Елбасының халықты баспанамен қамту бағытындағы тапсырмасын іске асыру мақсатында облыс әкімі Қ.Көшербаев­тың қолдауымен қабылданған «Ор­да» және «Өз үйім» өңірлік тұрғын үй бағдарламасының тиімді тұстарын тү­сіндіру мақсатында аудан әкімдігінің мәжіліс залында жи­ын өткізілді. Аудан әкі­мі аппараты мен «Қазақстанның тұрғын үй құрылыс жинақ банкінің» Қызылор­да филиалы бірле­се ұйымдастырған жиын­ға дербес бөлім басшылары, кент және ауыл­дық округ әкімдері, бюджеттік сала қызметкерлері, құқық қорғау орган­дарының мамандары қатысты.

Жиынды аудан әкімінің орынбасары Е.Ахетов ашып, қазіргі таңда тұрғындарға аталған бағдарламалардың тиімді жақтарын тілге тиек етті.

– Мемлекет басшысы Н.Ә.Назарбаевтың халыққа арнаған Жолдауында тұрғындарды баспанамен қамтамасыз етудің маңыздылығы кеңінен айтылып, тиісті тапсырмалар берілді. Бұл бағытта аймағымызда арнайы «Жол картасы» әзірленіп, көптеген жұмыстар атқарылуда. Мәселен, аймақ басшысының тікелей қолдауымен «Орда» және «Өз үйім» өңірлік тұрғын үй бағдарламасы қабылданды. Аталған бағдарламаның бас­ты мақсаты – тұрғын үй алуға ниетті азаматтардың тиісті жеңілдіктер арқылы баспанаға қол жеткізуін қамтамасыз ету болып табылады. Осыған сәйкес, бүгін «Орда» және «Өз үйім» өңірлік тұрғын үй бағдарламасы туралы түсіндірме жұмыстарын жүргізу бағытындағы арнайы жиналыс ұйымдастырылуда,-деді аудан әкімінің орынбасары.

Жиын барысында «Қазақстанның тұрғын үй құрылыс жинақ банкінің» Қызылорда филиалының бизнесті дамыту бөлімінің бас маманы Жанар Әділ­бекқызы хабарлама жасады.

– Елімізде баспанасы жоқ жас отбасылар көп. Олардың бәрі бірдей бастапқы жарна жинай алған жоқ, алайда ай сайын белгілі бір сома аударып отыр. Сондықтан біз Қызылорда әкімдігімен бірге «Орда» аймақтық бағдарламасын әзірледік. Оған қаты­сушылар 8 жыл бойы жалға берілетін пәтерде тегін тұрады. Алайда осы уақыт ішінде Тұрғын үй құрылыс жи­нақ банкіндегі шотқа үй бағасының 50%-ын жинау керек, осыдан кейін пәтерді жеңілдетілген мөлшерлемемен сатып алады, – деді Ж.Әділбекқызы.

Сонымен қатар, Қызылорда қаласы сол жағалауда салынып жатқан тұрғын үйлерді алу мүмкіндігін туғызатын «Өз үйім» бағдарламасының негізгі алғышарттарына тоқталған Ж.Әділбекқызы бағдарламаға қатысуға шақырды.

Өз кезегінде жиынға қатысушылар «Қазақстанның тұрғын үй құрылыс жинақ банкінің» Қызылорда филиа­лының мамандарына сұрақ қойып, тиісті жауап алды.

Б.ОРДАБЕКОВ