Гуманитарлық көмек көрсетуде

Мамыр айы мақтааралдықтар үшін қиын жағдаймен басталды. Көршілес Өзбекстан мем­лекетінде болған жаңбыр мен дауылдан кейін Сырдария облысындағы «Сардоба» су қоймасы жарылып, соның салдарынан Түркістан облысы Мақтаарал ауданындағы бірнеше елді мекенді су басып қалды. «Жығылған үстіне жұдырық» дегендей, пандемияға байланысты төтенше жағдай кезеңінде Мақтаарал ауданында төтенше жағдай жарияланып, тасқын судан зардап шеккен тұр­ғындарды құтқару шаралары жедел жүргізілді.

Қазіргі таңда қауіптің беті қайтарылғанымен мақта­­­­­­а­рал­дықтардың тұрғын жайын су басып, қиын жағдайға душар болып отыр. Осындайда мызғымас бірлікті ту еткен қазақстандықтар су тасқынынан зардап шеккендерге көмек көрсетіп, қажетті азық-түлікпен, киім-кешекпен қамтамасыз етуде. Мұндай игі іске Сыр жұртшылығы, оның ішінде сырдариялықтар да үн қосты.

Облыс әкімдігі тарапынан ұйымдастырылған жұмыстардың нәтижесінде қоғам белсенділері, кәсіпкерлер мен ерікті жас­тар «Сыр жұртынан Мақтааралға көмек» ұранымен Түркістан облысына гуманитарлық көмек жеткізуде. Қайырымдылық көмекке аудан жұртшылығы, оның ішінде аудан жастары ерекше ынта танытып, қажетті азық-түлік қорын Мақтаарал ауданына жөнелтуде. Бұл сырдариялықтардың осындай қиын кезеңде мақтааралдықтарға демеу болып, қиындықты бірігіп еңсереміз дегенінің белгісі. Айта кетейік, осы күнге дейін сырдариялықтар Түркістан облысына 9 көлікпен 43 тонна гуманитарлық көмек жіберді. Оның ішінде күріш, қант, макарон өнімдері, жем, киім-кешек, көрпе-төсек және екі ірі қара малы бар. Гуманитарлық көмек көрсету жұмыстары әлі де жалғасуда.

Ердос СӘРСЕНБЕКҰЛЫ