Ардагерлер алқалы жиында бас қосты

Жақында аудандық ардагерлер ке­ңесі Іңкәрдария ауылдық округінде көш­пелі алқа мәжілісін өткізді. Оған аудан­дық ардагерлер кеңесінің алқа мүше­лері, бастауыш ұйым төрағалары қаты­сып, ау­дандық ардагерлер кеңесінің төрағасы Мұса Келдібаев биылғы жарты­жылдықта атқарылған жұмыстардың есебін берді.

Бүгінде ауданда 4171 ардагер бар. Олар түрлі деңгейдегі 74 ұйым­ға бірік­тірілген. Оның 15-і кент, ауыл­дық округ ардагерлерінің бастауыш ұйымдары болса, 18-і оқу орындарында, 8-і денсаулық саласында, 33-і шаруашылықтар мен мекемелерде құрылған. Ардагерлердің 1-і Ұлы Отан соғысына қатысушы, 156-сы­ тылда еңбек еткендер, 32-сі – ауданның Құрметті азаматы.

Атқарылған жұмыстарға есеп берген кеңес төрағасы Мұса Келдібаев ауданда ар­дагерлердің қатысуымен көптеген іс-шаралар өткенін, зейнеткерлерді ардагерлер ұйымына тарту үшін жұртшы­лықпен тығыз байланыс орнатылғанын айтты.

– Қазіргі уақытта ардагерлердің ден­­сау­лығын жақсарту, емдеу орындарында демалдыру мақсатында жұ­мыс­тар жүргізілуде. Өткен жылы 300-дей ардагердің демалуына, тарихи-та­нымдық саяхатқа шығуына мүмкіндік жа­салды. Биыл да бұл жұмыс жалғасатын болады. Әжелер мектебі де белсенді жұмыс жасайды. Аудандық ардагерлер кеңесі әйелдер, мүмкіндігі шектеулі жандар, жастар қоғамдық ұйымдарымен бір­лікте жұмыс жасап, қолдап, ортақ іс-ша­раларға ұйытқы болуда. Аудан әкім­дігінің қамқорлығымен барлық үкі­мет­тік емес ұйымының «Достық» үйі деп атала­тын бір шаңырақ астында орналасуы өзара үйлесімді қызметіне оң әсер етіп отыр, – деді Мұса Алпысбайұлы.

Аудандық ардагерлер кеңесінің төр­ағасының айтуынша, алқалы жиынның Іңкәрдария ауылында өтуі кез­дейсоқтық емес. Себебі бұл ауылда ардагерлер кеңесін басқаратын төраға Әб­­діразақ Бай­манов өзінің белсенді жұ­мысымен үлгі. Сондықтан Іңкәрдария ауылындағы тыныс-тіршілікті үлгі ету мақсатында ардагерлер осы ауылда ал­қалы жиында басқосып отыр. Өткен жылы осындай жиын Сәкен Сейфуллин ауылында өткен болатын.

Ауылдық ардагерлер кеңесінің төр­ағасы Әбдіразақ Байманов ауыл тұр­ғын­дарының әлеуметтік ахуалы жайлы айтып, мал шаруашылығымен, бау-­бақша өсірумен айналысатын ауыл тұр­­ғын­­дарына кәсіпкерлікті дамыту үшін қо­лай­лы жағдай жасау туралы ұсынысын біл­дірді. Яғни, үлкен жолдың бойынан сауда орнын ашып, тұрғындардың мез­гілінде қауын-қарбызын сатып, табыс та­буына жағдай жасау қажеттігін айтты. Бұл мәселе өз кезегінде облыстық мәслихат депутаты Жұмабек Емберге­нов пен аудандық мәслихат депутаты Марат Бисеновтың қолдауымен ше­шімін табатынына сенім білдірді. Сонымен қа­тар жайылымдық жерлерді инвес­тор­лардан қайтарып алу мәселесін жан-жақты қарастыру жайында ауыл тұр­­ғындарының өтініштерін жеткізді.

Алқа мәжілісінде Айдарлы, Аманкелді ауылдық ардагерлер кеңесінің төраға­ларының мәдени-көпшілік, спорттық іс-шараларға тарту, саламатты өмір салтын қалыптастыру мақсатында атқарыл­ған жұмыстары жайлы хабарламасы тың­далды.

Алқа мүшелері тарапынан ардагерлер Е.Әлжіков, Ж.Айсин, Ұ.Жанәлиева, Қ.Қашақова, А.Жүгінісов шығып сөйлеп, көптеген түйіткілді мәселелер қозғалды. Соның ішінде Құрметті азамат атағын алу, ауылдағы пайдаланылмай тұрған бос ғимараттарды тиімді пайдалану, ар­дагерлерге демалыс орындарына жолдама беру – өз шешімін күткен мәселелер қатарында.

Бибісара ЖАНӘЛІ