ЖҰЛДЫЗДАР ЖАРҚЫРАҒАН КҮН

Еліміз үшін дарынды ұрпақтың орны қашанда бөлек. Келешегіміздің келбетті, болашағымыздың баянды болуы бүгінгі жастарға тікелей байланысты. Өйткені олар  «Ертеңімізді жасайтын бүгініміз».

Аудандық мәдениет үйінде халықаралық, республикалық пәндік олимпиадаларының, ғылыми жоба, спорт, өнер байқауларының жүлдегерлерін марапаттау рәсімі өтті.

Оқу жылының соңғы күндерінде аудандық білім бөлімі ұйымдастырған «Мәңгілік елдің жастары-Нұрлы болашаққа» атты кешке ауданның абыройын асқақтатып,   болашақта Сыр елінің даңқын асырып, биік жетістіктерге жеткізер мақтаныштары қатысты.

Білім саласы оқу жылын толағай жетістіктермен аяқтады. Соның ең негізгісі аудан 2018-2019 оқу жылында  жалпы білім беретін пәндер бойын­ша Республикалық пән олимпиадасының қорытындысымен  үздік нәтижелері үшін ІІІ дәрежелі «Ең үздік олимпиадалық команда-2019» кубогы мен дипломмен марапатталғанын атап өткен жөн.

Бұл жайында аудандық білім бөлімінің басшысы Баян Суюбаева айтты.

– Биылғы оқу жылының өзінде білім, өнер, спорт байқауларында – 174 оқушының жеңімпаз атануы – аудан үшін зор жетістік деп білемін. Оның ішінде халықаралық – 5, республикалық – 53, облыстық – 116 оқушы мерейімізді асырды.

Осындай жетістіктерге қол жеткізу, құрметті де абыройлы мамандық иелері, яғни ұстаздардың ерен еңбегінің нәтижесі екендігін атап көрсеткім келеді.

Ауданымыз 2018-2019 оқу жылында  жалпы білім беретін пәндер бойынша республикалық пән олимпиадасының қорытындысымен  үздік нәтижелері үшін Сырдария ауданы командасы ІІІ дәрежелі «Ең үздік олимпиадалық команда-2019» кубогы мен дипломмен марапатталды.

Сонымен қатар, балаға жақсы тәрбие мен нәтижелі білім беріп, өмірге бейімделіп қалыптасуына жағдай жасап отырған ата-аналар қауымына шын жүректен алғысымды білдіремін, – деді Баян Орынбекқызы.

Мұнан саң салтанатты кеш марапат­тау рәсі­міне ұласты. Талантты оқушыларға аудан әкімі Ғ.Қазантаевтың Алғысы мен естелік сыйлық тапсырылды.

Марапат төрінен көрінген дарынды оқушылар атынан №36 мектеп-лицейдің 10 сынып оқушысы, республикалық пән олимпиадасының  күміс медаль иегері Еркебұлан Сағатбаев алғыс айтты.

Жүрекжарды лебізін ата-аналар атынан №135 орта мектептің ата-анасы Ортай Үмбетова білдірді.

«Нұрлы болашақ» акциясы аясында талантты жас дарынды қоғамға таныту, жігерлендіру, дәріптеу мақсатында өткен шара жас өнерпаздардың концертіне ұласты.

Б.ЖАНӘЛІ