Тіршілік тынысы Сырдария аудандық қоғамдық-саяси газет
» » Сақтық шаралары қолға алынды

Сақтық шаралары қолға алынды

Әлемді дүрбелеңге салған коронавирус індеті біздің мемлекетімізді де айналып өтпеді. Бас-аяғы бірнеше күннің ішінде ондаған адам ел аумағында аталған дертке шалдыққаны белгілі болды. Осыған орай ел Президенті халыққа Үндеу жариялап, Үкіметке халықты коронавирустық инфекциядан қорғау шараларын күшейтуді міндеттеді. Соның негізгісі – ел аумағында төтенше жағдайдың жариялануы. Бұл жағдай сақтық шараларын күшейтуге, жұқпалы індеттің кең етек алмауына арналған, бастысы дер кезінде жарияланғанын атап өту керек.


Елімізде төтенше жағдай жариялануымен барлық әлеуметтік нысандар қауіпсіздік шараларын іске асыру мақсатында арнайы жұмыс істеу режиміне көшті. Ең бірінші болып білім беру саласы арнайы шара қабылдап, мектеп оқушыларының мерзімінен бұрын көктемгі каникулға шығуын қамтамасыз етті. Ал студенттердің білім алуын қашықтықтан оқыту әдісіне көшірді.

Үйінде бала бақша жасындағы немесе мектеп оқушысы бар ата-аналарға неғұрлым баланы көшеге жібермеуге, үйден шығармауға байланысты ақпарат таратылды. Әрине, мұндай жағдайда барынша сабырлық танытып, тек қана ресми мәлімдемеге сену, үрейге бой алдырмау маңызды.

Аталған жағдайға байланысты ҚР Білім және ғылым министрі Асхат Аймағамбетов: "Каникул аяқталған соң, қажет болған жағдайда, оқушыларды қашықтықтан оқыту үшін дайындық жұмыстары жүргізілуде. Бұл тұрғыда арнайы топ ақпараттық жүйені контентпен қамтамасыз ету, педагогтерді үйрету, сервистерді тестілеу және т.б. бағыттар бойынша жұмыс атқаруда. Ұйымдастыру жұмыстарын 5 сәуірге дейін аяқтауымыз қажет. Бізде бірнеше электронды платформа бар, қарқынды жұмыс жүргізілуде", – деген болатын. Сондықтан педагогтер қауымы оқушыларға білім беруді қашықтықтан оқыту әдісін жүргізуге осы бастан дайын болуы керек.

Иә, бұл уақытша жағдай. Дегенмен, қол қусырып отыруға болмайды. Сақтық шараларын күшейтіп, жеке бас гигиенасын сақтау ең негізгі міндет. Сондықтан болып жатқан жағдайды күрделендіріп алмау үшін өз-өзімізді сақтандыруымыз қажет.
Бақытжан БАҚБЕРГЕНОВА,
№35 И.Тоқтыбаев атындағы мектеп-лицейінің директоры
19 наурыз 2020 ж. 208 0
  • Акимата Кызылординской области
  • Сайт президента
  • Нұрлы жол
  • Рухани Жаңғыру
  • Жаңғыру 30
  • Egov
  • Digital Kazakhstan
  • Нақты қадам