Басты мақсат – жемқорлықты жою
Мемлекет басшысы Қасым-Жомарт Тоқаевтың «Жаңа жағдайдағы Қазақстан: іс-қимыл кезеңі» атты Қазақстан халқына арнаған Жолдауымен Сырдария аудандық қазынашылық басқармасының ұжымы ақпараттық оқу барысында танысты. Басқарма басшысы ұжым қызметкерлеріне Жолдаудан туындаған мақсат-міндеттер жөнінде мәлімет беріп, алдағы уақытта атқарылатын жұмыс жоспарларымен бөлісті. Президент Жолдауын ел дамуына жаңаша серпін беретін маңызды құжат ретінде қарастыруға болады.Жолдауда барлық сала қамтылды. Оның ішінде ел тұрғындарының қалыпты өмір сүруі үшін қажетті экологиялық таза қоғамдық орта қалыптастырудан бастап, әлеуметтік сала, құрылыс, кәсіпкерлік, мемлекеттік басқару бойынша нақты міндеттер жүктелді. Сондай-ақ заң үстемдігін қамтамасыз ету мақсатында жаңа реформалар қабылданатыны, қолданыстағы заңдарға өзгерістер мен толықтырулар енгізілетіні айтылды. Президент басты мақсат азаматтардың әл-ауқатын арттыру екенін атап өтті.
Мемлекет басшысы мемлекеттік басқарудың жаңа үлгісін қалыптастырудың маңыздылығына кеңінен тоқталды. Осы ретте тікелей Президентке бағынатын «Стратегиялық жоспарлау және реформалау агенттігі» құрылатынын мәлімдеді. Сонымен қатар мемлекеттік аппараттың қызметін қайта қарап, штат санын оңтайландыру бағытында ұсыныстар енгізуді тапсырды. Бұл тек мемлекеттік қызметшілерге қатысты емес, квазимемлекеттік сектор субъектілерін де жаңашылдықтар күтіп тұр. Атап өту қажет, қысқартылған штат санынан үнемделген қаражат балдық факторлық жүйе арқылы қызметкерлердің жалақысын көтеруге бағытталмақ. Бұл қызметкерлердің жауапкершілігін арттырып, өз міндетін сапалы атқаруына, қызмет барысында тек функционалдық міндетіне сай жұмыс істеуге ден қоюына, білімін жетілдіруге септігін тигізері анық.
Қоғамдағы өзекті мәселелердің бірі – сыбайлас жемқорлық қылмыстары. Жолдауда бұл туралы кеңінен айтылды. Президент тапсырмасына орай енді елімізде сыбайлас жемқорлықпен күрестің жаңа тәсілдері енгізіледі. 2021 жылдан бастап мемлекеттік қызметшілердің, депутаттардың, судьялардың шетел банктеріндегі есепшотқа ие болуына шектеу қойылады деп жоспарлануда. Мұнан бөлек бағалы заттарды сақтау бойынша да жауапкершілік көтеріледі. Қ.Тоқаев қажет болған жағдайда ҚР Қылмыстық кодексіне сыбайлас жемқорлық үшін жазаны күшейту үшін өзгеріс енгізуді міндеттеді. Жолдауда айтылған тағы бір маңызды ақпарат, ол сыбайлас жемқорлыққа қатысты қылмыс жасағандардың шартты түрде мерзімінен босатылуына алдағы уақытта рұқсат етілмейді. Қылмысы дәлелденген азаматтардың мемлекеттік қызметте жұмыс істеуіне қатаң тыйым салынады.
Жалпы Жолдауда көтерілген әрбір мәселенің мемлекет үшін маңызы зор. Басқарма қызметкерлері мемлекеттің болашағы, ауданның дамуы үшін жүктелген жауапкершілікті терең сезінеді және Президент тапсырмаларын уақытылы әрі сапалы орындауға атсалысады.
Ғалия БАЛЖАНОВА,
Сырдария аудандық
қазынашылық басқармасының
бас маман – бас қазынашысы
