Ұлағатты ұстаз, білікті математик

«Ұстаздық еткен жалықпас, үйретуден балаға». Бұл өмірін, еңбек жолын бала оқытуға арнаған барша ұстаздың негізгі ұстанымы екені сөзсіз. Шаған ауы­лындағы №37 мектеп-лицей мұғалімі Гүлсім Сәтбаева да білім ізденгендерге дұрыс бағыт-бағдар беруді бас­ты мұраты еткен.

Г.Сәтбаеваның үлкен елді мекен саналатын Шаған ауылындағы білім қабырғасында 33 жыл еңбек өтілі бар. Қызылорда қаласының тумасы облыс орталығындағы Ы.Алтын­сарин атындағы орта мектепті тә­мамдаған соң Н.В.Гоголь атындағы педагогикалық институтта жоғары білім алды. Өзі жастайынан есеп-қисапқа епті болған соң жоғары оқу орнында білікті ұстаздардан ма­тематиканың қыр-сырын меңгерді. Сондай-ақ, сабақ берудің әдіс-тә­сіл­дерін үйренді.

Жоғары білімі бар жас маман еңбек жолын «ВЛКСМ-нің 30 жыл­дығы» атындағы №37 орта мектепте бастайды. Шағандағы мектеп егемендік алғанға дейінгі жылдарда осылай аталыпты. Содан бергі отыз жылдың үстінде Гүлсім Әлібайқызы нақты ғылым саналатын математика пәні бойынша оқушыларға сабақ беруде.

– Математика пәні күрделі болған соң осы мамандықты көпшілік таң­дай бермейді. Мектеп бітірушілердің қатарынан математика пәнін таң­дағандар көп болмайды. Есеп-қисап, теңсіз­діктер, математикалық функциялар мен геометриялық талдау­­лар нақты ізденістің арқасында шешімін табады. Сондықтан бұл ғы­лым саласы үнемі ізденісті және жан-жақтылықты талап етеді. Жас­тайымнан осы үдеден шығу үшін еңбектеніп, балаларға білім беріп келемін. Әрбір оқушының шам­шырағын жағып, пәнге деген қы­зығушылығын арттыру – ұстазға міндет. Сол себепті оқушылардың ма­тематикаға деген ынтасын арттыруда түрлі әдіс-тәсілдерді пайдаланып, еңбек етудемін. Түптеп келгенде, бұл ғылым саласы адамдардың өміріне өте қажет. Адамзат баласы күнделікті осы есеп-қисаппен кезігіп жатады. Сондықтан мектеп қа­бырғасында жүргенде есептеудің түбірі қалыптасқан жөн, – дейді ұла­ғатты ұстаз.

«Шәкіртсіз ұстаз – тұл» дейді дана халқымыз. Ұстаздың елеулі еңбегі шәкірттерінің жетістігінен көрінеді. Бұған келгенде білікті математиктің беделі жоғары. Олай дейтініміз, бүгінде Г.Сәтбаевадан тәлім алып, ізін қуған шәкірттері Шағандағы мектепте сабақ беріп жүр. Атап айтқанда, Динара Ережімбетова, Рауан Кеңесова, Бауыржан Шахаров, Күнту Ахметов, Айнұр Нұрланова ауыл мектебінде оқушыларға білім үйретіп, ұстаздан алған білімнің ар­қа­сында ұлы мамандық иелері атан­ған. Сонымен қатар, үздік оқу­шылар Жанель Аманкелдиева, Ұл­жан Серікова, Зейнұр Яштайбек, Сұлушаш Әлтаева және басқаларын білікті ұстаз мақтан тұтады. Олардың қатарындағы Айжан Рамазан «Елбасы» медалімен марапатталғанын да атап өткен жөн.

Осындай шәкірттер тәрбиелеп жүр­ген қадірлі мамандық иесі әр жылдары құрметке бөленіп, арнайы марапаттарға ие болуда. Ұлағатты ұстаз «Сырдария ауда­нының 90 жылдығы» мерекелік ме­­далімен, ҚР Білім және ғылым ми­­нистрлігінің және об­лыс­тық білім басқармасының «Ал­ғыс хатымен» марапатталған. Одан бөлек, 2017 жылы Астана қала­сында «Заманауи ақпараттық бі­лім беру ортасы: дәстүр және инновация» тақырыбында өткен ха­лық­аралық ғылыми-практикалық кон­­фе­ренцияға қатысып, тәжіри­бе ал­­мас­қан.

Гүлсім Сәтбаеваның жолдасы­ Аман­тай Мыханов – зоотехник. Ауыл­­дағы серіктестікте еңбек етеді. Ер­лі-зайыпты 3 ұл-қыз тәрбиелеп, өсірген. Үлкені Бауыржан бүгінде Алматы қаласында байланыс саласында жұмыс істесе, келіні Наз­кен – балалар дәрігері. Үлкен қызы Рау­шан тұрмыс құрса, күйеубаласы Еркебұлан – спорт мектебінде мұға­лім. Ал кенжесі Аружан Әл-Фара­би атындағы Қазақ ұлттық уни­верси­тетінде «Ақпараттық жүйе» маман­дығы бойынша магистратурада білім алуда.

Ардақты ұстазға әріптестері ерек­ше құрмет көрсетіп, білім беру ісін­дегі тәжірибесін көпшілікке үлгі етеді. «Ұстазы бейілді болса, шәкірті зейінді болады» дейді. Зейінді ұрпақ тәрбиелеп жүрген білікті мате­ма­тиктің әркез мерейі үстем болуына тілекшіміз.

Ердос БЕРКІНБАЕВ