Ардагерлер белсенділігі артуда
Шіркейліде аудандық ардагерлер кеңесінің кезекті алқа мәжілісі өтті. Мәжіліске аудандық ардагерлер кеңесінің төрағасы М.Келдібаев, алқа мүшелері, кент, ауылдық бастауыш ардагерлер ұйымының төрағалары мен Шіркейлі ауылдық округінің әкімі Т.Құламқадіров қатысты.Алқада алдымен аудандық ардагерлер кеңесінің төрағасы М.Келдібаев сөз алып, есеп берді. Биылғы жылдың 3-тоқсанында атқарылған жұмысын саралап, алдағы міндеттерге тоқталды. Алқа мүшелерін бірлесіп жұмыс жасауға шақырды.
СоДан соң Шіркейлі, Шаған ауылдық кеңесінің бастауыш ұйымының рөлін арттырудағы жұмысы туралы және атқарылған жұмысы жайлы Қ.Әбілқасымов пен А.Атақаевтың хабарламасы тыңдалды.
Шіркейлі ауылдық ардагерлер кеңесінің төрағасы Қ.Әбілқасымов өз сөзінде ауылдағы ахуал тұрақты екендігін, ауыл бойынша 243 ардагер есепте тұратынын айтты. Ауылда өтетін іс-шараларға ардагерлер белсенді қатысып, басқа да қоғамдық ұйымдармен бірлесіп жұмыс жүргізілетінін, ардагерлерге жағдай жасау мақсатында тиісті орындарға ұсыныс берілгенін, орындалуы қадағаланып отыратындығын атап көрсетті. Сонымен қатар ауылға жақын уақытта газ келіп, тұрғындар көгілдір отын игілігін көрсе деген ұсынысын жеткізді.
Шаған ауылдық ардагерлер кеңесінің төрағасы А.Атақаев ауылда электр желісі жаңартылып, көшелерге асфальт төселіп жатқанын, ең бастысы – табиғи отын, газ келгенін айтты. Ауылдағы аурухана күрделі жөндеуден өтіп, жұмыстың сапалы атқарылуына ардагерлер белсенді араласқанын атады. Төраға ардагерлерге көрсетілетін әлеуметтік көмек туралы айтып, ардагерлер тарапынан айтылған ұсыныстар талданып, ауыл әкімдігіне жолданып, орындалуы бақыланатындығына тоқталды.
Жарыссөзге Аманкелді ауылдық ардагерлер кеңесінің төрағасы Н.Құдайбергенов, «Сырдария» қоғамдық қорының төрайымы Н.Керейтбаева, Айдарлы ауылдық ардагерлер кеңесінің төрағасы Ә.Бахадүров шығып сөйлеп, есеп берген төрағалардың жұмысын оң бағалады. Шіркейлі ауылының тұрғыны М.Спанов ауданның дамуына, оның көрсеткішіне көңілі толатынын айтты. Аудан делегациясы құрамында Абай облысына Абай Құнанбайұлының 180 жылдық тойына қатысқандағы оң әсерімен бөлісті. Ұсыныс ретінде жекенің малына 2-3 жерден скважина салып берсе деген пікірін білдірді. «Ардагерлерге қажет бір-ақ нәрсе, ол – құрмет, жағдайын сұрап, сәлем беру, қоғамдық іс-шараларға қатыстыру» деді ардагер.
Мәжілісте бастауыш ардагерлер ұйымының төрағалары Қ.Әбілқасымов, Ж.Айсин, М.Асқаровқа Сырдария ауданы ардагерлер кеңесінің төрағасы М.Келдібаевтың Алғыс хаты табысталды.
Б.ТАҢАТАРҚЫЗЫ
