Халық қалаулысы – ел ішінде
Кеше ҚР Парламенті Мәжілісінің депутаты, «AMANAT» партиясы фракциясының мүшесі Мұрат Ергешбаев Сырдария ауданына жұмыс сапарымен келді. Мәжіліс депутатын аудан әкімі Берік Сәрменбаев пен аудандық мәслихат төрағасы Ержан Әжікенов күтіп алып, ең алдымен ауданның әлеуметтік-экономикалық, қоғамдық-саяси дамуы туралы ақпарат берді.Топ құрамында «AMANAT» партиясы Қызылорда облыстық филиалының төрағасы Алмасбек Есмаханов, облыстық мәслихат депутаты Жұмабек Ембергенов, «AMANAT» партиясы Сырдария аудандық филиалының Атқарушы хатшысы Ақтөре Ибрагимұлы, аудандық мәслихат депутаттары Алмас Есназар мен Марат Бакуов болды.
Ең алдымен, халық қалаулысы С.Сейфуллин ауылындағы №137 орта мектебіне жүргізіліп жатқан күрделі жөндеу жұмыстарымен танысты. Мәжіліс депутаты С.Сейфуллин ауылындағы №137 орта мектебін күрделі жөндеу сапалы әрі уақытылы жүргізілуі керек екенін айтып, мердігер мекеме өкілдерімен пікірлесті. «Н-Строй сервис» серіктестігінің өкілдері күрделі жөндеу жұмыстары сәуір айының ортасында басталғанын айтып, қазан айында толық аяқтау жоспарланғанын жеткізді. Қазіргі таңда жұмыстың 80 пайызы аяқталған, ішкі әрлеу және сырлау жұмыстары жүргізілуде. ҚР Парламенті Мәжілісінің депутаты, «AMANAT» партиясы фракциясының мүшесі Мұрат Ергешбаев С.Сейфуллин ауылындағы №137 орта мектебін жөндеу жұмысы халықтың талап-тілегінен туындаған жұмыс екенін айтып, сапасына мән беру керектігін ескертті. Жалпы күрделі жөндеу барысына облыстық бюджеттен 309,1 млн теңге бөлінген.
Бұдан кейін халық қалаулысы Сәкен Сейфуллин ауылының тұрғындарымен, ардагерлермен, жастармен кездесті. Кездесу барысында Мәжіліс депутаты сегізінші шақырылымның үшінші сессиясында атқарылған жұмыстар туралы айтты.
– Біз «AMANAT» партиясы фракциясының жиынында Мәжілістегі сегізінші шақырылымының үшінші сессиясында атқарылған жұмысты қорытындыладық. Қабылданған заңдардың саны мен шешілген мәселелердің ауқымы жағынан алып қарайтын болсақ, бұл саяси тұрғыда мазмұнды кезең болды. Қабылданған бастамалар негізгі салаларды қамтыды: экономика, денсаулық сақтау, білім беру, әлеуметтік қорғау, цифрлық инфрақұрылым және азаматтардың құқықтары. Біз сайлаушылардың ұсыныс-пікірін алдағы уақытта да ескеріп, нақты жұмыстар атқаратын боламыз. Енді, міне Сыр еліне депутаттық қызмет сапарымен келдік. Өңірді аралап, өндірістік жобалармен танысып, экономикалық-әлеуметтік саладағы қалыптасқан жағдайды өз көзімізбен көріп, сайлаушылармен кездесеміз. Біз ең алдымен халыққа берген сайлауалды уәдемізді орындауымыз керек. Жол картасына түскен әрбір іс-шараның уақытылы, сапалы жүзеге асуы қатаң бақылауда, – деді Мұрат Ергешбаев.
Ауыл ардагерлері мен тұрғындар пікір білдіріп, атқарылған жұмыстарды оң бағалап, Мәжіліс депутатының жұмысына сәттілік тіледі. Сондай-ақ ауыл ардагерлерінің ұсынысымен қазақы үрдіске сәйкес М.Ергешбаев кішкентай сәбидің тұсауын кесіп, батасын берді.
Сапар аясында Мәжіліс депутаты аудандағы «Паллиативтік көмек» және «Медициналық оңалту» бөлімшесінде болып, дәрігерлермен және ем қабылдаушылармен пікірлесті.
Мәжіліс депутаты тұрғындарға сапалы медициналық қызмет көрсету үшін «Паллиативті көмек» және «Медициналық оңалту» бөлімшесінің жұмысын жүйелі ұйымдастыру қажеттігін айтты.
– Әрине, көп мәселе қаржы және уақытты талап етеді. Келген азаматқа мұны түсіндіріп, заңнамалық тұрғыда кеңес беру керек. Әрбір нысаналы топқа бағытталған партиялық жобаларымыздың өз мақсатына сай жүзеге асуын қамтамасыз етуіміз қажет. Жасалған жұмыстар халыққа кеңінен насихатталуы керек. Біз келіп отырған бүгінгі нысан да біздің халыққа берген уәделеріміздің нақты іске асуының нәтижесі, – деді Мұрат Ергешбаев.
Айта кету керек, «Паллиативті көмек» және «Медициналық оңалту» көрсету бөлімшесі 60 төсек-орынға арналған. Бөлімше тиісті мамандармен, қажетті медициналық құрал-жабдықтармен, дәрілік заттармен және медициналық бұйымдармен толық қамтамасыз етілген. Бейіндендірілген төсек-орындары мен қызметкерлер «Ресурстарды басқару жүйесі» ақпараттық жүйесіне енгізілген. Бөлімше ашылғаннан бергі соңғы 6 айда 340 науқас ем қабылдаған.
Айта кетейік, Мұрат Ергешбаев «Руханият орталығында» болып, бірегей орталықтың жұмысымен танысты. Сондай-ақ аудан ардагерлерімен, қоғамдық кеңес мүшелерімен, жастармен кездесті.
Кездесуде елімізде қабылданып жатқан заңдар мен олардың орындалуы туралы айтылды. Мәжіліс депутаты қоғамдағы өзекті мәселелер, оның ішінде лудомания, алаяқтық, кибербуллинг секілді қылмыстардың себеп-салдары жөнінде пікір алмасты.
– Президентіміз Қасым-Жомарт Кемелұлы халыққа арнаған Жолдауында: «Біздің қоғамымызда заң мен тәртіп үстемдік құруға тиіс. Бұл – бүкіл қоғамның, әр адамның қауіпсіздігін қамтамасыз етуге қатысты ең басты талап. Біз сонда ғана Әділетті, Таза, Қауіпсіз Қазақстанды құра аламыз» деп нақты міндеттерді белгілеген болатын. Түрлі гаджет мен смартфондағы бағдарламалардың көмегімен жасалатын алаяқтық, кибершабуылдар схемасы сәт сайын өзгеріп, қадамдары жаңарып барады. Халықтың қаржылық қауіпсіздігі үшін қаржылық пирамидалар, құмар ойындарға тәуелділік, интернет-алаяқтық, дропперлік қылмыстардың алдын алуда уақытылы, тиісті шешімдер қабылдаудың маңыздылығы артты. Бір қарағанда жеке адамның мәселесі секілді көрінуі мүмкін. Бұл – тұтас қоғамға, әрбір отбасыға, ұрпағымыздың болашағына әсер ететін қауіп-қатер, – деді Мұрат Ергешбаев.
Аудандық қоғамдық кеңес мүшелері қоғамдағы ортақ мәселелер мен құндылықтар туралы ой қозғап, қабылданып жатқан заңдардың маңыздылығына тоқталды. Сонымен қатар атқарылған жұмыстарды оң бағалап, Мәжіліс депутатының жұмысына сәттілік тіледі.
«Тт» ақпарат
