Жыр жампозы
Аудандық мәдениет және тілдерді дамыту бөлімінің қолдауымен Ақжарма ауылы әкімдігі мен ауылдық мәдениет үйінің ұйымдастыруымен жазба ақындар мүшәйрасы өтті. Мүшәйра жыр алыбы Жамбыл Жабаевтың 175 жылдық айтулы мерейтойына орай ұйымдастырылды.Аудандық мүшәйраға 35 пен 50 жас аралығындағы ақындар қатысты. Ереже талабы алдын ала бекітіліп, елді мекендердегі мәдениет үйлері мен клубтар арқылы таратылды. Бұл жолғы жыр бәйгесіне кент және ауылдық округтерден барлығы 12 ақын қатысты. Талапкерлердің туындысын бағалау ақын, Қазақстанның Құрметті журналисі Мұхтар Сақтапов, аудандық газеттің бас редакторы Ақтөре Ибрагимұлына жүктелді.
Қазылар алқасы ақындардың өлеңіндегі мағынаға, мән мен ойға, буын саны мен ұйқасына мән берді. Сондай-ақ тақырыпты ашуына, Ж.Жабаевтың өмірі мен шығармашылығын зерттеуіне баса назар аударды. Нәтижесінде, аудандық мәдениет үйінің атынан қатысқан Б.Есназар бас жүлдеге лайықты деп танылды. Ал жүлделі бірінші орын ақжармалық А.Темірхановқа бұйырса, екінші орын Қалжан ахун ауылының ақыны С.Жұмаділге берілді. Үшінші орынды шіркейлілік М.Әбсадықов пен жетікөлдік Қ.Көзейбай еншіледі. Қалған қатысушыларға «Алғыс хат» пен ынталандыру сыйлықтары берілді.
Балтабай ОРДАБЕКОВ
