Басылымның 85 жылдығын атап өту ба­ғы­­тындағы іс-шаралар аясындағы бас­­қосу аудандық мекемелер үйінің мәжі­ліс залында өткізілді. Дөңгелек үстел фор­матындағы жиынға Қазақстан Жазу­шылар одағының Қызылорда облыс­тық филиалының төрағасы, халық­аралық «Алаш» әдеби сыйлығының иегері Қаршыға Есімсейітова, «Сыр медиа» серік­­тестігі бас директорының орын­басары Айжан Абдуллаева және респуб­ликалық «Әлімсақ» журналының, «Ұстаз мәртебесі» газетінің бас редакторы, фило­ло­гия ғылымдарының кандидаты Нұрлан Көбегенұлы арнайы қатысты. Сондай-ақ аудандық газет редакциясының шығар­машылық топ мүшелері мен аудан­дық газетте жарияланып келе жатқан мақалалардың тұрақты авторлары да басқосуға шақырылды.

Жиынды аудандық газеттің бас редакторы Ақтөре Ибрагимұлы ашып, жүргізді. Өңір журналистикасында өзіндік орны бар мей­мандарды таныстырған ол жергілікті басылымның тарихы, жетістіктері жөнінде айтып өтті. Мұнан соң Қ.Есімсейітова газеттің өзі бір күндік болғанымен, сөзі мың күндік екенін айтып, басылымның беделін арттыруда журналистердің білік­тілігі жоғары болу керектігіне назар аударды. Өзінің тәжірибесімен бөлісіп, қиын да күрделі салада еңбек етіп жүрген әріптестеріне сәттілік тіледі. Өз кезегінде Н.Көбегенұлы журналист құқықтары туралы лекция оқыды.

– Журналист қырағы, жан-жақты болуымен қатар, өте сауатты болуы қажет. Заңды білген, оны іс жүзінде дұрыс қол­данған, құқығы мен міндетін ажырата ал­ған журналистке сұраныс жоғары болады. Осы ретте демократияның да­муы­­на аса қажетті шарт саналатын сөз бостандығы еркін пікірдегі журналистердің жұмыс істеуіне мол мүмкіндік береді. Дегенмен бұл «еркіндіктің жөні осы екен» деп, адам құқығына қол сұғу емес, керісінше, құқығы бұзылған азаматтарға заң аясында жәрдем беру. Себебі ҚР «Бұқаралық ақпарат құралдары» туралы заңының «Сөз, ақпаратты алу және тарату бостандығы» деп аталатын 2-бабында: «Сөз, шығармашылық бостандығына, өз көзқарастары мен сенімдерін баспа арқылы және өзге де нысанда білдіруге, ақпараттарды заңда тыйым салынбаған кез келген әдіспен алуға және таратуға Қазақстан Республикасының Конституциясында кепілдік беріледі. Цензураға тыйым салынады» делінгенімен, ақпарат алып, таратуда адам құқығы, оның ар-намысы, қадір-қасиеті, іскерлік беделі барын, кемсітуге жол бермеу керектігін ұмытпауымыз керек. Журналист сыни немесе проблемалық мақала жазғанда, әсіресе жемқорлық, қылмыстық оқиғалар жөнінде қалам тербегенде эмоцияға берілуге болмайды. Сондай-ақ әлі шешім мен үкім қабылданбаған істерді ақпарат­тандырмаған дұрыс, – деген Нұрлан Көбегенұлы өз тәжірибесімен бөлісті.

Басқосуда А.Абдуллаева сарап­тама­лық мақалалар жазудың, сұхбат алудың, арнайы беттер әзірлеудің ерекшелігі мен әралуандылығы жөнінде айтты. Сондай-ақ аудандық газетте ауданның дамуы­на айрықша үлес қосқан қайраткер-тұлғалардың, еңбек адамдарының өнегелі өмір жолы жөнінде жақсы мақалалар жарияланып жатқанын оң бағалады. Мұнан бөлек тұрақты авторлармен байланыс орнатудың тиімділігін сөз етті.

Жиын барысында Ж.Маханбет, М.Омаров сөз сөйлеп, сұрақтарын қой­ды. Аудандық газет редак­циясының журналистері де ойларын ортаға салды. Тиімділігі мол тәжірибе алмасу соңында аудандық газеттің бас редакторы А.Ибрагимұлы меймандарға ризашы­лығын білдірді.