Сырдариялық спортшы – жүлдегер
Жыл сайын Абай облысында дәстүрлі түрде өтетін «Асыл бесік – Ақсуат» фестивалі бүгінде республикалық деңгейдегі маңызды мәдени-рухани іс-шаралардың біріне айналған. Ұлттық құндылықтарды дәріптеп, қазақы болмысты насихаттайтын тағылымды фестиваль биыл да жоғары деңгейде өтті.Фестиваль аясында Ақсуат ауданында тоғызқұмалақтан дәстүрлі республикалық турнир ұйымдастырылды. Қазақ халқының зияткерлік ойынын дәріптеген жарысқа еліміздің әр өңірінен мықты спортшылар қатысып, өзара бақ сынасты. Тартысқа толы додада Қызылорда облысының олимпиадалық емес спорт түрлерінен балалар-жасөспірімдер спорт мектебінің спортшысы Жантөре Аманқос үздік өнер көрсетіп, жүлделі ІІІ орынды иеленді.
Сырдариялық спортшының бұл жетістігі – тынымсыз еңбектің, табандылықтың және ұлттық спортқа деген құрметтің жемісі. Тоғызқұмалақ сынды терең ой мен сабырды талап ететін ұлттық ойын арқылы Жантөре өз шеберлігін дәлелдеп, Сыр өңірінің абыройын асқақтатты.
– «Асыл бесік – Ақсуат» фестивалі аясында өткен республикалық турнир мен үшін өте әсерлі жарыс болды. Бұл додаға еліміздің әр өңірінен мықты спортшылар қатысты. Әр партия сайын үлкен тәжірибе жинап, өз шеберлігімді шыңдауға мүмкіндік алдым. Жүлделі ІІІ орын иелену – мен үшін үлкен қуаныш әрі зор мотивация. Бұл жетістікке жетуіме ата-анамның, жаттықтырушыларымның және қолдау білдірген жанкүйерлердің еңбегі зор деп білемін. Тоғызқұмалақ – қазақ халқының терең ой мен сабырды талап ететін ұлттық ойыны. Осындай ұлттық спорт түрін дамытуға үлес қосып жүрген ұйымдастырушыларға алғысымды білдіремін. Әсіресе, ұлттық рухты көтеретін фестиваль өткізіп жатқан азаматтардың еңбегі жастарға үлкен серпін береді. Алдағы уақытта бұдан да жоғары нәтижелерге жетіп, Қызылорда облысының намысын республикалық және халықаралық жарыстарда абыроймен қорғауға тырысамын, – дейді спортшы Жантөре Аманқос.
Айта кету керек, ұлттық рухты көтеретін бұл фестиваль қазақстандық кәсіпкер, меценат әрі TAS Group қаржы компаниялар тобының негізін қалаушы Дулат Тастекей және елге жанашыр азамат Қайырлы Хасенов секілді азаматтардың қолдауымен ұйымдастырылып келеді. Мұндай азаматтардың ұлт руханиятына, мәдениет пен спортқа жанашырлық танытуы – кейінгі буынға үлкен үлгі. «Асыл бесік – Ақсуат» фестивалі тек мәдени шара ғана емес, ұлттық дәстүр мен руханиятты жаңғыртатын үлкен алаңға айналып отыр. Осындай игі бастамалар арқылы жастар ұлттық ойындарға қызығып, төл мәдениетіміздің қадірін терең түсіне бастайды.
Жантөре Аманқос – Тереңөзек кентіндегі Иса Тоқтыбаев атындағы №35 мектеп-лицейдің түлегі. Отбасында үш ағайындының екіншісі.
«Тт» ақпарат
