Әріптес құрметіне құрылған ұжым
Бесарық ауылдық мәдениет үйі жанынан «Сұлу-ай» шығармашылық өнер орталығының «Ұлттық би» үйірмесі жұмыс жасайтындығын көпшілік жақсы біледі. Орталықтың құрамына кіретін үйірменің шәкірттері үлкенді-кішілі байқаулардан топ жарып жүр. Мәдениет ошағында алғаш би үйірмесін ашқан уақытта Гүлсара Байғабылова ауыл жастарын би өнеріне тартқан болатын.Өмірде біз ойлай бермейтін сан түрлі тосын жағдайлар орын алады. Әрқашан әріптестерінің ортасында жарық жұлдыздай жарқырап жүретін Гүлсара Байғабылова 2022 жылы кенеттен дүниеден озған еді. Үнемі ақкөңіл қалпынан таймайтын өнер иесі ауылдық мәдениет үйінде 8 жыл қызмет атқарды. Оның мәдени ұйымдастырушы ретінде қол жеткізген жетістіктері зор. Өткен жылы мәдениеттің шынарының құрметіне арналып, жас бишілерден тұратын «Гүлсара» би тобы құрылды. Орталық құрылтайшысы Анар Қалдыбаева жаңадан топ құрылған сәтте өз пікірін білдіріп, әріптесінің еткен еңбегін жоғары бағалады.
– Ең алғаш Бесарық ауылынан би үйірмесін ашуға ниет еткен кезімізде мінезі жарқын, кәсіби маман Гүлсара әріптесіміз басы-қасынан табылғанын жақсы білеміз. Үнемі жадыраған жүзінен жақсылық нұры есіп тұратын әріптесіміз ауыл балаларының бимен айналысуына жағдай жасады. Әрине, аяулы жаннан қапияда айырылып, қабырғамыз қайысты. Өзі негізін салған би үйірмесінің мүшелерінен құралған шығармашылық топқа Гүлсараның есімін беруді жөн көрдік. Алдағы уақытта «Гүлсара» би тобы ел игілігі үшін қызмет ететін болады. Біз мамандарымызға еркіндік береміз. Шығармашылық әлеуетін бағамдаймыз. Жұмысын саралаймыз. Бесарықтағы үйірмені жүргізіп отырған Шапағат Жарқынбек бар мақтауға лайықты. Әрептестері оның болашағынан зор үміт күтеді, – дейді Анар Қалдыбаева.
Бүгінде жас та болса, талапты, кәсіби шеберлігі мол ұстаз Шапағат Жарқынбек үш топқа дәріс береді. 50-ден аса би өнерінің өрендері кіші, орта, үлкен топқа бөлінген. Жыл көлемінде республикалық, облыстық байқаулардың жүлдегерлеріне сахналық киім демеушілер есебінен тіктіріліп берілді.
– Мемлекеттік бағдарламаның шапағатын көрген бишілеріміздің алар асуы әлі алда. Ауыл балалары өнерге жақын екендіктерін алғаш келген сәттен байқата білді. Күнделікті сан халықтың биін балаларға меңгертіп, ауылдың мақтаныштарын тәрбиелеп шығуға барымды саламын. Біз 27 сәуір күні өткізілетін облыстық «Бозторғай» байқауында бақ сынаймыз. Осы бастан қыздарымыз дайындықты бастап кетті, – деді жас ұстаз.
Өткен жылы «Q-ART FEST» тақырыбындағы VIII республикалық өнер байқауында жеңімпаздар қатарынан көрінген «Гүлсара» би тобының аяқ алысына ата-аналар дән риза.
Балтабай ОРДАБЕКОВ
