Тіршілік тынысы Tirshilik-tynysy.kz ақпараттық агенттігі
» » » «Музейге сый» жасады

«Музейге сый» жасады

Музей – тарихи жәдігерлеріміз бен құндылықтарымыз сақталған киелі қа­ра­­шаңырақ. Бүгінде ауданымызда 1 аудандық тарихи-өлкетану, 1 «Еңбек Даңқы» музейі және ауылдарда да тақырыптық музейлер жұмыс істейді. Жыл сайын халықаралық музейлер күні ауданымызда аталып өтіледі.

Айтулы мереке биыл ауданымызда ерекше ұйым­дас­тырылды. «Музейге сый» жобасы аясында мерекелік іс-шараға мемлекет және қоғам қайраткерлері Ибрагим­ Әбибуллаев, Жарылқасын Шәріпов, Батырбек Маншарипов, Мұхан Әмірғалиев, Мұхтар Көзейбай бастаған ел ағаларымен қатар облыстық мәслихат хатшысы Наурыз­бай Байқадамов, аудандық мәслихат хатшысы Ержан Әжікенов, аудан әкімінің орынбасары Димаш Байдушев, «АМАНАТ» партиясы аудандық филиалының атқарушы хатшысы Еркебұлан Жақып қатысты.

Іс-шараны аудандық музейдің ғылыми қызметкері С.Қуан­дықова жүргізіп, кешегі тарихты бүгінгі күнмен жалғастырып, кемел келешекке, кейінгі ұрпаққа үлгі ете­тін мәдени орталық туралы кең көлемді ақпарат берді. Сондай-ақ музейлер адам баласы үшін демалыс және өзін-өзі жетілдіру орны болып саналатынын атап өтті.

Іс-шарада аудандық мәслихат хатшысы Е.Әжікенов құттықтау сөз сөйлеп, музейлерсіз қоғамның интел­лек­туалдық, мәдени, білім беру деңгейін көтеру мүмкін еместігін айтты.

– Музейлер әр азаматқа өз елінің және әлемдік өр­кениеттің мәдени және рухани мұрасын тануға жол ашып, оны құрметтеуге және түсінуге үндейді. Кез келген елдің қоғамдық-саяси және рухани-мәдени дамуы мен қалыптасуында музей қызметкерлерінің орны ерекше. Есте жоқ ескі замандардан қалған құндылықтарды көздің қарашығындай сақтап, оны кейінгі ұрпаққа таныс­тырып, табыстауда сала мамандарының еңбегі ұшан-теңіз. Дәуірлер тарихы мен мұрасын жинақтап, ғылыми-ағарту, білім мен тәрбие ісіндегі музей қызметкерлерінің қажырлы еңбегі барлық құрметке лайықты деп есеп­теймін. Дана халқымызда «Тарихты тұлғалар жасайды» деген тағылымы мол сөз бар. Осы тұста музейді тарихи жәдігерлерді сақтау орны деп қарастырар болсақ, сол құндылықтарға құрметпен қарайтын тұлғалар тарихымызды түгендеуге елеулі еңбек сіңіретіні белгілі. Тоқсан жылдан астам тарихы бар біздің ауданымыздағы музей ісінің қалыптасуы мен дамуына ақын Сейтмұрат Ембергеновтің, қайраткер-тұлға Алма Бақтиярованың, өлкетанушы Жәнібек Маханбетовтің зор еңбек сіңіргенін атап өтуіміз қажет. Есімі аталған кісілер аудан тарихынан сыр шертетін бірегей орталықтағы жәдігерлерді жинақтауға, кеңінен ақпараттандыруға айрықша үлес қосты. Мұны кейінгі ұрпақ білуі, құрметпен қарауы қажет. Еліміздегі музей саласының барлық мамандарын және сырдариялық әріптестерімізді бүгінгі атаулы мерекемен шын жүректен құттықтаймын! Тарихи-тағылымдық маңызы зор әрі болашақ үшін аса қажетті еңбектеріңізге жеміс тілеймін! Рухымыз биік, тарихымыз түгел, болашағымыз жарқын болсын, – деді Ержан Ертарғынұлы.

Мұнан соң Сыр өңірінің өсіп-өркендеуінде өзіндік ор­ны бар, аймақтағы Шиелі, Жаңақорған және Сырдария ауданын абыроймен басқарып, ел-халықтың ыстық ықы­ласына бөленген И.Әбибуллаев пен қоғам қайраткері Ж.Шәріпов сөз сөйлеп, аймақтың тарихы, кеңестік кезең мен Тәуелсіздік жылдарында атқарылған жұмыстар туралы естеліктер айтты.

– Біздің өміріміз бен еңбек жолымызды халық жақсы біледі. Бірнеше ауданды, басқарманы абы­роймен бас­қарып, өңірдің өсіп-өркендеуіне үлес қостық. Қызмет еткен кезеңдердегі тарихи, кейінгі ұрпаққа қажетті дүниелерді үйде сақ­тағаннан гөрі музейге өткізуді жөн көрдік. Жә­дігерлер музейде тұрса, оны көпшілік көріп, тамашалайтын, біздің еңбегімізді білетін болады. Бұл іске қолдау көрсеткен облыс, аудан әкімдеріне, музей саласының қызметкерлеріне шынайы алғысымды айтамын, – деді Ибрагим Әбибуллаев.

Іс-шарада облыстық мәслихат хатшысы Н.Бай­қадамов ел ағаларының атаулы күнде ау­данға келіп, музей қорына құнды жәдігерлерін өткізуі тағылымы мол іс екенін атап өтті.

– Ибрагим Сражадинұлы Сырдария ауданын басқарған тұста өңір экономикасымен қа­тар рухани-мәдени құндылықтарымыздың түген­делуіне, мәдени мұралардың сақталуына ай­рық­ша еңбек сіңірді. Ауданды басқара жүріп, ру­­ханияттың дамуына ерекше көңіл бөліп, маң­дайын күн сүйген даңғайыр еңбек майталмандары, әдебиет пен өнер марқасқалары жа­құт­тарының сақталуына айрықша мән берді. Сол арқылы ұрпақтар сабақтастығының жал­ға­­суына септігін тигізіп, кейінгі толқын небір қиын сәттерде ел үшін ерен еңбек еткен аудан тұлғаларын танып, білуде. Ардақты азаматтың елге деген жанашырлығына бүгін де куә болып отырмыз. Өйткені, аудан тарихының қат­талуында орны белек құрметті ел ағасы бүгін музей қорына құнды жәдігерлерді өткізіп, та­рихымыздың түгенделуіне сүбелі үлес қосу­да. Мұны біз ел азаматының ауданға деген жа­на­шырлығы, құрметі деп білеміз. Мұндай істің басы-қасынан Ибрагим ағамызбен бірге Жиентай жеңгеміздің, сондай-ақ ел ағаларының да табылуын, арнайы уақыт бөліп бүгінгі іс-шараға қатысуын тарих пен қоғам үшін тағылымы мол іс деп санаймыз, – деді Н.Байқадамов.


Музейге құнды жәдігерлерді, тарихи су­рет­­терді, кітаптарды өткізген И.Әбибул­лаевқа аудандық мәслихат хатшысы Е.Әжіке­нов пен аудан әкімінің орынбасары Д.Бай­душев қазақы дәстүрге сай шапан жапты. ҚР Мәдениет сала­сының үздігі, «Сырдария ауданының Құр­метті азаматы» А.Бақтиярова аудан арда­гер­лері мен сала қызметкерлерінің атынан алғы­сын біл­діріп, ел ағасы атанған қайраткер-тұлғаға тілек­тестігін жеткізді. Іс-шараға қатысу­шылар «Ең­бек Даңқы» музейін аралап, аудан тарихынан сыр шертетін бірегей орталықтың жұмысымен танысты.






Ақтөре ИБРАГИМҰЛЫ







21 мамыр 2022 ж. 243 0
  • Акимата Кызылординской области
  • Сайт президента
  • Нұрлы жол
  • Рухани Жаңғыру
  • Жаңғыру 30
  • Egov
  • Digital Kazakhstan
  • Нақты қадам