Жемқорлықты жою – ортақ міндет
Өткен аптада Сырдария аудандық ветеринариялық станциясында сыбайлас жемқорлыққа қарсы іс-қимыл жөнінде жиын өтті. Басқосуға Сырдария аудандық прокуратурасының прокуроры Батырбек Жұмағұлов, аудандық мәслихат депутаттары Жұмабек Ембергенов, Ақтөре Ибрагимұлы, аудандық қоғамдық кеңес төрағасы Марат Еспенбетов, жеке кәсіпкер Ғалымжан Маханғалиев, кәсіпорын директоры Нұрлыбек Дәулетбаев, сала мамандары қатысты.Жиынды ашқан Сырдария аудандық ветеринариялық станциясының директоры Нұрлыбек Дәулетбаев сыбайлас жемқорлықты болдырмау мақсатында атқарылып жатқан бірқатар жұмысқа тоқталды.
– Жалпы ветеринария саласында жоспарлы жұмыстар күн тәртібінен түспейді. Оның ішінде, сыбайлас жемқорлықтың алдын алу бойынша ұжымның алдына айрықша міндет қойылған. Әрбір маман заң аясында жергілікті халыққа қызмет көрсету қағидасын ұсынады. Негізінен, мемлекеттік қызмет этикасын сақтау маңызды рөл ойнайды. Сонымен бірге ветеринариялық құжаттың талапқа сай жасалуына көңіл бөлінеді. Өз кезегінде кәсіби маманның біліктілігін арттыруды алдыңғы орынға қоямыз. Сыбайлас жемқорлық факторының жолын кесу арқылы түрлі заң бұзушылықты болдырмауды қадағалаймыз. Бұл ретте, төрт түлікке байланысты өзекті мәселелерді шешу жолдары қарастырылады, – деді кәсіпорын директоры Нұрлыбек Дәулетбаев.
Күн тәртібіндегі мәселе бойынша ветеринариялық станция директорының орынбасары Бақытбек Бегімқұлов баяндама жасады. Сондай-ақ жиынға қатысушылар көкейдегі сауалдарын сала мамандарына жолдады. Мал ұрлығына байланысты негізгі іс-шараларды бірлесе атқару керектігі өзара талқыланды. Төрт түлекке егілетін екпенің сапасы мен түрі анықталып, уақытылы егу жұмысы жүргізілуі керектігі айтылды. Мамандармен пікірлескен қонақтар кейбір қордаланған мәселе жөнінде өз ойларын ортаға салды. Мемлекеттік көрсетілетін қызметтердің заңға сай орындалуы қатаң бақылауда болу керектігі ескерілді.
Балтабай ОРДАБЕКОВ
