Тазалыққа тұрғындар да жауапты

«Әркімнің туған жері – Мысыр­ шаһары» деп дана хал­қымыз бекер айтпаған. Туған елге, жерге деген сүйіспенші­лік адамды ойлаған мақсатына жетелейді. Перзент болып­ дүние дидарын ашқан адам үшін ту­ған елі, кіндік қаны тамған жері әрқашан ыстық болады. Сондықтан топыра­ғына аунап, суын ішкен туған ауы­лыңның көркі әрбір тұрғынға қымбат екені сөзсіз.

Күн сайын көркейіп, гүлденіп келе жатқан туған елдің ажарына көз тоймайды. Түн мезгілінде самаладай жарқыра­ған көшенің бойында келе жатып, таза ауа­сымен тыныстағанда көңіліңе қуаныш ұялайды. Ал көше тазалығы арагідік сын көтермей жатады. Тұрғындардың көше тазалығына немқұрайлы қарауы, беймез­гіл уақыттта малдың көшеде жүруі жасыл желектің өсуіне кері әсерін тигізуде. Жыл сайын ауыл, кент орталығына отыр­ғызылатын көшеттер мен гүлзарлар бей-берекет жүрген малдың азығына айналып­ жатқаны жасырын емес. Бұл – ерте көк­темнен гүл егіп, күтімін жасаған жұ­мыс­шылардың еңбегі зая кетті деген сөз.

– Кент – ортақ үйіміз. Кент тазалығы туралы сөз қозғағанда маусымдық сенбіліктер ойға оралады. Бұрын көктем-күз айларында сенбіліктер ұйымдастырылса, қазір жиі-жиі санитарлық тазалық жұмыстары ұйымдастырылуда. Әрине, ауа райының қолайсыз жағдайында ғана тазалық жұ­мыстары аз уақытқа ғана тоқтайды. Десек те тұрғындар арасында өз ауласын, көше жақ бетті таза ұстамайтындар жеткілікті. Ағаштардан түскен жапырақтар арықтарға толды. Жаңбырдың суымен былғанып қо­қысқа айналуда. Көзге тұрпайы көрінетін көріністің болмауы үшін апта сайын арық-атыздар тазаланып, қоқыстар мезгілімен шығарылуда. Бұл үшін арнайы техника да бар, – дейді жауапты маман Р.Рахымбаева.

Соңғы жылдары кент аумағы кеңейіп жаңа көшелердің ашылғанын ел-жұрт жақсы біледі. Жаңадан тұрғын үйлер салынып, жаңа ықшам ауданның пайда болуы халықтың да тұрмысының жақсаруымен тікелей байланысты. Әл-ауқаттың, өмір сүру сапасының артуы халықтың жағда­йының біршама жақсарғандығын көр­сетсе керек. Дегенмен сол көшелерге ау­данның өсіп-өр­кендеуіне еңбегі сіңген тұлғалардың есімі беріліп, оған атсалысқан ұрпақтары көшелердің бүгінгі келбетін назардан тыс қалдырып отырғаны өкінішті. Көше тұрғындарымен қатар есімі берілген азаматтың ұрпақтары да ең алдымен көше тазалығына, оның көркейіп-көгалдануына атсалысса деген оймен көпшілік келіседі деген сенімдеміз.

– Ұлы Отан соғысының ардагері, ұла­ғатты ұстаз болған атамыз Қасымхан Ысмайловтың атына көше берілгенде шын мәнінде қуандық. Қазір жаңа көшенің бо­йында тұрғын үй құрылысы қарқынды жү­руде. Болашақта сол көшеде тұратын тұр­ғындар атамыздың есімін біліп, айтып жүретін болады. Ұрпақтары үшін мұнан артық қуаныш болмас. Ал көше та­за­лығына келер болсақ, көктем, күз айларында өз отбасымызды, ағайы-туысты жұмылдырып сенбілік ұйымдастыратын бо­ламыз. Жас шыбық­тар мен қаламшалар отырғызып, көше­нің көгалдануына бірдей атасалысамыз. Мұндай игі іс баршамызға жауапкершілік жүктейді, – дейді ардақты ұстаздың немересі Ж.Қа­сым­ханов.

Иә, ұрпақтарына аманат болған, жаңа көшелерге есімдері берілген азаматтар­дың аты мәңгі өшпес үшін осындай жақсы істің жанынан табылу – мәдениеттіліктің, кө­регенділіктің белгісі. Сондықтан көше тұрғындарымен қатар ұрпақтары да көше­нің тазалығы мен көгалдануына атсалысса кент ажары көріктене түспек.

Б.ТАҢАТАРҚЫЗЫ