Аудан абыройын асқақтатты

Өткен апта жағым­ды жаңалықпен қо­­рытындыланды. Өзін аудандағы «Да­­­рын» оқу орталығының ментальді ариф­метика курсының мұғалімі деп та­ныстырған Береке Әбсаттарова сү­йін­ші жаңа­лық­пен бөлісті.

Жанболат, Дінмұхаммед, Айқын есімді дарынды оқу­шылар ментальді арифметика бойынша облыстық олим­пиадаға қатысып, жүлделі орындармен оралыпты. 4-16 жас аралығындағы балаларға арналған байқау облыс ор­талығындағы «Kids park» балалар орталығында өткен.

Ментальді арифметика – балалардың зияткерлік қабі­летін дамытуға арналған ойша есептеу жүйесіне бағыт­талған бағдарлама. Оның негізі ежелгі Қытайда «абакус» есептеу құрылғысының пайда болуымен тығыз байланыс­ты. «Абакус» деген кәдімгі біздің бала күнімізде әр сауда дүкенінде тұрған есептеу құрылғысы. Ғалымдар дәл осы құрылғының адам миын шынықтыратын қасиеті бар екенін анықтаған.

Атаулы байқауға облыстың түкпір-түкпірінен келген 50-ден астам білімді балғын қатысқан. Ұтқырлық пен жылдамдық және шеберлікті талап ететін олимпиада қатысушыларына күрделі есептерді ментальді ариф­метикаға сүйене отырып шығару тапсырылған. Талап бойынша берілген отыз минут ішінде балалар 90 есеп­ті «шемішкеше» шағуы керек. Тәлімгерінің тиімді тәсі­лін ұтымды пайдаланған Жанболат Ибрагим күрделі есеп­терді бар-жоғы 9 минутта аяқтап шеберлік танытса, Дінмұхаммед Нұрбекұлы 11 минутта есептердің дұрыс жауабын тапқан. Деңгейге қарай бөлінген 30 есепті 15 минутта аяқтаған Айқын Мырзағали да үздіктер қатарынан көрінген. Нәтижесінде, №210 О.Әбілпаттаев атындағы мек­тептің оқушысы Жанболат үздік деп танылып, Көкшетау қаласында өтетін байқаудың республикалық кезеңіне жолдама ұтып алған. Ал №36 мектеп-лицейдің мақтаныштары Дінмұхаммед жүлделі І орынды, Айқын ІІ орынды иеленген. Жеңімпаздар арнайы диплом мен бағалы сыйлықтармен марапатталған. Осылайша, ауданның намысын қорғауға барған үш дарын қатарластарынан оза шауып, жүлдегер атанған. Бұған ата-аналардың да, тәлімгердің де мерейі өсіп, үміттері ақталғанына дән риза.

– Облыстық олимпиада өтеді деген хабар алысымен, балалармен және ата-аналарымен ақылдаса отырып, бақ сынап көруді жөн санадық. Дінмұхаммед пен Жанболат аудан­да «Дарын» орталығы ашылғаннан бері қатысып, жақсы нәтиже көрсетіп келеді. Айқын курсқа кейін қосылғанымен, ынтасы жоғары. Облыстық олимпиада балаларға жайлы жағдайда ұйымдастырылды. Оқушылар олимпиада аяқ­талған соң тамақтанып, балалар ойын алаңында ойнап, біраз сергіп қалды. Жазғы каникул кезінде өткен іс-ша­ра балаларды ойната отырып ой-өрісін дамытуды көздеді. Кішкентай математиктер олимпиадаға үлкен жауапкер­шілікпен дайындалып, күннің ыстығына қарамай, екі мезгіл сабаққа келді. Есесіне, еңбек ақталды. Бұл жеңіс дарынды оқушыларға үлкен мотивация болды, – дейді «Дарын» оқу орталығының мұғалімі Береке Әбсаттарқызы.

Айта кетейік, балалардың ойлау қабілетін дамытатын «Дарын» оқу орталығы 2020 жылдан бастап кент мәдениет үйінде жұмыс жасап келеді.

Аружан МҰХАНБЕТҚАЛИ