Ардагерлер ардақталды
Газетіміздің №25 санында «Жиырма жеті жылдан кейінгі жүздесу» тақырыбында ақпараттық мақала жазып, онда кезінде аудандағы халыққа тұрмыс қажетін өтеу комбинатында қызмет еткен қыз-келіншектердің ұзақ жылдан бергі кездесуі өткенін жазған едік. Кезінде аудан халқына ең қажетті қызметті көрсетіп, кейін тарап кеткен орталықтың ардагерлері осы уақытқа дейін бір-бірінен көз жазып қалған болатын.Аудандық халыққа тұрмыс қажеттілігін өтеу комбинаты бастауыш ардагерлер ұйымының төрайымы Н.Керейтбаева наурыз айында ардагерлермен аудандық семинар өткізу жоспарда барын айтқан еді. Міне, арада үш ай өткеннен кейін аудан әкімдігінің ұйықты болуымен, облыстық мәслихат депутаты Р.Есеновтің қолдауымен еңбек ардагерлерінің аудандық семинары ұйымдастырылды.
Аудан орталығындағы «Достық үйінде» өткен семинарға аудан әкімінің орынбасары Д.Байдушев, кент әкімі Е.Бахтияров, аудандық ардагерлер кеңесінің төрағасы М.Келдібаев, кент ардагерлер кеңесінің төрағасы З.Жүсіпбайұлы, қоғамдық кеңес төрағасы М.Еспенбетов, аудандық мүгедектер қоғамының төрағасы Ж.Нарымбетов, қоғамдық кеңес мүшелері мен тұрмыс қажетін өтеу комбинатының ардагерлері қатысты. Жиынды кент ардагерлері кеңесінің төрағасы ашып, күн тәртібімен таныстырды.
– Биыл ҚР Ардагерлер кеңесінің құрылғанына 30 жыл толып отыр. Мемлекет басшысы Қ.Тоқаев Ұлттық құрылтайдың І отырысында сөйлеген сөзінде табанды еңбек етіп заңға адалдық танытқан азаматтар құрметке ие болуы керектігін атап өткен болатын. Осы ретте кезінде елеулі еңбек еткен тұлғаларды іздеп, арнайы ұйым құрып, ардагерлердің уақытын тиімді өткізу мақсатында осындай іс-шаралар ұйымдастырылып отыр. Қарап отырсақ, қарияларға құрмет көрсету кейінгі ұрпақты тәрбиелеудің бірден-бір жолы, – деді З.Жүсіпбайұлы.
Семинардың алғашқы бөлімі қонақтарға арнайы көрмені таныстыруға арналды. Көрмені қазіргі «Сымбат» тігін цехының басшысы Алма Жамалова таныстырды. Қолөнер бұйымдары, қыз жасауы мен түрлі киім-кешектерден жасалған көрмеге қойылған заттардың ардагерлердің өз қолымен бірнеше күн ішінде жасаған жұмысы екенін естіген көпшілік өз таңданыстарын жасыра алмады. Арнайы жасақталған көрмеде қазақтың ұлттық киімінен бастап, шапан, бас киім, аяқ киім, түрлі ұлттың киімі мен күнделікті жеңіл көйлектерге дейін қойылған. Сондай-ақ моншақ, бисерлермен жасалған үлкен картиналар көрген көзді сүйсіндірді.
Мұнан соң аудандық халыққа тұрмыс қажеттілігін өтеу комбинаты бастауыш ардагерлер ұйымының төрайымы Н.Керейтбаева баяндама оқыды.
– Халыққа тұрмыс қажетін өтеу саласы қызметінің тарихына үңілетін болсақ, бұл қызмет 1948 жылдан бастау алған. Алғашқыда артель «Жизнь Казахстана», «ПромАртель. Промкомбинат» болып жұмыс жасаған мекеме 1970 жылдан бері халыққа тұрмыс қажетін өтеу және коммуналдық шаруашылық министрлігіне қарасты комбинат болып қызметін жалғастырды. Комбинатта тұрмыстық қызметтің түрлі саласы болған. Ж.Ералиев балық шаруашылығын абыроймен басқарса, С.Рожаев, С.Сексенбаев, К.Николай секілді білікті мамандар түрлі құрылыс-жөндеу жұмыстарын жүргізген. Комбинат құрылғаннан бастап ұжымды ауданға белгілі азамат М.Байхожаев басқарса, кейін Алма Қашақбаева комбинат жекешелендіріліп тарағанға дейін басшылық жасады. Тәлім-тәрбие беріп, тәжірибесімен бөліскен ұлағатты тұлғалар да аз болған жоқ. Бас экономист А.Жамалов, бас есепші Ү.Ералиева сияқты білікті мамандардан кейінгі буынның үйренері аз болған жоқ. Ұжым қызметкерлері небір кезеңді бастан өткерді. Әйел-аналарымыз тек қана жұмыспен шектелмей отбасы, ошақ қасында шет қалдырмады. Міне, сөзімізге дәлел арамызда «Батыр ана» атанған ардагерлеріміз бар. Қиын-қыстау кезеңде «шеберлеріміздің қолы ортақ» болған кездер де болды. Сонда сол заман адамдарының мәрттігі, бір-біріне тегін көмектесіп, қолдан келгенін аямайтын еді, – деп еске алды.
Іс-шарада аудан әкімінің орынбасары Д.Байдушев ардагерлерді мерейлі мерекемен құттықтай отырып, аудан әкімдігі кез келген ұсынысты бірге қарастырып, қолдау көрсетуге дайын екенін жеткізді. Сондай-ақ аудан әкімінің ардегерлерге алғысын жеткізіп, ардагерлер А.Қашақбаеваға «Ел құрметі» медалін, Т.Абдукаримова мен Ш.Омароваға «Құрметті ардагер» медалін табыстады.
Келесі марапаттарды бірқатар ардагерлерге кент әкімі тапсырды. Ержан Бахтиярұлы ардагерлерді құттықтап, «Алғыс хаттар» ұсынды. Көңіл бөліп, арнайы алғыс жариялаған басшылық тарапқа еңбек ардагерлері алғысын жаудырып, ақ батасын берді.
Жиын соңында қонақтар мен аудандық халыққа тұрмыс қажетін өтеу саласының ардагерлері сөз сөйлеп, ұтымды ұйымдастырылған семинар мен оң бастамаға шынайы қуанып отырғандарын жеткізді. Кезінде «дүркіреген» ұжым мүшелерінің 90 пайызы әйел адамдар болса, нәзік жандылармен бірге ер азаматтар да комбинатта еңбек еткен. Осы ретте ардагер С.Сәдуақасов пен аудандық семинарға арнайы шақырылған құрметті қонақ С.Дәужановқа шапан жабылып, құрмет көрсетілді.
Айта кетейік, «Достық үйі» ғимаратында аудандық тұрмыстық өтеу комбинаты ардагерлерінің арнайы стенді орналасқан. Онда еңбек адамдарының бүгінгі тіршілігінен көрініс беретін суреттер орналасқан. Жақсы әңгімелер мен естеліктер, ұтымды ұсыныстар айтылған басқосу осылай өз мәресіне жетті. Жиын соңында аудандық тұрмыстық өтеу комбинатында ұзақ жыл адал еңбек етіп, комбинат жұмысын жандандыруға үлес қосқан Жұмахмет аға мен Үлфат апайдың қызы Шолпан Ералиева ата-анасының көзкөрген қызметтестерін басқосуымен арнайы құттықтап, сый-сияпатын ұсынды. Ардагерлер игі іс-шараның кең көлемде өтуіне атсалысып, қолдау көрсеткен тұрмыс қажетін өтеу комбинатының ардагері Бақыт Байжүнісованың ұлы, облыстық мәслихат депутаты Расул Есеновке шынайы алғыстарын білдірді.
Аружан МҰХАНБЕТҚАЛИ
