Ерікті жастардың көмегі

"Жығылғанға жұдырық" демекші мына қиын кезеңде бір жағынан дүние жүзіне тараған індет алқымнан алса, екінші жағынан табысынан айырылған отбасыларға нәпақа табудың өзі қиын болды. Күн көрісінен айырылған жандарға мемлекет тарапынан көмек болғанымен, оның өзі теңізге құйған тамшыдай екені жасырын емес.

Міне осындайда қайырымды жандардың, ерікті жастардың тындырымды тірлігіне көз сүйсінеді. "Ауыл жастары қамқорлықты қажет еткен отбасыларына көмек қолын созды" дегенді естігенде, "Жарайсыңдар, міне нағыз азамат" деп қуанатынын сөзсіз.

Жақында аудандағы Ақжарма ауылының ерікті жастары ауызбірлік танытып, ауылдағы мүмкіндігі шектеулі жандарға, көп балалы, аз қамтамасыз етілген отбасыларға азық-түлік таратып, қайырымдылық жасады.

Жас та болса жанашырлық танытқан жастар бүгінгідей кезде сүрінгенге сүйеу, жығылғанға демеу болу азаматтық парызымыз деп біледі.

Бибісара ЖАНӘЛІ