tirshilik-tynysy.kz ақпараттық агенттігі
» » Жергілікті басылымды үзбей оқимын

Жергілікті басылымды үзбей оқимын

Аудан айнасы «Тіршілік тынысы» газетінің ес білгеннен бері оқырманымын. Сексен жылдан астам тарихы бар басылымның жыл өткен сайын мазмұны мен сапасы артып келеді. Газетті айқара ашып, құшағымызды кеңге жайып ондағы жазылған мақалаларды бір деммен оқып шығу дәстүрге айналған. Әдетте­гідей, алдымен бірінші бет, сонан соң соңғы беттегі мақалардың тақырыбын оқып, сонан соң барлығын оқып шығуға асығамын.

Соңғы бірнеше жылдан бері түрлі-түсті болып жарыққа шы­ғатын газет аптасына екі мәрте келеді. Таңертең пош­та жәшігіне келіп түскен газеттердің арасынан ең алдымен ауданның ба­сылымының бетін ашуға асығамын. Себебі, газетте еліміздегі негізгі жаңалықтардан бастап, танымдық, рухани, мәдени, тарихи мақалалар, жаңалықтар жарияланады. Газеттен жас та, жасамыс та, белгілі саланың маманы да өзіне қажетті дүниені тауып ала алады. Сенбілік беттер ұйымдастырылып, онда жур­налистердің шығармашылық ізденісінен туындаған қызықты деректердің жариялануы бүгінгі оқырманның сұранысын қа­нағаттандырғандай. Сонымен қатар байқағаным газет бетінде көптеген жаңа айдарлар өз уақытында шығып тұрады. Әсіресе, кәсіпкерлік саласында кәсібін бастаған жастар туралы, өнегелі өмір иелерінің еңбек жолы туралы мақалалар көптің көңілінен шығуда. Ал туған елден шалғайда жүрген түлектермен сұхбат, балалар шығармашылығына арналған арнайы бетті оқырмандар асыға күтеді десек, артық айтқандық болмас.

Қазір газеттің келесі жылдың бірінші жартыжылдығына жазылу жүріп жатыр. Осы сәтті пайдаланып, газетке де жазылып үлгердім. Негізінен, газет мамандары үйде отырып-ақ баспа­сөзге жазылуды ұйымдастырып қойған. Барлығы оңай әрі тиімді. Сіз де жазылыңыз, оқырман!


Шырынкүл МҰРАТОВА,
тыл және еңбек ардагері
12 қараша 2022 ж. 197 0