Аудан орталығын көркейтіп, гүлдендіру – міндетіміз

«Тереңөзек – Сырдың сұлу еркесі...» деп ақын Мұхтар Сақтапов жырлаған аудан орталығы жыл сайын көркейіп келеді. Негізінде кез келген өңір мен өлкенің орталығы басқа елді мекендерге үлгі болуы керек. Сол себепті де бүгінде Тереңөзек кентін абаттандырып, көркейту бағытында нәтижелі жұмыстар атқарылуда. Осы ретте, Тереңөзек кентін өркендетуге қатысты жұмыстарды биыл ғана кентке әкім болып сайланған Ержан Бахтияровтан сұрап білдік.

– Ержан Бахтиярұлы, сұхба­тымызды аудан орталығын абат­тандыруға қатыс­ты сауалмен бас­тасақ. Кентішілік көше­лер жөн­деліп, жарықтандырылып келе­ді. Өткен жылдың өзінде кенттегі бас­ты көше – А.Иманов көшесі күрделі жөн­деуден өтіп, талаптарға сай болды. Енді биылғы жоспарда қандай көшелер бар?

– Өздеріңізге белгілі, жылдан-жылға Те­рең­өзек кентінің аумағы кеңейіп келеді. Жа­ңа аймақтар ашылып, инфрақұрылымдық жұ­мыстар жүргізіліп, жаңа тұрғын үйлер салынып, шағын аудандар қосылды. Осыған байланысты кент тұрғындары талап-тілектерін жет­кізуде. Оның ішінде көшелерді жөндеуге, жарықтандыруға, абаттандыруға қатысты өті­ніштер жетерлік. Енді біз осы жұмыстарды аудан әкімі Мұрат Нәлхожаұлының тапсырмасымен бюджеттің мүмкіндігіне қарай кезең-ке­зеңімен жүзеге асыруды жоспарлап отырмыз.

Биыл жыл басынан бері кенттегі А.Има­нов көшесі бойындағы орамдарға және И.Тоқ­тыбаев тұйығына тас төселді. Жаңбырлы күн­дері бұл шеткі көшелерде тұрғындардың жүруі қиынға соғады. Осыны ескеріп, жергілікті бюд­жет есебінен тас төсеу жұмыстары жүр­гізілді. Одан бөлек тұрғындар көп жүретін И.Тоқ­тыбаев көшесіне аудандық бюджеттен 141 млн теңге қаржы бөлінді. Оған аталған көшеге тротуар орнату, аяқ су жүргізуге темір бетонды лоток салу жұмыстары атқарылмақ. Қазіргі таңда жоба бойынша мемлекеттік сатып алу жұмыстары жүзеге асырылуда. Сонымен қатар биыл А.Әлиакбаров көшесі бойында орналасқан көпқабатты тұрғын үй аулаларын абаттандыру және Б.Момышұлы көшелерін жөн­деу жұмыстары атқарылатын болады. Атал­ған жұмыстарға облыстық бюджеттен 150 млн теңге қаржы бағытталды. Оған қоса Қ.Бө­деев, О.Мәлібаев, Б.Өтепов, Т.Қозыбаев, А.Тоқмағамбетов көшелері тұрғындарынан жөн­деу жұмыстарына қатысты өтініштер келіп түсті. Осыған байланысты аталған көшелерді жөн­деу жұмыстарын да бірінші кезекте атқару қажет­тілігімен облыстық басқармаларға бюд­жеттік өтінімдер ұсынылды.

Негізінен, Тереңөзек кенті бойынша 23 кө­­шеге орташа жөндеу жұмыстары жоба-сметалық құжаттама әзірленіп, «Ауыл – ел бе­сігі» бағдарламасы аясында республикалық бюджеттен қаражат бөлу ұсынылды. Сондай-ақ кентішілік 10 көшеге жаяу жүргіншілер жолын салу жұмыстарына облыстық басқармаларға бюджеттік өтінімдер жіберілді. Ұсыныс қолдау тапса, жалпы ұзындығы 20 шақырымды құ­райтын Ғ.Мұратбаев, Д.Қонаев, Жеңістің 50 жылдығы, Қазақ, Ә.Тәжібаев, Р.Алшынбаев, Ж.Құт­тыбаев, Н.Ергешбаев, О.Абдулпаттаев кө­шелеріне тротуарлар салынып, жөнделетін болады.

– Өзіңіз атап өткендей, кенттегі А.Әлиакбаров көшесі бойында орна­ласқан көпқабатты тұрғын үйлердің аулалары абаттандырылады. Бұл жақсы бас­тама екені анық. Тереңөзек кентінде басқа да көпқабатты тұрғын үйлердің аулалары да осындай жұмыстарды күтіп тұрған секілді.

– Әрине, барлық мәселе бірден шешілмейді. Сондықтан аудан орталығындағы көпқабатты тұрғын үй аулаларын заманауи талапқа сай келтіру жұмыстары біздің жос­парымызда бар. Биыл А.Әлиакбаров көшесі бойындағы тұрғын үйдің аулаларын абаттандырып, осы маңдағы тұрғындарға жақсы жағдай жасалмақ. Сонымен бірге кенттегі А.Иманов көшесі бойындағы көпқабатты тұрғын үй аулаларын абаттандыру да назарда тұр. Бұл бойынша аулалардағы ескі сарайларды бұзып, орнына спорт және ойын алаңдарын, автотұрақтар мен тұрғындарға арналған шағын демалыс орындарын салуға жобалаушы мекемеге тапсырыс берілді. Одан бөлек, Тереңөзек кентін көркейту бағытында «Майжарма» арнасының жағалауын, кентке кіреберістегі саябақ, «Сыр сұлуы» аллеясының демалыс саябағын жаңғырту жұмыстары үшін жобалау сметалық құжаттама дайындалып, облыстық бюджеттен қаражат бөлу ұсынылды. Аталған жобаларға қаржы бөлінсе, кент көр­кейе түсетіні анық.

Тағы да айта кететіні, аудан орталығына кіреберісті абаттандыруға аудан әкімі ерекше мән беріп отыр. Соған байланысты аудан паспорты жаңартылды, қосымша арнайы әр­ленген тақталар қойылды.

– Қазір жаз мезгілінде көше бойын­да балалар көп жүреді. Жүйткіген көлік­тердің балаларға зияны тиеді ме деп ата-аналар алаңдаулы. Осы тұста балаларға арналған ойын алаңдарын салу мәселесі қозғалады? Биыл аудан орталығында балаларға арналған ойын алаңдары салынады ма?

– Көшелерге ойын алаңдарын салуға қа­тысты кент тұрғындарынан өтініштер түсуде. Ол өтініштер біздің назарымызда. Өткен жылы Тереңөзек кентінде А.Иманов пен Н.Ергешбаев көшесі қиылысындағы көпқабатты тұрғын үй­лер жанынан балаларға арналған ойын алаңы мен жаттығу алаңы салынды. Бұл ба­ғыттағы жұмыстар биыл да жалғасын табады. Кент тұрғындарының сұранысына сәй­кес, И.Тоқтыбаев көшесінде балаларға ар­нал­ған ойын алаңы салынады. Бүгінде бұл жұ­мыс бастау алды. Сонымен қатар Қ.Бөдеев көше­сіндегі балалар ойын алаңын және №131 Т.Қо­зыбаев атындағы мектеп жанындағы спорт ала­ңын қалыпқа келтіру жұмыстарын атқа­ратын боламыз.

– Тереңөзек кентінің гүлденіп, көр­кеюі үшін тазалық мәселесі үнемі назарда болуы керек. Бұл бағытта көктем басталғалы тазалық іс-шаралары қар­қын­ды жүргізіліп келе жатқаны анық. Осыған тоқталып өтсеңіз?

– Халқымыз «Ауылына қарап, азаматын таны» деп жатады. Аудан орталығы бол­ған соң меймандар көп келеді. Одан бөлек өзіміздің тұрғылықты жеріміздің таза болғаны бұл мәдениеттілікті білдіреді. Сондықтан ау­дан басшысы кент тазалығын сақтауға қатыс­ты нақты тапсырмалар жүктеді. Соған байланысты кент кіреберісінен бастап, ішкі кө­шелердің тазалығына күнделікті назарда ұстаймыз. Жалпы, Тереңөзек кентінде көр­кейту және көгалдандыру жұмыстарына 38,8 млн теңге бөлінген. Кентті гүлдендіру үшін гүлзарларға гүл, ағаш көшеттерін отырғызу және И.Тоқтыбаев көшесі жасыл белдеу ашу жұмыстарын бүгінде «Мұрат құрылыс» ЖШС, аяқ су айдау жұмыстарын «Жәрдем» ЖШС ат­қаруда. Сонымен қатар Орталық алаңға, «Парасат», «Тағзым» алаңына, стадион ау­мағына гүлдер отырғызылып, күтімге алынды. Ал көркейтіп-көгерту жұмыстары бойынша И.Тоқтыбаев көшесі бойындағы саябаққа, Бұқарбай батыр, А.Иманов көшесі бойындағы саябаққа, №36 Ә.Тәжібаев мектеп-лицейі мен көшелерге, мекеме аумақтарына 4000 да­на көшет пен қаламша отырғызылды. Бұл жұ­мыстар әлі де жалғасын табуда. Ерекше атап өтерлігі, Тереңөзек кенті әкімдігі тарапынан, яғни өз күшімізбен Жеңістің 50 жыл­дығы көшесіне қоршаулар орнатылды. Ал­дағы уақытта Ә.Тәжібаев және Ғ.Мұратбаев көшелеріне де қаламшалар отырғызылып, кү­тімге алынатын болады.

– Кент көшелеріне отырғызылған кө­шеттер мен қаламшалардың көктеп шығуы аяқ суға байланысты екені бел­гілі. Осы тазалық айлықтарында су жолдарын тазалауға да ерекше мән берілді. Соның нәтижесіне тоқталсаңыз?

– Өздеріңізге белгілі, кент көшелерінде аяқ су жүретін су жолдарының іздері бар. Бірақ олар көміліп, көшелерге су жеткізуде мәселе болды. Біз осыған мән беріп, су жолдарының іздерін қайта қазу жұмыстарын атқардық. Атап айтқанда, Ж.Нұрсейітов көшесінің бір бетіне аяқ су жүргізу үшін 300 метр, Желтоқсан кө­шесімен А.Иманов көшесінің қиылысына дейін 498 метр, Ж.Құттыбаев көшесінің екі бетінен 578 метр, Жеңістің 50 жылдығы мен Д.Қонаев көшесі қиылысына дейінгі екі бетінен 540 метр, Д.Керейтбаев көшесінің бір бетінен аяғына де­йін 530 метр, А.Әлиакбаров көшесі мен ау­дандық әкімшілік ғимаратына дейін 114 метр, Абай көшесінің «Халық банкі» және «Парасат» алаңына дейінгі аралықта 65 метр, Ғ.Мұратбаев көшесінің екі бетінен 703 метр, Б.Момышұлы көшесінен 524 метр, «Айтбай арық» каналынан Тоғанас батыр көшесіне дейін 76 метр, «Айтбай арық» каналынан Ақтам көшесі бо­йына дейін 200 метр аяқ су жолы қазылды. Бар­лығы 4128 метр арық қазылып, көшелерге су жіберілді. Сонымен қатар Б.Момышұлы кө­шесіндегі «Майжарма» каналынан бөлініп аға­тын «Оразбай» каналының бас жағына және А.Тоқмағамбетов көшесіндегі «Қаракөл» каналының бойына аяқ су жеткізетін электрлі насос орнатылды. Қазіргі кезде кент бойынша барлығы 21 аяқ су электр қозғалтқышты насос жұмыс жасап тұр. Бүгінгі күні кент көшелеріне берілетін аяқ судың апта бойына кезектілік кес­тесі әзірленуде. Алдағы уақытта кезектілік кестесі ақпараттандырылады.

– Енді көктеп келе жатқан көшеттерге кент көшелерінде жүрген төрт түлік мал­дардың зия­ны тиюде. Осы бағытта қандай шаралар қолданылуда?

– Расында, кент көшелерін көгалдандыруға күш салып жатқанымызда, төрт түлік мал ағаштардың өсіп-шығуына кері әсерін тигі­зуде. Ағаштарды арнайы қоршаулағанның өзін­де қараусыз жүрген малдардың кесірінен са­нитарлық тазалық сақталмауда. Осыған орай кент көшелерінде қараусыз жүрген малдарға байланыс­ты тұрғындармен кездесу өткіздік. Кездесу барысында түсіндірме жұмыстарын жүр­гізіп, малды қараусыз қалдырмау керектігі ескертілді. Егер тұрғындар мұндай ескертулер­ге құлақ аспаса, қараусыз жүрген малдар қамалып, иелеріне арнайы шара қолданылады.

– Көркейту-көгалдандырумен қатар са­нитарлық тазалық жұмыстарына да ба­сымдық берілгенін байқаймыз. Ортақ үйіміздің тазалығы – баршаға ортақ. Десе де кент тазалығына жауапты маман­дар­дың жұмысын атап өтсеңіз?

– Әрине, кент тазалығын қамтамасыз ету үшін күнделікті және жетісіне бір рет тазаланатын көшелер мен учаскелер, оларға шығатын жұмысшылар нақты белгіленіп, қадағалануда. Негізінен, Тереңөзек кентінде санитарлық тазалау жұмыстарына биылғы жылға 25 млн теңге қаржы бөлініп, мердігер мекеме «Қазына С» ЖШС-мен келісім шарт жасалды. Сол бойынша тазарту жұмыстары жүргізіліп жатыр. Оған қоса, кент бойынша күнделікті жүргізілетін тазалау жұмыстарына 10 жұмысшы мердігер ар­қылы, 30 жұмысшы аудандық жұмыспен қамту орталығы арқылы қамтылған. Сонымен қатар санитарлық тазалыққа байланысты 6 техника қарастырылған. Тазалық іс-шарасы барысында қалдықтардың қордаланған учаскелер арнайы тазартылуда.

Айта кететіні, бүгінгі күнге дейін жеке тұр­ғындар мен мекемелерде барлығы 600 да­на контейнер таратылып берілген. Алайда нақты қаржысын төлеп, қоқысын шығарып отырған 50 үй ғана бар. Бүгінгі күнге осы контейнерлер бойынша түгендеу жұмыстары жүр­гізіліп, қайта шарт жасасу жұмыстары ұйым­дас­ты­рылуда. Ағымдағы жылы 50 дана контейнер сатып алынса, қосымша 50 дана контейнер маусым айында әзірленетін болады. Олар кент тұрғындары тарапынан келіп түскен өті­ніштерге сәйкес таратылуда.

Жалпы, тазалық – баршаға ортақ іс. Сен­біліктер барысында кент аумағы тазарып қалды. Осы күнге дейін аудандық мекеме қызметкерлерінің қатысуымен көптеген сен­­бі­ліктер ұйымдастырылып, көшелер күл-қо­қыс­тан тазарды. Енді тереңөзектіктер осы та­за­лықты сақтауға атсалысу керек. Бұл бар­ша­мызға жауапкершілік жүктейді. Осы ретте, са­нитарлық тазалау жұмыстарына атсалыс­қан мамандарға зор ризашылығымды білдіремін!

– Соңғы жылдары Тереңөзек кентінде кәсіпкерлік нысандар көптеп ашылып, кәсіпке ден қойғандар қатары көп. Мұ­ның кент тұрғындары әлеуетінің артуы­­на септігі мол. Кәсіпкерлік саласының да­муына арнайы тоқталып өтсеңіз?

– Иә, кәсіпкерлік – экономикамызды дамытушы негізгі саланың біріне жатады. Бүгінде Тереңөзек кенті бойынша жұмыс жасап тұрған 77 кәсіпкерлік субъектісі бар. Онда жергілікті тұрғындар жұмыспен қамтылған. Қазіргі таң­да кәсіп ашамын деушілерге қолдау көп. Сон­дықтан бұл бағытта кент тұрғындарының қар­қыны жаман емес. Осы аптаның өзінде аудан орталығында «Жігер» асханасы өз жұмысын бастады. Біздің тарапымыздан тұрғындарға кәсіпкерлікпен айналысу үшін жан-жақты тү­сіндірме жұмыстары жүргізілуде. Мәселен, осы аптаның бейсенбісінде Тереңөзек кенті әкімі аппаратының ұйымдастыруымен дәстүрлі еркін форматта семинар-тренинг өткізілді. Ондағы негізгі мақсат мемлекеттік қолдау шаралары аясында жаңа бизнес-идеяларды іске асыруға мемлекеттік гранттар беру қағидалары туралы ақпарат ұсыну болып табылды. Оған арнай мамандар шақырылып, кәсіп бастауға ынталы азаматтарға кәсіпкер ретінде тіркелу, салық төлеу және есептілігін тапсыру, салықтарды уақытылы төлемеген жағдайда айыппұлдарды төлеу тәртібі, жаңа бизнес идеяларды іске асыруға мемлекеттік гранттар беру, кәсіп­керлер мен тұрғындарға осы саладағы мәсе­лелер бойынша сервистік қызмет көрсету, биз­нес-жоспар жасау мәселелері бойынша мә­ліметтер берілді. Іс-шара барысында тиісті сала мамандары мен кент әкімі аппаратының қызметкерлері қатысушылардың қойған са­уалдарына жауап берді. Осындай жұмыс­тардың нәтижесінде аудан орталығында кәсіп­кер­лік саласының даму үдерісі артады деп есеп­теймін.

Жалпы Тереңөзек кентін дамыту, гүлден­діріп көркейту – біздің негізгі міндетіміз. Бұл ретте, аудан әкімі Мұрат Нәлхожаұлы аудан орталығын өркендетуге ерекше назар қойып отыр. Сондықтан жос­парлы жұмыстарымызды атқарып, туған жеріміздің көркеюіне еңбек ете береміз. Бұл тұста, кент тұрғындары қолдау біл­діреді деген сенімдемін.

– Сұхбатыңызға рахмет!

Сұхбаттасқан
Ердос БЕРКІНБАЕВ