Кенттегі көрікті кескін

Қай өңірде болмасын аудан орта­лығы саналатын қала, кент көркейіп, гүлденуі тиіс. Тіпті, абаттандыру жұ­мыстары бойынша елді мекендерге үлгі болуы қажет. Бұл ретте,­ Сырдария ауданының орталығы – Тереңөзек кенті жыл өткен сайын­ көркейіп келеді. Мұнда абаттан­дыру жұмыстары қарқын алып, кент­тің аумағы да үлкейген. Әсіресе, Терең­өзек кентіне кіреберісті абаттандыру ісінде жаңалық көп.

Өткен жылдан бері аудан орталығына кіреберісті абат­тандыруға үлкен мән берілді. Алдымен тазалық жұмыс­тары жүргізіліп, көгалдандыру, санитарлық тазалық ісі­не ұжымдар жұмыл­дырылды. Содан соң кіреберістегі көп­қабатты тұрғын үйлердің маңы тұрғындарға қолайлы жағдайда абаттандырылып, ойын алаңдары салынды. Одан бөлек, облыстық маңызы бар «Қызылорда – Жала­ғаш» автожолының кент үстімен өтетін тұсы, яғни кентке кіреберістегі аудан паспорты заманауи үлгіде жаңарып, іргелі ауданның ажарын айшықтады. Сонымен қатар осы маңға қосымша бағандар орналастырылып, біреуінде Мем­лекеттік Рәміз – көк байрағымыз бейнеленсе, қарама-қарсы беттегі қос бағанның бірінде қазақ хандығы насихатталған. Ал екіншісінде ауыл өмірі көрініс тапқан.

– Тереңөзек кентін көркейту – біздің басты міндетіміз. Осыған байланысты аудан орталығын абаттандыру жұмыс­тарын үнемі назарда ұстап, кентке кіреберістен бастап жүйелі жұмыстар жүргізілуде. Мәселен, аудан басшысының бастамасымен аудан ажарын келтіретін аудан паспортын жаңарттық. Сондай-ақ қосымша бағандар орнатылып, онда еліміздегі басты құндылықтар бейнеленді. Бұл жұмыстарды аудандағы Әділбек Бәйменов бастаған Оқушылар үйінің шығармашылық ұжымы іске асырды, – дейді Тереңөзек кен­тінің әкімі Ержан Бахтияров.

Кентке кіреберістегі қос бағанға суреттер майлы бояумен салынған. Мұны бізге аудандық Оқушылар үйінің директоры Әділбек Бәйменов айтты.

– Қазір Тереңөзек кенті көркейді. Орталық алаң дема­лыс орнына айналып, гүлденді. Сондай-ақ көшелер де жақ­сарып, тазалығы жүйеге түсті. Міне, осындай жұмыстар ат­қарылып жатқан соң туған жердің көркеюіне үлес қосу ниетіміз болды. Соған орай кіреберістегі бағандарға сурет­ салуды өз міндетімізге алдық. «Қазақ хандығы – ұлт тарихы», «Ауылым – алтын бесігім» деген қос баған суре­тін өзіммен бірге аудандық Оқушылар үйінің «Дизайн» үйір­месінің жетекшісі Олжас Құлабаев пен «Бейнелеу өнері» үйірмесінің жетекшісі Олжас Жарасбеков үшеуміз салдық. Бұған майлы бояулар мен «Alvan» атты ирандық бояулар қолданылды. Жалпы, осы бағандардағы көркем сурет туындыларының нобайын өзіміз жасадық. Соның негізінде майлы бояуларды қолдана отырып, ұлттың негізі болған Қазақ хандығы мен ауыл өмірін бейнелейтін суреттерді салып шықтық. Ені – 19 метр, биіктігі – 6 метр болатын бағандарға сурет салу оңай шаруа емес. Бұл қос бағанның әрқайсысына бір айға жуық уақыт жұмсадық. Аталған суреттер аудан кіреберісіне ерекше көрік беріп, сырттан келген қонақтарға да ерекше әсер сыйлайтыны анық. Бұл жұмыстар өзіміздің көңілімізден шықты, аудан тұрғындары да өздерінің жақсы пікірлерін айтуда, – дейді ауданға бел­гілі суретші Ә.Бәйменов.

Бүгінде ауданға келген меймандар кентке кіреберістен аудан ажарын айшықтайтын жұмыстарға қанығады. Бұл аудан орталығының даму көкжиегін айқындайды. Тиісінше, тұр­ғындардың да әлеуеті арта беретіні анық. Алдағы уақытта бұл жерге бағдаршам орнату жұмыстары жүргізілмек.

Ердос БЕРКІНБАЕВ