Жартыжылдықты қорытындылады

Апта ағымында аудандық ардагерлер кеңесінің кезекті алқа мәжілісі өтті. Мәжіліске алқа мүшелері мен бастауыш ардагерлер ұйымдарының жетекшілері қатысты.

Алдымен ардагерлер бүгінгі күн­нің өзекті тақырыбы болған ұрпақ тәрбиесі туралы мәселені талқылады. Жастар арасындағы келеңсіздіктер мен мектеп оқушыларының тәртібінің ақсауы тәрбиенің осалдығынан екен­дігі айтылды. Көп уақытын әлеуметтік желіде өткізетін ата-аналар бала­ларының тәрбиесіне немқұрайлы қарап, оның соңы орны толмас өкінішке әкеліп жатқаны – ұлтымызға төнген қасірет. Сондықтан отбасында ең алдымен үлкендер жақсы әңгіме айтып, ең алдымен өзі үлгі болып, ұрпағын жаманнан жирендіріп, жақсыға ұмтылдырудың маңызы зор деген тұжырымға келді.

Дөңгелек үстел аудандық ардагерлер кеңесінің төрағасы Мұса Келдібаевтың биылғы жылдың бірінші жартыжылдығында атқарылған жұмы­сы туралы есебін тыңдаумен жалғасты.

Қазіргі таңда ауданда 4291 ардагер есепте тұрады. Оның ішінде ерлер – 1454, әйелдер – 2837. Ардагерлер түрлі деңгейдегі 74 ұйымға біріктірілген. Бұлардың 15-і кент, ауылдық ардагерлер кеңесі, 18-і оқу орындарында, 8-і денсаулық сақтау саласында, 33-і шаруашылықтар мен мекемелерде құралған бастауыш ұйымдар. Ардагерлердің біреуі Ұлы Отан соғысының ардагері, 156-сы тыл­да еңбек еткендер, 32-сі ауданның Құрметті азаматтары.

– Аудан ардагерлері бастауыш ұйым­дарының жұмысын жандандырып, белсенділігін арттыру, беделін кө­теру мақсатында есепті кезеңде ұйым жетекшілерімен тәжірибе алмасу мақсатында түрлі семинар, дөңгелек үстел өткізілді. Ауданның әр саладағы белсенді ардагерлерін марапаттау да назардан тыс қалған емес. Ұлағатты ұстаздар, мәдениет, білім, мемлекеттік сала үздіктеріне «Сыр­дария ауданының 95 жылдығы» мере­келік медалі тапсырылды. Мереке күндері ардагерлерге сый-құрмет көрсету ұдайы жүргізіледі. Ардагерлер аудандағы ауқымды іс-шараларға қаты­сады, батасын береді, – деді Мұса Келдібаев.

Алқада Аманкелді ауылдық арда­герлер кеңесінің төрағасы Н.Құдай­бергенов ауыл ардагерлерін мәдени-көпшілік, спорттық іс-шараларға тарту мақ­са­тында атқарылған жұмыстарды хабар­­­­лады. Аманкелділік ардагерлер ау­дан көлемінде, ауылда өтетін спорт­тық іс-шараларға қатысып, белсен­ділік­терін танытуда. Әсіресе еңбек арда­гері Исабай Жүсіпов ардагерлер ара­сын­да бильярдтан, дойбыдан өт­кен сайыс­тан жүлдегер атанған.

Аудан ардагерлерінің басын қосқан алқалы жиында аудандық арда­­­­гер­­лер кеңесінің төрағасы М.Келді­баев­тың есебіне алқа мүше­лері жақсы баға берді. Жиында Ақжарма ауылдық қоғам­­дық кеңес төра­­ғасы Құдайберген Шыманов пен Іңкәр­дария ауылдық арда­­­герлер кеңесі­­нің төрағасы Әбдіразақ Байманов Алғыс хатпен мара­пат­­талды. Соңғы жыл­дары ардагерлер өз ауыл­дарын­да ардагерлермен белсенді жұмыс­ты жан­дан­дырып келеді.

«Тт» ақпарат