Ұрпақтар сабақтастығы қашанда жаңғырып, заман көшіне ілеседі. Келешегін әріден ойлаған адам игі іс жасауды жанына серік қылады. Оның ішінде өзі білім алған мектебіне үнемі атбасын бұрып, жақсылықтармен бөлісу мұғалімі берген ұшан-теңіз тәрбиенің қайтарымы іспетті. «Оқығаныңды айтпа, тоқығаныңды айт» дегендей ұстаздардың шапағатын көрген шәкірттері ұлағатты жандар алдында бас иетіндіктерін дәлелдеп келеді. Жақында №36 Ә.Тәжібаев атындағы мектеп-лицейінің 1998 жылдың түлектері мектеп бітіргендеріне 20 жыл толуына орай білім ордасына барып, ағаш отырғызу акциясын ұйымдастырды. Шараға түлектермен қатар ұстаздар мен оқушылар қатысып, игілікті істі жасауға белсенділік танытты. Өз кезегінде түлектер жылдар бойына буындарын қатайтып, үлкен өмірге бейімдеген ұстаздарына алғысын айтты. Мектеп ауласына елу түп терек ағашын отырғызды. Келешек білім ордасының жасыл желекті аулаға айналуына септігін тигізу арқылы өскелең ұрпаққа өнегелі іс тындырды. Бүгінде сан түрлі салада еңбек етіп жүрген түлектердің бұл игілікті ісіне ризалық білдірген ұстаздар қауымы «Атадан мал қалғанша, тал қалсын» дейтін тәмсілдің маңыздылығына да тоқталды.
«Алтын балтаның да сабы ағаш» демекші көреген ұстаздардың тәлімін алған азаматтар абырой биігінен көрінуді қалайды. Ендеше, талай мықтыларды қанат қақтырған білім ордасынан ертеңгі күні нағыз таланттар мен білімді жандар түлеп ұшады. Міне, әр буынмен бірге өсіп, жетілетін терек ағаштары келешек шежірелі тарихқа куәгер атанбақ.