Ауыл кеші көңілді
Тыңнан түрен салып, жергілікті халықтың көңілінен шығу оңай емес. Дегенмен, берекесі тасыған ауылдың кеші көңілді болатыны рас. С.Сейфуллин ауылдық клуб үйінің ұйымдастыруымен ауыл тұрғындары арасында «Кaraoke battle» байқауы өткізілді.Байқау ұйымдастырылған мезетте біздің ойымызға кәсіби деңгейі жоғары әншілер келетіні жасырын емес. Бұл жолы сәкендік әуесқой әншілер өзара сайысқа түсті. Жиналған көпшілік ішінен 8 қатысушы іріктеліп шығып, жанды дауыста ән шырқады. Олардың өнеріне аудандық мәдениет үйінің директорының орынбасары Азиз Садықов, Сәкен Сейфуллин округі әкімдігі аппаратының маманы Света Қорғанбекқызы, Қазақстан Журналистер одағының мүшесі Балтабай Ордабеков әділ бағасын берді.
Жұп бойынша ән шырқаған қатысушылардың үздік орындағаны келесі кезеңге жолдама алып отырды. Ауыл өнерпаздары қатарында Динара Абай, Әсем Құлтанбаева, Ырсалды Қобландина, Гүлмира Бисенбаева, Жанель Ақпанбетова, Торғын Әміртемір, Гүлнұр Мұқашова, Бағила Құдайбергенова болды. Бірнеше әнді нақышына келтіріп орындаған Ырсалды Қобландина финалда Бағила Құдайбергеновадан басым түсіп, «Кaraoke battle» байқауының жеңімпазы атанды. Айта кетейік, Ырсалды Қобландинаның негізгі мамандығы балалар дәрігері екен.
Көңілді кеш барысында лоторея ойыны да ұйымдастырылып, белсенді түрде қатысқан ауыл тұрғындарына бағалы сыйлықтар үйлестірілді.
– Біз ауыл тұрғындарының көңіл-күйін көтеру мақсатында ерекше кештер ұйымдастыруға күш салып келеміз. Ауыл әкімінің қолдауымен бүгін «Кaraoke battle» іс-шарасын ашық аспан астында өткізіп отырмыз. Жергілікті халықтың талғам үдесінен шығу мақсатында шығармашылық жұмыстарды дамытамыз. Бұл ретте, кеш барысында демеушілік көрсеткен «Серікбол» сауда үйі мен «Making» фастфуд орталығының ұжымына алғыс айтамыз. Алдағы уақытта да осы тектес іс-шараларды өткізетін боламыз. Біздің басты мақсатымыз – халыққа сапалы мәдени қызмет көрсету және мәдени-көпшілік іс-шараларды жоғары деңгейде ұйымдастыру, оған ауыл халқын қатыстыру, – дейді С.Сейфуллин ауылдық клуб үйінің директоры Дастан Палмахов.
Айта кетейік, көпшілік көңілінен шыққан кеш соңында ауыл өнерпаздары ән шырқап, тұрғындар шат-шадыман көңіл-күйде тарқасты.
«ТТ» ақпарат
