Тіршілік тынысы Сырдария аудандық қоғамдық-саяси газет

PDF нұсқалар мұрағаты

№45 газет

15 маусым 2019 ж.

№44 газет

11 маусым 2019 ж.

№43 газет

07 маусым 2019 ж.

Жаңалықтар мұрағаты

«    Маусым 2019    »
ДсСсСрБсЖмСбЖс
 12
3456789
10111213141516
17181920212223
24252627282930
» » ГАЗЕТ ҰЖЫМЫ ЖАС ОҚЫРМАНЫМЕН КЕЗДЕСТІ

ГАЗЕТ ҰЖЫМЫ ЖАС ОҚЫРМАНЫМЕН КЕЗДЕСТІ

Қай кезде де қоғам өмірінде баспасөздің орны бөлек. Өйткені, елде, жерде болып жатқан жа­ңалық, хабардың барлығы осы бұқаралық ақпарат құралы арқылы тарайды. Ахметше айтсақ «Газет – халықтың көзі, құлағы һәм үні». Бұл саяси құрал, тәрбие көзі, рухани орта. Осы үдеден шығып келе жатқан аудан айнасы болған «Тірші­лік тынысы» газетіне биыл 80 жыл толып отыр. Осы аралықта аудан басылымы өңірдің тыныс-тіршілігін үзбей ақпараттандырып, оқырманға қоғамдық-саяси, рухани-танымдық дүниелерді ұсынып келеді. Айтулы мерейтой аясында редакция ұжымы түрлі деңгейдегі іс-шараларды ұйымдастыруда. Соның бірі аудан оқушыларымен кездесу өткізіп, газет жұмысымен таныстырды.
80 жылдық аясындағы шара алдымен «Еңбек даңқы» музейінен бастау алды. Мұнда музей қызметкерлері ау­дандық газет тарихына қатысты арнайы бұрыш жасап, таныстырып өтті. 1939 жылдың наурызынан бастап халыққа тараған газетті басқарған редакторлар, осында қызмет еткен қарымды қаламгерлер жөнінде айтты. Сондай-ақ, баспасөздің әр уақыттағы жеткен жетістіктерін де тізбектеп берді. Бұл жерге жиналған мектеп оқушылары газет тарихымен қоса, музейде жасақталған аудан тарихымен де танысты. Айта кетейік, басылым тарихына қатысты жасалған арнайы бұрышты аудандық тарихи-өлкетану музейінен көруге болады.
Мұнан соң аудан оқушылары газет редакциясына барып, ондағы жұмыс барысын көрді. Негізі, көпшілік бас­пасөз жұмысын жеңіл деп ойлайды. Алайда мұндағы жұ­мыс өте қауырт. Өйткені, кез келген іс-шараны немесе қоғамдық, танымдық материалды беруде қаламгер үл­­кен жа­уапкершілікпен жұмыс жасайды. Оқырманға ой­лы дүниелерді ұсыну, оны баспа бетіне түсіру, әрбір мақаладағы қателермен жұмыс, газеттің дизайнын жасау жұмыстары ыж­дағат­тылықты талап етеді.
Редакцияда білім ізденушілерге аудан­дық газеттің бас редакторы С.Сұлтанқызы ұжым­мен таныстырып, газет жұмысына тоқ­талды. Бұл жерден көптеген елге белгілі ақын-жазушылар шыққанын айтып, мерейтой аясында оқушыларға осындай мүмкіндік жасалып отырғанын жеткізді. Аудандық басылым ғимаратында мектеп оқушыларына әрбір бөлімнің жұмысы түсіндірілді. Алдымен, материал дайындаудың қыр-сыры айтылса, оны беттеу, яғни дизайнын жасау көрсетілді. Сондай-ақ, қазіргі заман талабына сай газеттің сайт жұмысы күнделікті ақ­паратты жеткізіп отыратыны айтылып, оның да маңыздылығы сөз болды. Өз кезегінде газет таратушылары аптасына екі рет шығатын баспасөздің оқырманға жылдам жету тұр­ғысында атқарып жатқан жұмыстары жөнінде айтып өтті.
Мерекелік шара аудандық орталықтандырылған кітап­ханалар жүйесінің «Коворкинг» орталығында қоры­тынды­ланды. Бұл жерде де аудан кітапханашылары газетке қатысты көрме ұйымдастырған. Оны да таныстырып, аудан айнасы мен кітапхана арасындағы байланысты тілге тиек етті.
«Коворкинг» орталығында бас редактор қазіргі таңда редакцияның материалдық базасы нығайып, қаламгерлерге сапалы жұмыс атқаруға мүмкіндіктер жасалғанын айтты.
– Кезінде барлығын бір дизайнер жасайтын. Мақаланы тереді, оны бетке салады. Ал қазір әрбір журналистің алдында компьютер бар. Әркім өз мақаласын өзі теріп, оның қатесін шығарып, дизайнерге ұсынады. Сонымен бірге, бүгінгі таңда журналистердің біліктілігін арттыруға жағдай жасалуда. Өткен жылы мықты қаламгеріміз Бибісара Жанәлі Мәскеу қаласына іссапармен барып, тәжірибе алмасып келді. Сондай-ақ, журналистер ел аумағында өтіп жатқан халықаралық шараларға қатысып, біліктілігін арттыруда. Жалпы, біз шығармашылықпен айналысып, журналист болуға талпынып жүрген жастарға әркез қолдау білдіреміз, бағыт-бағдар береміз. Сондықтан оларды газетпен тығыз байланыста болуға шақырамыз, – деді С.Сұлтанқызы.
Өз кезегінде газеттің жауапты хатшысы Ш.Нұрсейітов, бөлім меңгерушісі Б.Жанәлі, сайт редакторы Б.Ордабеков сөз сөйлеп, жастардың сұрағына жауап берді. Оның ішінде, оқушыларды апта сайын шығатын газетке ақпаратты қайдан алатыны туралы қызық болды. Оған қазіргі таңда мүмкіндіктің көп екендігі айтылды.
Орталықта аудандық ішкі саясат бөлімінің бас маманы Е.Әбілдаев өзінің лебізін білдіріп, шығармашылық табыс тіледі. Сонымен қатар, ұстаздар да аудандық газеттің көркемдік ерекшелігіне тоқталып, тұрақты оқырман екенін жеткізді. Жалпы, іс-шара барысында оқушылар аудан ба­сылымының жұмысымен толық танысты.

Е.БЕРКІНБАЕВ
04 маусым 2019 ж. 74 0
  • Акимата Кызылординской области
  • Сайт президента
  • Нұрлы жол
  • Рухани Жаңғыру
  • Жаңғыру 30
  • Egov
  • Digital Kazakhstan
  • Нақты қадам