Бүлдіршіндер жетістігі
Жақында ғана Қызылорда қаласында «Атадан – мұра» қоғамдық қорының ұйымдастыруымен «Ұлы дала ұрпағы» республикалық ән байқауының облыстық кезеңі өтті. Оған аудандағы «Қарлығаш бөбек» балабақшасының тәрбиеленушілер қатысып, жүлдемен оралды. Аудан намысын қорғаған кіп-кішкентай бүлдіршіндер вокалды ән айтудан сайысқа түсті.«Қарлығаш бөбек» балабақшасының «Еркетай» тобы «Әжетайым» әнін орындап, жүлделі екінші орынды жеңіп алды. Арнайы кубок пен сертификат және Алматы қаласында өтетін республикалық кезеңге 50 пайыздық жолдама алған балалардың қуанышында шек болмады. Топ құрамында Раяна Жаңабай, Даяна Жаңабай, Айша Абылайқызы, Айзере Әуез, Адия Серікбол, Амина Көшербай өнер көрсетті. Ал жеке орындау бағыты бойынша бақ сынаған кіші топ тәрбиеленушісі Медине Рустамқызы жүлделі үшінші орынды иеленді.
Балғындарды тәрбиешілер Балжан Иманғалиева мен Гүлжауһар Құрманаева бастады. Кішкентай әншілердің қабілетін шыңдап, ән айтуға баулыған ұстаздары – музыка жетекшісі Үміткүл Есназарова.
– Балабақша тәрбиеленушілерінің бәрі өнерлі. Білікті мамандар балалардың уақытын тиімді өткізіп, жан-жақты қабілеттерін дамытуға ықпал етіп келеді. Облыстық байқаудан жүлдемен оралу кішкентай бүлдіршіндерге үлкен жігер сыйлады. Оған қоса, балабақша құрылтайшысы Қуанышкүл Сақтағанова байқауға қатысқан балаларға естелік ойыншықтар сыйлап, қуаныштарын еселеді. Филармония төрінен жүлдемен, сыйлықтармен оралған бүлдіршіндердің қуанышында шек болмады, – дейді балабақша меңгерушісі Эльвира Збаирова.
А.МҰХАНБЕТҚАЛИ
