Болашақ әріптестерімізге тілектеспіз

Тамыз айының ортасына таяу мемлекеттік оқу грантын жеңіп алған түлектер тізімі жарияланады. Күн-түн демей дайындалған оқушылар да, ата-ана мен ұстаздар да үміттің ақталғанын күтіп, тыным таппайды. Мектепті тәмамдаған соң алда жаңа белес күтіп, кешегі жас түлек үлкен білім ордасына оқуға түсуді армандайды. Десек те, тағдыр жолы бұрып, бұл жылы жоғарғы оқу орнына түспей қалған түлектерге айтпағымыз, бұл әрине өмірдің басы да, соңы да емес.

Ауданымызда журналистика саласын таң­даған оқушылар көп емес. Қиындығы мен қызығы қатар мамандықты өмірлік серік етпекке бел буған оқушылар жыл бойына аудандық газет редакциясымен ұдайы байланыс орнатып отырды. Осы оқушылардың журналистика маман­дығы бойынша мемлекеттік грант иегері атан­ғаны туралы сүйінші хабарға біз де шын қуа­нып, оқырман қауымға сүйіншілеуді жөн санадық.
Аудандық газет редакциясы «Балалар жылы» қарсаңында «Рауан» балалар шығармашылығы бетін ашқан болатын. Осы бетте мақалалары мен өлеңдері жария­ланып жүрген жас түлектердің шы­ғар­масын, мүмкін, оқыған боларсыз. Газетіміздің тұрақты оқырманы, Ша­ған ауылындағы №37 мектеп-лицей­дің түлегі Ханзада Ғабитұлы Алматы қала­­сын­да орналасқан еліміздегі ең ірі жо­ғарғы оқу орны әл-Фараби атындағы Қа­зақ ұлттық университетінде журналистика мамандығы бойынша білім алатын болады. Ал Іңкәрдария ауылындағы №191 мектептің түлегі Мерей Жалғасбек Қызылорда қаласындағы Қорқыт ата атын­дағы университеттің журналистика маман­дығына мемлекеттік грант жеңіп алды. Ханзада да, Мерей де – жас ақындар. Ау­дандық жыр мүшәйраларында талай топ жарып, оза шауып бәйге алып жүрген түлек­тер үлкен өмірге қадам басып отыр. Ханзада Ұлттық бірыңғай тестілеу бойынша барлығы 121 ұпай жинаса, Мерей 119 баллды қанжығалаған.

– Он бірінші сыныпқа келгенде өмір­дің ең биік шыңы ҰБТ сияқты көрі­ніп еді. Бірақ үлкен өмірдің енді бастал­ғанын түсінгендеймін. Ата-ана мен ұстаз­да­рымыздың үмітін ақтадық. Еңбегіміз жемісті болып, елдегі жетекші университетте білім аламыз. Осы ретте ұдайы қолдау біл­дірген жақындарыма, ұстаздарыма, шы­ғар­­машылығымызды шыңдауға, журна­лис­тикаға деген қызығушылықты одан әрі жандандырған аудандық газет редакциясына алғысым шексіз. Халқымның пайдасына жарар азамат болсам – арманым сол. Алда үлкен белес, мақсат айқын, – дейді Ханзада Сейілбек.

Журналистика – ауқымы кең, жан-жақты сала. Мемлекет басшысы Қасым-Жомарт Кемелұлының журналистика саласына баса мән беруі аталған саланың арқалар жүгі жеңіл еместігін дәлелдей түседі. Журналист жеке басын күйттемей, халықтың сөзін сөйлей алуы керек. Әрі қай саладан болса да, тіпті әлем жаңалықтарын қалт жібермейтін қырағы болу – міндет. Болашақ – жастардың, жас мамандардың қолында. Бүгінгі жас алдыңғы буыннан тәлім мен тәжірибе алып, ертеңгі күні ел іргесін ұстар нағыз маманға айналады. Ендеше біз де болашақ әріптестерімізді биік белесті бағындыруларымен шын жүректен құттықтай отырып, таудай талап тілейміз!

Аружан МҰХАНБЕТҚАЛИ