Қауіпсіздік қалқаны
Мемлекеттік қызметшілермен қатар тәртіп сақшылары да кәсіби мерекелерін атап өтті. Оның үстіне биыл Қазақстан Полициясына – мерейлі 30 жыл. Айтулы мерекеге орай ауданның полиция қызметкерлеріне құрмет көрсетілді.Алдымен, аудан әкімі М.Ергешбаев, аудандық мәслихат хатшысы Е.Әжікенов, облыстық мәслихат депутаты Р.Есенов бастаған меймандар, ардагерлер №131 орта мектептің алдындағы ІІ дәрежелі «Айбын» орденінің иегері, бейбіт күннің батыры болған Талғат Қозыбаевтың ескерткіш бюстіне арнайы барып, батырдың ұмытылмас ерлігіне тағзым етті. Білім ошағындағы Т.Қозыбаев атындағы мұражай жұмысымен танысты.
Мұнан соң Тереңөзек кентіндегі Орталық алаңда полиция қызметкерлерінің қатысуымен салтанатты іс-шара өтіп, тәртіп сақшылары мен сала ардагерлерін аудан әкімі кәсіби мерекемен құттықтады.
– Қазақстан полициясы – еліміздің қоғамдық қауіпсіздігі мен тыныштығын, азаматтардың еркіндігі мен конституциялық құқықтарын қорғайтын, қылмыстың жолын кесетін мемлекеттік жүйе. Полиция қызметкері болу – маңызды әрі жауапкершілігі мол жұмыс. Ол үшін байыпты білім мен айбарлы жүрек, қажырлы күш-қайрат қажет. Ал халық сенімі – полиция қызметіне берілетін басты баға. Сіздердің кәсіптеріңіз қаншалықты қиын, тіпті кей жағдайда аса қауіпті екендігі де белгілі. Бүгінде ерлікпен қаза тапқан бейбіт күннің батыры, учаскелік полиция инспекторы, полиция лейтенанты Талғат Қозыбаевтың ерлігі көпке үлгі болып қалары сөзсіз. Мемлекет полиция қызметін заманауи, оның ішінде цифрлық технологиялардың материалдық-техникалық базасын жақсартуда. Соның негізінде аудандағы тіркелген қылмыстар саны өткен жылмен салыстырғанда 12,5 пайызға төмендеген. Бұл тәртіп сақшыларының адал қызметінің нәтижесі деп білемін, – деді аудан басшысы.
Мерейлі мерекеде сала қызметкерлері облыс және аудан әкімінің «Алғыс хаттарымен» марапатталып, ерен еңбегімен көзге түскен бірқатар полицейге төсбелгілер табыс етілді.
Е.ЖАППАРБЕК
