Екпе қабылдауға шақырамыз

Қауіпті індеттің алқымнан алып, жұрт­шылықты әбігерге салғанына да екі жылға жуық уақыт таяп қалды. Қазіргі таңда дерт дендемеу үшін денсаулық сақтау са­ласының мамандары тынбай із­деніп, ең­бек­теніп, аурудың алдын алатын амалдарды тапты. Соның ең маңыз­дысы – екпе қабылдау.

Екпе қабылдаудың тиімдігі жөнінде көп айтылып, нақты мысалдар келтірілуде. Ел Президентінен бастап барлық деңгейдегі басшылар халықпен тығыз қарым-қа­тынаста жұмыс істейтін болғандықтан дерт­ке қарсы екпе қабылдап жатыр. Мен де екпенің екі кезеңін қабылдадым және ауылдық округтегі әріптестеріме, тұр­ғындарға, кәсіпкерлерге түсіндірме жұ­мыс­тарын жүргізіп келеміз. Тұрғындар екпе жөнінде қандай да бір ақпарат алу үшін ауылдық емханаға келіп немесе хабарласып, дәрігерлерден кеңес алуларына болады. Білікті дәрігерлер ауылдың 100-ден астам тұрғынына екпе салды.

Денсаулық сақтау министрлігінің мә­лі­­метінше, біздің елге келетін екпенің бар­лығы да Дүниежүзілік денсаулық сақ­тау ұйымының сертификатымен, рұқ­сат­­тарымен келеді. Әрбір келген вакцина бірнеше айдан бастап, бірнеше жылдар бойы зерттеліп, оның қауіпсіздігі тек­­се­ріледі. Мұндай мүмкіндік кез келген елде жоқ. Жалпы екпе салғаннан кейін ағзада сол ауруға қарсы арнайы антиденелер пайда болады екен. Қорғану анти­денелерінің нәтижесінен адамның дене қызуы көтеріліп, ине салған жері қызаруы мүмкін. Осы кезеңде мұздай суға жуынбау керек, яғни жылы жүріп, мұқият күтінген абзал. Сонда ғана денсаулығымыз нығая түседі.

Екпеге қатысты алып-қашпа әңгімелер көп. Олар дәлелденбеген, негізсіз ақпа­раттар. Мысалы, «екпенің екі кезеңін қабыл­дағаннан кейін бетперде тақпай жүре беруге болады екен» деген жаңсақ пікір бар. Әркімнің денсаулығы өзі үшін ғана емес, өзгелер үшін де маңызды. Сон­дықтан екпенің екі кезеңін алсақ та карантин талаптарын сақтап, бетперде тағып, арақашықтықты ұстап, той-жиындарды шек­тегеніміз дұрыс. Себебі, «сақтансаң, сақтармын» деп бекер айтылмаған. Осы ретте, ауыл тұрғындарын, әсіресе халық­пен, көпшілікпен жұмыс істейтін азамат­тарды арудан сақтану үшін екпе қабыл­дау­ға шақырамын.

Бауыржан ЕРМАҒАНБЕТОВ,
Аманкелді ауылдық округі әкімі аппаратының бас маманы