Еркебұлан ЖАҚЫП, Сырдария аудандық білім бөлімінің басшысы: «Жаңа оқу жылына дайынбыз»

Енді бір жетіден кейін жаңа оқу жылы басталады. Жаңа оқу жылында қандай жаңашылдықтар орын алмақ, аудан оқу жылына толықтай да­йын ба? Осы және өзге де сұрақтардың жауабын аудандық білім бөлімінің басшысы Еркебұлан Төлепбергенұлымен талқыладық.

– Еркебұлан Төлепбергенұлы, жақында республикалық Тамыз конференциясына қатысып, Мем­лекет басшысымен кездесіп қайттыңыз. Қалай болды?

– Тамыз конференциясы – дәстүрлі түрде өтетін ауқымды жиын. Онда білім саласының жаңалықтары, оқу жылына дайындық сияқты мәселелер қамтылады. Иә, Астана төрінде рес­публикалық Тамыз конференциясына қатысып қайттық. Биылғы жиын «Білім келешегі: адал азамат, кәсіби маман» тақырыбына арналды. Мемлекет басшысының оң бастамалары мен алға қойған нақты тапсырмасы – саланың өркендеуінің басты негізі болмақ. Осы орайда конференцияда мұғалім мәртебесі, білім сапасын арттыру, мұғалімдердің жаңа толқынын даярлау, тәрбие мәселелері қаралды. «Ұстаздық – жай мамандық емес, бұл – ұлы миссия» деп атап өтті Президентіміз. Өз кезегінде біз Мемлекет басшысының әр бастамасын қолдаймыз. Нақты тапсырма – нақты нәтижеге жеткізеді. Одан кейін облыстық Тамыз конференциясы өтіп, онда маңызды мәселелер талқыланды. Сондай-ақ ауданымыздың бірқатар білім саласы қызметкерлері марапат төрінен көрінді.

– Негізгі сөзге көшсек... Аудан жаңа оқу жылына қаншалықты дайын?

– Ауданымызда 53 білім беру ұйымы жұмыс жасайды. Оның ішінде 17 мектеп, өздеріңізге белгілі, 30 мектепке дейінгі, 6 қосымша білім беру ұйымы бар. Жаңа оқу жылына да­йынбыз. Дайындық жұмыстары әлде де пысықталуда. Білім беру – қоғамдағы ең күрделі сала. Бұнда елдің ертеңінің тағдыры, білімі қаланады. Сондықтан жұмыс жүйелі жүргізілуі қажет.

– Биыл күрделі жөндеуден өтіп жатқан мектептердегі құрылыс жұмыстары аяқталды ма?

– Аймақ басшысының қолдауымен Сәкен Сейфуллин ауылдық округіндегі №137 орта мектепке биыл күрделі жөндеу жүргізу үшін қаржы бөлінді. Бүгінгі күнге мектептің сырты толық минплита және түрлі-түсті сайдингпен қапталды. Спорт зал қабырғалары толық түсіріп, сыланды, терезелері, электр желісі ауыстырылды. Мектеп ішінің қабырғалары толық қырылып, қайта сылау жұмыстары жүргізілді. Еден мен төбесі де жаңартылды. Тоқ, су, жылу жүйесі толық ауыстырылды. Ішкі кәріз жүйесі ішінара алмастырылды. Жарық шамдары жаңаланып, бейнебақылау жүйелері, желдеткіш ал­мастырылды. Аталған мек­тепте «N Строй сервис» ЖШС жөндеу жұмыстарын жүргізуде. Құрылыс жұмыстары 1 қыркүйекке дейін то­лық аяқталады. Бұған дейін әр жылдары кезектілікпен мектептерге күр­делі жөндеу жұмыстары жүргізіліп келеді. Бүгінгі таңда ауданда апатты жағдайдағы білім беру ұйымы жоқ.

Сонымен қатар бірқатар мектептерге ағымдағы жөндеу жұмыстары жүргізілгенін айта кету қажет. Атап айтқанда, №35 мектеп-лицей бойынша кәріз жүйесінің құбырлары алмастырылды, кіре беріс аймақтың кафель­дері ауыстырылды. №36 мектеп-лицей бойынша спорт алаңына жөндеу жұмыстары, аулаға асфальт төсеу, суағарға жөндеу жұмыстары жүр­гізілді. Ал №37 мектеп-лицей бойынша спорт залға күрделі жөн­деу жұмыстары жүргізілді. Және №42 мектеп-лицейдің асханасына, спорт залына жөндеу жұмыстары, ғимарат аумағын абаттандыру жұмыстары жүргізілді. №131 орта мектеп ғимаратының есіктері ауыстырылып, терезелеріне тор орнату, бейне­бақылау камераларын ауыстыру жұмыстары атқарылды. №139 орта мектеп ғимаратының кафельдерін ауыстыру, спорт алаңына жөндеу жұмыстары, мектеп ауласын абаттандыру жұмыстары жүргізілді. №191 орта мектеп спорт залына, бу қазан­­дығының жылу трассаларына ағымдағы жөндеу жұмыстары жасалды. Сонымен қатар үнемделген қаржы есебінен мектепке қажет-жарақтар базасын нығайтуға күш салынуда. Білім беру ұйымдары бойынша жылыту маусымына да дайындық басталып кеткен. Барлығы бақылауда. Ал 2026 жылға болжамды жоспар бойынша №42, №126 орта мектептеріне күрделі жөндеу жұмыстары жүргізілетін болады.

                                                 

– Мектепке дейінгі білім беру ұйымдары туралы айтып өтсеңіз.

– Аудандағы 30 мектепке дейінгі білім беру ұйымында 2125 бала тәр­биеленуде. 2024 жылы қадамдық жос­парға сәйкес Бесарық ауылынан 60 орындық жеке балабақша ашылды. Балабақшаларда 325 педагог қызметкер жұмыс жасайды. Аудан бо­йынша барлық мектепке де­йінгі ұйымдарда 393 бейне­­бақылау камералары және хабардар ету жүйесі орнатылды. Апатты жағдайдағы балабақшалар жоқ. Барлық балабақшада ағымдағы жөндеу жұмыстары жүргізіліп, топтар жасақталып, жаңа оқу жылына сақадай сай.

– Кадр мәселесінде ахуал қалай? Мұғалімдер жеткілікті ме?

– Әрине, білікті мамандар жеткі­лікті. Жалынды жастарымыз да бар­шылық. Білім беру ұйымдарында ар­тық қабылданған педагогтер бар. Ол мәселе бойынша біршама жұмыстар атқарылуда. Қазіргі уақытта зейнетке шыққан педагогтердің орнына конкурс жарияланбай, аз сағатпен жүрген мұғалімдердің сағаты толықтырылуда. Кадрмен қамту және мұғалімдердің біліктілігін арттыру жұмыстары об­лыстық білім басқармасының тікелей бақылауында.

– Жаңа оқу жылында қанша бала мектеп табалдырығын аттайды?

– 2025-2026 оқу жылында 775 бала алғаш рет мектепке барады. Барлық оқушы құжаттары электронды үкімет порталы арқылы қабылданды.

– Мектеп балалар үшін қауіпсіз орта болуы тиіс. Аудандағы білім беру ұйымдарындағы қауіпсіздік мә­селесі көңілді көншітеді ме?

– Сырдария ауданы бойынша қыз­меткер және білім алушылар саны 300 адамға дейінгі 1 мектеп, 300-ден 700-ге дейін 9 мектеп, 700-ден асатын 7 мектеп бар. ҚР Білім және ғылым министрінің 2022 жылғы бұйрығымен бекітілген нұсқаулығына сәйкес 17 мектепке 525 бейнебақылау камерасы орнатылып, 11 мектеп аудандық полиция бөлімінің кезекші бөліміне қосылды. Қызметкер және білім алушылар саны 700-ден асатын 7 мектеп заңсыз заттарды алып кіруге тыйым салатын металл іздегіш және кіріп-шығу турникетімен және лицензияланған күзет қызметімен қамтамасыз етілген. 2023 жылдан бастап білім алушылар мен қызметкер саны 300-ден асатын 16 мектепке дабыл беру құралы орнатылды. Биыл 7 балабақшаға дабыл түймесі, өнер мектебіне турникет орнатылды. Қауіпсіздікті қамтамасыз ету бойынша әлі де атқарылуы тиіс жұмыстар бар. Бұл бойынша тиісті жұмыс жүргізілуде.

– Мектептерде оқулық пен оқу құралдары жеткілікті ме?

– Сырдария ауданы бойынша білім бөліміне қарасты мектептерге оқулықтар сатып алуға қаржы бөлінген болатын. Оқулық жеткілікті. Тиісті келісімшарт негізінде жұмыстар жүргізілді. Қазіргі таңда мектеп оқу­шыларына кітап толық таратылды.

– Мектепке дайындық барысын пысықтауда «Мектепке жол» акциясының маңызы зор. Акция аясында ауқымды жұмыстар жүргізілгені аян...

– «Мектепке жол» республикалық қайырымдылық акциясын ұйымдас­тыру бойынша аудан әкімдігімен іс-шара жоспары бекітіліп, ведо­моствалық бағынылыстылығына қара­мастан бар­­лық мекемелерге хат жолданды. Акция барысында көмек алатын балалардың базасы жасақталды. «Мектепке жол» акциясы аясында 600 балаға көмек көрсету жоспарланды. Дәл қазір 278 балаға көмек көрсетіліп, мектеп құрал-жабдықтарымен қам­тылды. Мекемелер мен кәсіпкерлер, ұйымдар өз үлесін қосуда. Бұл акция әлі де жалғасады. Осы орайда меценаттар мен қайырымды жандарды үлес қосуға шақырамын. Сонымен қатар 2152 балаға жалпыға міндетті оқу қоры есебінен бір реттік қаржылай көмек берілді.

– Адал адам, ашықтық саясаты білім ордаларында қаншалықты деңгейде ұйымдастырылуда?

– Өткен оқу жылының аяғында Қазақстан Республикасының Оқу-ағарту министрлігінің «Адал азамат» біртұтас тәрбие бағдарламасы меншік нысанына қарамастан бар­лық білім беру ұйымдарының бас­шылары мен орынбасарларына өске­лең ұрпақтың бо­йында адалдық, әділет­тілік, патриотизм және аза­маттық жауапкершілік сияқты құн­дылықтарды қалыптастыруға ба­ғыт­талғандығы, мақсаты қоғамға пайдалы, жауапкершілікті сезінетін, рухани бай, елін сүйетін адал азаматты қалыптастыру екендігі түсіндірілді. 2025-2026 оқу жылында барлық білім беру ұйымдарында оқушыларды адам­гершілікке, адалдыққа тәрбиелеу, құқықтық сауаттылықты арттыру, сыбайлас жемқорлыққа қарсы мәдениетті қалыптастыру, оқушылар арасында белсенді азаматтық ұстанымды дамыту, ұлттық құндылықтар мен рухани-адамгершілік тәрбиені насихаттау жұмыс­тары жүзеге асырылады. Және адалдық сабақтарын тұрақты түрде өткізіп, әділет, сенім, парасаттылық туралы түсініктерін кеңейтіп, мектеп пен ата-ана арасындағы ынты­мақтастықты нығайтып, «Саналы ұрпақ», «Адал ұрпақ» жобаларымен сабақ­тастық байланыста іске асатын болады.

Білім беру ұйымдары ашықтық саясатын ұстанады. Барлық жұмыс арнайы портал арқылы жүреді. Одан бөлек өткізілген іс-шаралар мен атқа­рылған жұмыстар мерзімді басылымдарда, сайт парақшаларында жарияланып отырады.

– Дәл қазір сіздің салада күрделі, қарбалас кезең екені белгілі. Соған қарамастан, арнайы уақыт бөліп, сұхбат бер­геніңізге рақмет. Жаңа оқу жылына сәттілік тілейміз! Жақсы жаңалықтарыңыз көп болсын!

– Әркез ақпараттық қолдау көр­сетіп отырған ауданның төл басылымына ризашылығымды білдіремін!

Сұхбаттасқан

Аружан МҰХАНБЕТҚАЛИ