Еліміздің ертеңі, мемлекетіміздің кемел болашағы білімді де білгір жастардың қолында. Жастар – бұл кез келген заманауи мемлекеттің стратегия­лық әлеуеті. Сондықтан бүгін­де елімізде жастар саясатына үлкен мән берілуде. Статистикалық дерек­тер бойынша мемлекетіміздегі адам санының 4,5 миллионнан аста­мы жастардың үлесінде. Бұл дегені­міз – жалпы халықтың 30 пайызы жас­тар деген сөз.

Жақында аудандық жас­тар ре­сурс­­тық орталығының ұйымдас­ты­руы­мен әр салада жемісті еңбек етіп жүр­ген, түрлі саланың қыр-сырын меңгер­ген белсенді жастарға «Жыл үздігі-2024» номинациясын тапсыру салтанатты кеші өтті.

Салтанатты іс-шараға аудан әкімі Берік Сәрменбаев, облыстық мәсли­хат депутаты Жұмабек Ембергенов, аудандық ардагерлер кеңесінің төра­ғасы Мұса Келдібаев, кент және ауыл­дық округтердегі жас­тармен жұ­мыс істейтін мамандар, белсенді жас­­тар, еріктілер, сала мамандары қатысты.

Мерекелік жиында сөз алған аудан әкімі жастарды жылды табыс­ты қорытындылауымен құттықтап, ау­дан­да атқарылған жұмыстарға, жетіс­­тіктерге тоқталды.

– Аймақ басшысы Нұрлыбек Машбекұлының қолдауымен жас отбасы­ларға жаңа өмірге қадам басар «Отбасы орталығы», жас бас­тамашыл балақайларға арналған зама­науи «Оқушылар сарайы» бой көтерді. Жас спортшыларымызға арнал­ған «Теннис» орталығы, «Жайлы мектептер» пайдалануға берілсе, жаңа стадион, «Инновациялық-шығар­машылық орталық», музы­калық колледж ғимараты құрылысы басталды. Барлық ауданда музей, кітапхана, архив, неке қию залы, арда­герлер және аналар, жастар орталықтары, азаматтық қоғам өкіл­дері мен тарихи-мәдени, рухани ұйымдарды біріктіретін типтік үлгі­дегі «Руханият орталықтары» бой көтеруде. Бұл жұмыстар жастардың игілігі үшін жасалуда. Аудан жастарына арналып Тереңөзек кентінің көрікті жерлерінің бірі – кіреберістен «Жастар» аллеясы жасалды. Бұл жастарға деген құрметіміз деп біліңіздер. Жаңа бастамаларыңызға сәттілік тілеймін! Алдағы уақытта да аудан дамуына аянбай еңбек ететіндеріңізге сенемін, – деді аудан әкімі құттықтау сөзінде.

Іс-шара барысында әр сала бойын­ша жыл үздіктері анықталып, аудан әкімінің құттықтау хаты жә­не естелік сый­кәде табысталып, құрмет көрсетілді.

Үздіктердің қатарында Аманкелді ауылдық округінің жастар маманы Бексұлтан Серікбаев жыл қорытын­дысымен «Үздік маман» атанса, аудандық газеттің тілшісі Алтынай Қайратқызы «Жыл үздігі» номинациясын иеленді. Әріптесіміз жас та болса журналистика саласына, ауданның әлеуметтік-эконо­микалық дамуына, жас­тар саясатын ақпараттандыруға үлес қосып келеді. Журналистің же­тістігіне редакция ұжымы шынайы тілектестігін білдіреді.

Мерекелік жиын қызықты ойын­дармен, аудан өнерпаздарының кон­церттік бағдарламасымен жастар кешіне ұласты.