Білген адам білімді өмір бойы іздейді

Баланың бойындағы бар қабілетін шыңдап, одан әріге жетілдіріп оты­ратын ұстаз екені рас. Олардың өзі шәкіртімен бірге үздіксіз ізденумен болады. Бірте-бірте заман ағымына ілесіп, білім көкжиеген дамытуға сүбелі үлес қосады. Бүгінде сан алуан жаңалықтардың екпініне ілесе отырып, білікті жас педагогты дайындау қоғам үшін қажет. Олар ғылым жолында аянбай еңбек етуге, кәсіби тұрғыдан тәжірибе жинақтауға ұмтылуы тиіс. Осы орайда «Жалын» тынығу лагерінде аудандық білім бөлімі және білім қызметкерлері кәсіподағы ұйымының ұйымдастыруымен «Жалындаған жастық – жаңа белес» тақырыбында жас педагогтардың жазғы лагері өтті.

«Білген адам білімді өмір бойы іздейді» дегенді өмірлік ұстанымға айналдырған ауданның 60-қа жуық белсенді жас педагогы өзара тәжірибе алмасты. Олар алғашқы күннен білім саласындағы жаңашылдықты таразылап, оның қыр-сырын меңгерді. №42 Қ.Баймағанбетов атындағы мектеп-лицейдің физика пәнінің мұғалімі Н.Баймырзаев «Шаршама тек шаршама» тақырыбында трениг өткізді. Мұнда педагогтарды үш топқа бөліп, түрлі бағыттағы біліктілігін сынады. №130 Абай атындағы орта мектеп мұғалімі М.Тыныштықбаев «Ұстаз тұлғасы» тақырыбындағы тренингте педагогтың тұлғалық қасиетіне тоқталды. Ұстаз мәртебесі, мұғалімнің оқушыға үлгі болуы жөнінде айтты. Білім саласының сан түрлі мамандығын игерген әрбір мұғалім жаңашылдыққа бетбұрыс жасай отырып, өзін жан-жақты дамыту керектігі қозғалды. Келесі кезекте №135 Асқар Тоқмағанбетов атындағы орта мектеп мұғалімі Н.Омарова «Жалынды жас­тар – бірге» тренинг ұйымдастырды. «Жастар» жылында педагогтардың белсенді жұмысын жетілдіру талқыланды.

«Жастары белсенді елдің – ертеңі жарқын» деп аталатын дебатта жас педагогтар әрбір қазақстандықтың бойындағы патриоттық сезімді ояту үшін жасалатын адами құндылықтарды тілге тиек етті. Әрбір жас ел болашағының тұтқасына айналу қажеттігіне тоқ­талып, оны қалыптастыру ұлы мамандық иелерінің басты міндеті екенін айтты.

Сондай-ақ ұстаздар алдағы уақытта қабылданатын «Мұға­лім мәртебесі» Заңының артықшылық­тарына тоқталды. Оқушыны білім нәрімен сусындатқан мұғалімнің материалдық, әлеуметтік, мораль­дік қажеттілігі жетілгенде білім беру ісі жоғарыламақ. Ұстаз мәртебесін көтеріп, жағдай жасау айрықша серпін берері сөзсіз.

Күні бойы білім саласындағы жаңашыл­дыққа басымдық берген жас педагогтар кешкілік «Red bum», «Drive», «Beeline» тобына бөлініп, концерттік бағдарлама ұсынды. Аудандық білім саласы кәсіподақ ұйымының төрағасы А.Есназар сөз алып, жаңа оқу жылында ауданның белсенді педагогтарына толағай жетістікке жетуге тілектестік білдірді. Сонымен қатар, екі күнге созылатын шараның маңыздылығына тоқталып, мұндай шараның жас ұстаздарға берері мол екендігін жеткізді. Өз кезегінде өнерпаз ұстаздар би билеп, ән айтты.

Белсенді жастардың басын қосқан лагердің екінші күнінде спорттық, эстафеталық жарыстар ұйымдастырылды. Ауданның жас педагогтары «Таза үй, таза аула, таза ауыл» акциясы барысында лагерь ауласына тазалық жұмысын жүргізді. Екі күндік лагерь жұмысының қорытындысында жас педагогтар бірнеше номинация бойынша марапатталды.

Б.ОРДАБЕКОВ