Велосипед – құнды және кез келген жерге қойып кете салуға ыңғайлы мүлік. Сондық­тан велосипедті қа­раусыз қалдыру жағ­дай­лары жиі кездеседі. Бұл немқұрайлылықты ұрылар жиі қолданады. Полиция органдарының мәліметін­ше, велосипедтер қайта сату мақса­тында немесе бұзақылық ниетпен ұрланады екен. Велосипед иесі үшін оның жоғалуы жағымсыз оқиға екенін ескерсек, «Велосипед ұрлығының құрбаны болмау үшін не істеу керек?» деген сауал туындайды.

– Кепілдендірілген жалғыз әдіс – велосипедті қараусыз қалдырмау. Велоси­педті бір минутқа қалдырсаңыз да, оны арнайы құлыппен бекіту керек. Егер бар болса, велосипедті қауіпсіздік камераларының жанына қалдырған дұрыс. Полиция қызметкерлері қарапайым қауіп­сіздік ережелерін сақтау керектігін ескер­теді. Өз мүлкіңізді сақтау үшін барлық қажетті шараларды қолдану ұсынылады, – дейді аудандық полиция бөлімінің жедел уәкілі Дулат Алиев.

Жауапты қызметкерлердің сөзінше, азаматтар өз велосипедін қысқа уақытқа қараусыз қалдырып, соңынан ұрлатып алады екен. Велосипедтердің қандай орындарда ұрланатындарына сараптама жасалған кезде көпшілігі еркін түрде ұрлан­ған. Кейбірі үй подъездерінен ұрлан­са, көшеден, үй ауласынан үптел­гендері де бар. Велосипед ұрлап, оңай олжадан дәнденгендер кілттеулі құлпынан да бұзып, жымысқы ойларын жүзеге асыруы мүмкін. Үлкен қалалар мен аудандарда сарай мен гараж секілді орындарға жасырын кіріп, ғимараттардың терезесін сындырып, кілттерді үйлестіріп ашып, тонап кететіндер де бар. Осынау деректерді қарай отырып, аудан аумағында велосипедтердің ұрлануы – азаматтардың өз бұйымдарына салдыр-салақ қарауынан деген түйін жасауға болады.

Осы ретте былтыр әріптесіміздің велосипеді аяқасты қолды болып, меке­менің алдынан ұрланғанын айта кеткеніміз орынды. Біз дереу аудандық полиция бөлі­­міне хабарласып, құқық қорғаушылар жедел іздестіру шараларын қолға алды. Нәти­жесінде велосипед тез табылып, жасөспірім жеткіншектің балалықпен, біл­местікпен алғаны белгілі болды. Ата-анасы шырылдап, бала кешірім сұрап, әріп­тесіміз де ағаттық кеткенін түсініп, соңы кешіріммен, татуласумен аяқталған болатын. Бұл бір оқиға, ал біздің білмейтініміз қан­­шама. Барлық іс кешіріммен, татуласумен аяқталмайтыны да анық. Заң үстемдік құр­ған елімізде әр нәрсенің жауапкершілігі, сұрауы бар.