"Мен өмірді жырлау үшін келгенмін"
Кеше аудандық балалар кітапханасының ұйымдастыруымен ақиық ақын Мұқағали Мақатаевтың туғанына 91 жыл толуына орай «Мен өмірді жырлау үшін келгенмін» атты әдеби-сазды кеш өткізілді. Кешке «Жыр жауһар» клубының мүшелері, кітапханашылар, ұстаздар қатысты. Әдеби кеште «Жыр жауһар» клубының мүшелері поэзия мұзбалағы Мұқағали Мақатаевтың өлең жолдарын жатқа оқыды. Сонымен бірге ақынның өмір жолына тоқталған кітапханашылар қонақтарға мол мағлұмат берді. Өз кезегінде аудандық мәдениет үйінің өнерпаздары Ақбота Талғатова мен Динара Жәкешова қаламгердің сөзіне жазылған бірнеше әнді шырқады. Бейнекөрініс арқылы балаларға ақын шығармашылығы кеңінен насихатталды.
– «Балалар жылы» аясында кітахана ұжымы бірнеше танымдық іс-шара өткізуді жоспарлап отыр. Қазақтың біртуар ақыны Мұқағали Мақатаевтың шығармашылығын жан-жақты дәріптеу мақсатында «Жыр жауһар» клубы әдеби-сазды кешті ұйымдастырған болатын. Балаларды кітап оқуға баулып, ой-өрісін дамыту мақсатында жүйелі жұмыстар жасалуда. Бүгінгі кеште ақиық ақынның патриоттық, туған жер жайлы өлеңдерін балалар ынта-жігерімен оқып берді. Бұл ретте кештің мазмұнын аша түскен №210 О.Әбілпаттаев атындағы орта мектептің бастауыш сынып ұстаздары мен оқушыларына алғыс айтамыз, – дейді аудандық балалар кітапханасының меңгерушісі Гүлдана Әбенова.
Айта кетейік, аудандық балалар кітапханасының жанынан ашылған «Жыр жауһар» клубы 7 жылдан бері шығармашылыққа бейім балалармен тығыз байланыс орнатып келеді.
Балтабай ОРДАБЕКОВ
