Ұстаздар үміті ақталды
![](/uploads/posts/2022-08/medium/1660972345_0e5f8b89-3926-4f7a-b055-00a51691a9df.jpg)
Жақында білім грантын иеленген түлектердің тізімі шыққан болатын. Ерекше жаңалықты отбасымызбен күттік. Мен С.Асфендияров атындағы Қазақ ұлттық медицина университетіне «Фармацевтикалық өндіріс технологиясы» мамандығы бойынша оқуға түстім. Қай кезде де шын қалаған адамның арманы орындалады. Әсем қала – Алматы шаһарында білім алу бақыты бұйырды. Отбасында үш ағайындымыз. Ата-анамның тұңғышы болғандықтан өзімнен кейінгі бауырларыма үлгі болып, сабағымды жақсы оқуға барымды саламын. Анам Самал медицина саласында қызмет етеді. Ана жолын қуған мен үшін ата-ана абыройы барлығынан биік тұрады. Өзімнің бауырым Ерасыл да қалаған мамандығы бойынша грант иегері атанды. Әулетімізде қос қуаныш орын алғанына дән ризамыз.
Өзім қалаған мамандыққа түсу жолында сан түрлі қиындық кездескені жасырын емес. ҰБТ-ға дайындық барысында қобалжу, қорқу болды. Сүйікті апайым – Лена Майханова жетекшілік еткен біздің сыныптан 24 оқушы мектеп бітірді. Оның ішінде, 2 оқушы медицина саласының болашақ маманы болуға бекіндік. Білім сынағына дайындалу барысында биология пәнінен Айзат Оразбай, химия пәнінен Гүлжан Жәкенова, алгебра пәнінен Әсел Әбілдаева, тарих пәнінен Айткүл Есмағанбетова ақыл-кеңесін айтқан болатын. Сонымен бірге білікті ұстаз, биология-химия пәнінің білгірі Үміт Жағыпарқызының еңбегі зор.
Өз кезегінде 11 жылдық белесті бағындырған сыныптас достарымды барлық қуанышымен шын жүректен құттықтаймын! Әркез алдағы өмір жолдарына, сапалы білім алуына, үлкен азамат болуларына сәттілік тілеймін. Данқты батыр, ержүрек азамат Талғат Қозыбаев атындағы орта мектептің түлегі болғанымды мақтан тұтамын.
Аяулым ПЕРНЕБАЕВА,
№131 Талғат Қозыбаев атындағы орта мектептің түлегі
№131 Талғат Қозыбаев атындағы орта мектептің түлегі