«С.Сейфуллин Жер» ЖШС-інде биылғы егін жинау жұмысы аяқталуға жақын. Әрбір гектардан алынған өнім орташа 50 центнерді құрайды. Шаруашылық ауыл тұрғындарына арнап үстіміздегі жылы 10 адамдық қоғамдық моншаны іске қосты. Қосалқы шаруашылық есебінен бір отар қой бағылуда.

Шаруашылық бойынша егілген 900 гектар Сыр салысының соңғы гектарлары жиналуда. Маңызды науқанда жаткашы Бауыржан Алматов, астық бас­тыратын комбайнды тізгіндеген дала капитаны Ерхан Әбікен, қос тіркемелі ХТЗ тракторының иесі Әлібек Берқатов уақытпен санаспай еңбек етіп, озаттар қатарынан көрініп келеді. Шаруашылықта Дархан есімді қос жігіт озат күріш өсірушілер. Қалыбаев пен Смайлов өзгелерге үлгі болып, шаруашылық бойынша үздік нәтижеге қол жеткізді. Биыл шаруашылықтың техникалық паркі де жаңартылған. 1 «Магдон» жаткасы, 2 «Класс» комбайны, 1 «Джон дир» тракторы егінжайда қарқынды еңбектің қалыптасуына негіз қалады. Сондай-ақ, келесі жылы шаруашылыққа 2 «Джон дир» тракторы, 2 «ХТЗ», 3 «МТЗ» тракторлары және 2 жер тегістейтін лазер алынбақшы.

Елбасы Жолдауында айтыл­ғандай агросекторды дамытуды шаруашылық еңбеккерлері өздерінің басты міндеттеріне санап отыр. Сондықтан биылғы жылы жылдың табысты қорытын­дыланатынына сенім мол.