Аудан ардагерлерінің атқарып жат­қан жұмы­сы­нан хабарлама жасаған Мұса Алпысбайұлы «Сырдария ауданы арда­герлер ұйымы» қоғамдық бірлестігі, оның аудандық кеңесі мен баста­уыш ардагерлер ұйымдары өздерінің күнделікті қызметінде рес­пуб­ликалық, облыс­тық ардагерлер кеңестерінің шешім­дерін басшылыққа алатынын айт­ты. Ұйым Жарғысы негізінде жұмыс жүргізетін­діктен аудан әкімдігімен, аудандық мәсли­хатпен, үкіметтік емес ұйымдармен және халықпен етене жақын байланыс орнатып, ауданның әлеу­меттік-эконо­микалық, қоғамдық-сая­­си және рухани-мәдени дамуына атсалысу­да.

– Қазіргі таңда ауданда 4291 ардагер бар. Ардагерлер түрлі деңгейдегі 74 ұйымға біріктірілген, ұйымның 15-і кентте орналасқан. Сондай-ақ, ауыл ардагерлер кеңесі де жұмыс істейді. Мұнан бөлек 18 ұйым оқу орындарында, 8 ұйым денсаулық саласында, 33 ұйым шаруашылықтар мен мекемелерде құрылған. Есебіміздегі ардагерлердің 1-і ҰОС-на қатысушы, 156-ы тылда еңбек еткендер және 33-і ауданның Құрметті азаматтары. Аудан ардагерлері бастауыш ұйымдарының жұмысын жандандырып, белсенділігін арттыру, беделін көтеру мақсатында есеп беріліп отырған кезең ішінде 3 рет ұйым жетекшілерімен тәжірибе алмасу мақсатында дөңгелек үстелдер, семинар-кеңестер өткізілді. Биыл аудандық ардагерлер кеңесі жас­тармен 6 отырыс өткізіп, оған 500-ге жуық жас қатысты. Кездесуде ұлттық құндылық, ел тарихы, қоғамдық сананы жаңғыру мәселелері талқыланды. Жыл сайын мерекелерде ардагерлердің үйіне барамыз. Осы жылы кеңес мүшелері 79 ардагердің үйіне барып, олардың хал-жағдайын біліп қайтты. 2024 жылдың осы кезеңіне дейін аудандық ардагерлер кеңесінің 3 мәжілісі болып өтті, – деді аудандық ардагерлер кеңесінің төрағасы Мұса Келдібаев.

Төраға өз хабарламасында аудан көле­міндегі бастауыш ардагерлер ұйым­дары өз есептерінде тұратын ардагерлерге және жас­тарға жалпы ұлттық идея рухында патриоттық тәрбие беруде еліміз­дегі саяси тұрақтылықты сақтау қарт адамдардың әлеуметтік құқықтары мен мүдделерін қорғауда біршама жұмыс­тар атқарғанын айтты. Осы жылы ауданның дамуына елеулі үлес қосып, қажырлы еңбек еткен ұлағатты ұстаздар, мәдениет, білім, мемлекеттік сала үздік­­теріне «Сырдария ауданының 95 жылдығы» мерекелік төсбелгісі табыс­талды.

Облыс әкімінің қолдауымен ардагер­лердің беделін арттыру, қолдау көрсету, ұлттық өнер мен жергілікті композитор­лардың туындыларын насихаттау мақ­са­тында «Ардагерлер әуендері» атты ардагерлер арасында жеке ән орын­даушылардың облыстық байқауы өт­ті. Айдынды Арал мен қарт Қаратау ара­лығынан келген аймақтың 30 өнерпаз ардагерлері байқау ережесі бойынша Сыр елі композиторларының және халық ән­дері­нен өнерлерін көрсетті. Бұл байқау қорытындысында Сырдария ауданынан қатысқан С.Қалмаханова екінші орын иеленді.

– Қазіргі таңда ауданда ардагерлер ұйы­мы аудан әкімшілігімен, БАҚ-өкіл­дерімен бір­ле­сіп жұмыс жасауда. Бұл жерде аудан басшылығының пәрменді қол­дауы­ның ар­қа­сында ардагерлер жұмы­­сы жақсы жолға қойылғандығын айтып өткім келеді, – деді төраға.

Алқа отырысында Ақжарма, Жетікөл, Іңкәр­­дария ауылдық ардагерлер кеңесі­нің төрағалары хабарлама жасады.

Өз кезегінде Ақжарма ауылдық арда­­герлер кеңесінің төрағасы Құдай­бер­ген Шманов, Жетікөл ауылдық арда­­герлер кеңесінің төрағасы Есенәлі Ералиев, Іңкәрдария ауылдық ардагер­лер кеңесінің төрағасы Әбдіразақ Байманов елге еңбегі сіңген тыл, еңбек ардагер­лерінің үлгі-өнегесін насихаттау, ұлттық құндылықтарды сақтау, жастарға патриоттық тәрбие берудегі атқарған жұмыс­тары туралы баяндады.

Қазіргі таңда ауданда зейнет­кер­лер­ді ардагер ұйымының қатарына тар­­ту жұмыстарын жүргізу жалғасуда. Алда­ғы уақытта баста­уыш ардагерлер ұйымдарының жүйелік құры­лымдарын жетілдіру, жасы келген адамдардың қоғам­дық саяси іс-шараларға қатысуын қамтамасыз ету, оларды баста­уыш ұйым­дарға тіркелуін қадағалап, жаңа­дан құрылған ардагерлер бастауыш ұйым­дарымен жұмыс жүргізу ардагерлер кеңесі­нің мақсат-мідеті болып қала бермек. Жиын соңында белсенді ардагерлер кеңес төрағасының Алғыс хатымен мара­пат­талды.