Қыс ханшайымы
Тереңөзек кенті мәдениет үйінде «Қыс ханшайымы – 2023» арулар байқауы өтті. Аудандық білім бөлімінің ұйытқы болып, кент мәдениет үйінің ұйымдастыруымен жоғары деңгейде өткен көңілді іс-шараға аудан орталығындағы төрт мектептің жоғарғы сыныбынан арулар қатысты.Қыс мезгілінің кереметін көрсетіп, тазалық пен өзінше сұлулыққа толы мезгілді насихаттаған сайыс қыз балаларды шығармашылыққа тәрбиелеуді мақсат етті. Тартысты өткен сайысқа білім бөлімінің және мәдениет саласының мамандары әділ қазылық етіп, төрелік жасады. Сайыс соңында қыздардың дайындығы, сахна мәдениетін сақтауы, өзін-өзі ұстауы секілді негізгі критерийлер ескеріле отырып, әділ шешім шығарылды.
Байқауда төрт ару бақ сынады. «Қыс аруы» сайысы үш кезеңнен тұрды. Бірінші кезеңде қатысушылар өздерін бейнебаян арқылы таныстырды. Қыздар өз қиялдарын жетілдіре отырып, көрініс, би, слайд қосып өздерінің қандай қызығушылықтары бар екенін көрсетті.
Екінші кезең «Қазақ эстрада әншілерін сомдау» деп аталды. Онда қатысушылар эстраданың жарық жұлдыздары Мақпал Жүнісова, Серік Ибрагимов, Қайрат Нұртас секілді әншілерге пародия жасап, өз өнерлерін паш етті.
Үшінші кезеңде сән үлгісіне кезек берілді. Сайыс қатысушылары қыс ханшайымын бейнелейтін киімдерді өз қолдарымен тігіп шыққандарын айтты. Сайыстың жоғары деңгейде өткеніне залдағы көрерменнің ыстық ықыласы куә. Әр мектеп өз аруларына жанкүйерлік етіп, жастардың көңілді кеші одан әрі жалғас тапты. Одан бөлек жанкүйерлер арасында ойындар ұйымдастырылып, оза шапқан көрерменге де сыйлықтар табысталды.
Көп ұзатпай, сайыс қорытындысын қазылар алқасы жариялады. Ол бойынша төртінші орынды №35 И.Тоқтыбаев атындағы мектеп лицейдің намысын қорғаған Әмина Абзалқызы иеленді. Үшінші орынға биязылығымен көзге түскен №131 Т.Қозыбаев атындағы мектеп оқушысы Гүлім Сәкенқызы ие болды. Екінші орын ерекше қойылыммен көрермен көзайымына айналған №210 О.Әбілпаттаев атындағы мектеп оқушысы Нұрай Жақсылыққа бұйырды. Ал «Қыс ханшайымы – 2023» атағын №36 Ә.Тәжібаев атындағы мектеп-лицейден қатысқан Шаһизада Сәбитқызы жеңіп алды.
– Бүгінгі байқау өте жақсы өтті деп бағалай аламыз. Оқушылардың көңілді, позитивті энергиясы бізге демалыс сыйлады. Байқауға аудан орталығындағы төрт мектептің бір-бір аруы қатысып отыр. Ешкім жүлдесіз қалмайды. Бірақ сайыс болған соң көптің ішінен ең үздігін анықтадық. Қазылар алқасының пікірлерін ескере отырып, ортақ ұпай сандарымен шешім шығардық, – деді аудандық білім бөлімінің әдіскері Ғ.Бақтиярова.
Өз кезегінде қазылар алқасы көңілді өткен сайыс туралы өз пікірлері мен сын-ескертпелерін ортаға салды.
А.МҰХАНБЕТҚАЛИ
