Руханияттан қол үзбеген жандар

Сырдария аудандық орталық кітапхана қызметкерлері түрлі себептермен үйлерінде отырып қалған мүмкіндігі шектеулі жандармен сұхбаттасып, өздерінің кітап қорындағы әдебиеттері мен СД дискілерін тыңдауға апарып беруді дәстүрге айналдырған.

Жақында кітапханашылар Сәрсен Тәженов, Жалғас Сейітжанов және Айтуған Байдосовтың отбасында болып, сұқбаттасып, байырғы оқырмандармен қауышты. Кітапхананың бұл оқырмандары соңғы жылдары денсаулықтарына байланысты өздерінің келуіне мүмкіндігі болмаған. Дегенмен руханияттан қол үзбеген көкірегі ояу, көңілдері сергек жандарды әрдайым іздеп тұру кітапханашылар өз міндеттеріне алған. Өз кезегінде бұл шараға оқырмандар ризашылықтарын білдірді. Олармен алдағы уақытта «Пейілі кең, жүрегі дархан жандар» атты кездесу кеші өткізіліп, оқыған кітаптары жайлы әңгіме қозғалатынынан хабардар етілді.

Мұндай ізгі шара әсіресе, жастарымыз үшін үлгі болары анық.

Б.ТАҢАТАРҚЫЗЫ