Бес жыл көлеміндегі белес

Осыдан бес жыл бұрын Сырдария ауданы­ның құрылғанына 90 жыл толды. Сол кезде аудандық «Тіршілік тынысы» газетінің мерекелік саны жарыққа шығып, онда тарихтан бір үзік сыр шертіліпті. Одан бері, міне, бес жыл қас-қағым сәтте өте шықты. Бүгінгі мерекелік санымызда ауданның соңғы бесжылдық ішінде жеткен жетістіктерін саралап, негізгілеріне тоқталып өтуді жөн санадық.

2019 жыл

– Аудан халқын түрлі нан өнімдерімен қамтамасыз етіп отырған «Айша» кондитерлік өнімдер, асханалар желісі өз жұмысын бастады. Бүгінде аудан орта­лығында орналасқан көпшілік тамақтану орны сырттан келген қонақ­тар үшін де жайлы асханаға айналып үлгерді.

– Дәл осы жылы аудан орталығындағы іргелі білім ордасының бірі №35 Иса Тоқтыбаев атындағы мектеп-лицей ғасырлық мерейтойын тойлады.

– 2019 жылы аудан айнасына айналған «Тіршілік тынысы» газеті өзінің 80 жылдық мерейтойын жыл көлемінде атап өтіп, айшықты мақалалар жариялап, тағылымды іс-шаралар ұйымдастырылды.

– «Майжарма» каналының пойыз жолға жақын тұсынан ұзындығы 12 метр, ені 4 метр болатын кезекті көпір салынды.

– 2019 жылдың басты жаңалығы – Тереңөзек кентіне табиғи газ келіп, тұрғындар үйлеріне газды кіргізе бастаған. Бұл туралы аудандық газет сүйінші хабар таратып, газдандыру жүйесі мен басты қауіпсіздік талаптары туралы ұдайы ақпараттандырып отырған.

– Руслан Рүстемов Сырдария ауданының әкімі болып тағайындалған.

– Ақжарма ауылдық округінде мешіт пайдаланылуға берілген.

– 2019 жыл сырдариялықтар үшін ғана емес, Қазақстан халқы үшін жаңа Президенттің сайлауымен есте қалды. Мемлекет тізгіні ресми түрде Қасым-Жомарт Кемелұлы Тоқаевқа табысталып, бұл туралы ақпараттық материалдар мен қоғам белсенділерінің пікірлері жарияланды.

– Осы жылы асар әдісімен кент орталығындағы 24 сағат қызмет көрсе­тетін дәріхана орналасқан негізгі көше бойына жаяу жүргіншілер жолы салынды.

2020 жыл

– 2020 жылы ҚР Ұлттық банкі құны 200 теңгелік монетаны айналымға шығарды. Бұл туралы аудандық газетте жазылып, тұрғындар ақпараттандырылыпты.

– С.Сейфуллин ауылындағы №137 орта мектебі 90 жылдық мерейтойын атап өтіпті. Бұл туралы аудандық газетте тарихи тағылымды мақала жарияланған.

– Аудан орталығына ерекше көрік беріп тұрған «Алтын сағат» та дәл осы жылы орналастырылды.

– Қасиетті Рамазан айында «Хикмет» қайырымдылық қоры тереңөзектік көпбалалы ана Р.Балмахановаға 7 бөлмелі баспана кілтін табыс еткен.

– А.Тоқмағамбетовтің 115 жылдық мерейтойына тарту ретінде ауыл кіреберісіндегі автокөлік жолы жөндеуден өтті.

– А.Иманов және Н.Ергешбаев көшелерінің қиылысында бой көтерген қос тұрғын үйдің алғашқы кірпіші қаланды.

– Талғат Дүйсебаев Сырдария ауданының әкімі болып тағайындалған.

– Шаған ауылында 350 орындық мұсылмандар мешіті ашылған.

2021 жыл

– 2021 жылы Сырдария ауданының халқы ҚР Парламенті Мәжілісі мен барлық деңгейдегі мәслихат депутаттарының сайлауына біркісідей атсалысып, ауызбіршілікпен қатысқан.

– 2021 жылы аудан бойынша 17 білім ошағында 8232 оқушы білім алған. Оның 387-сі сол жылы мектеп бітірген.

– Осы жылы ауданға Мұрат Ергешбаев аудан әкімі болып тағайындалған.

– Дәл осы жылы аудан орталығындағы қос қабатты «Серікбол» сауда үйі халыққа өз қызметін көрсете бастады. Бүгінде аудандағы ең ірі сауда үйі саналатын дүкеннің тұтынушылары баршылық.

– Ауданда Н.Ілиясов, А.Тоқмағамбетов, Іңкәрдария ауылдық округтері бойынша ауыл әкімдерін сайлау өтті.

– Н.Ілиясов ауылында «Күріш мұражайы» ашылды.

– Аудан тұрғындары ел Тәуелсіздігінің 30 жылдық мерейтойы қарсаң­ында 10 отбасыға тұрғын үй кілті табысталды.

– Жетікөлде бой көтерген жаңа мешіт қолданысқа берілді.

– Аманкелді ауылының тумасы Құралай Мейрамбек «Қазақстан дауысы» мегажобасының жеңімпазы атанды.

2022 жыл

– Ғасыр жасаған майдангер Яхия Тасыров 100 жасқа толды. Аймақ басшысы ауданға арнайы ат басын бұрып, ардагерге автокөлік сыйлады.

– Аудан орталығынан әлеуметтік дәріхана ашылып, тұрғындар игілігі үшін қызмет көрсете бастады.

– Қалжан ахун ауылындағы Қиясовтар әулетінде үшем дүниеге келген.

– Н.Ілиясов ауылында «Farmana» дәріханасы ашылған.

– Аудан орталығындағы А.Иманов көшесі бойындағы көпқабатты тұрғын үйлер жөндеуден өтті.

– Ауданда 31,4 шақырым автомомбиль жолы жөндеуден өткен.

– «Балалар жылына» орай демеушілер есебінен аудан орталығы мен ауылдық округтерде ойын алаңдары салынып, халық игілігіне берілді.

–Жол-көлік оқиғасының алдын алу мақсатында кентке кіреберістегі төртжолға бағдаршам орнатылды.

– Сырдария ауданы агроөнеркәсіп кешенін дамытуда ең жоғарғы көрсеткішке қол жеткізіп, «Үздік аудан» атанды.

– Республика күні халықпен қайта қауышып, аудан тұрғындары 13 жылдан кейін ел-халықпен қауышқан ұлттық мерекеге үн қосты.

– Сыр жұртшылығы Президент сайлауына үлкен жауапкершілікпен қатысты.

2023 жыл

– Кент және ауылдық округтердегі электр бағаналарын жаңарту жұмыстары қолға алынды.

– Тұрғындар өтінішіне сай А.Әлиакбаров көшесі бойындағы көпқабатты үйлердің ауласы толықтай жаңартылды.

– Республика көлемінде «Үлгілі ауыл» атанған Н.Ілиясов ауылында «Еңбек аллеясы» салынды.

– Аудан халқы кезектен тыс Мәжіліс және мәслихат депутаттарының сайлауына бірауыздан қатысып, аудандық мәслихат депутаттарын сайлады.

– Мемлекет басшысы Қасым Жомарт Кемелұлы Тоқаев Сыр еліне сапар жасап, Н.Ілиясов ауылына ат басын тіреді. Сондай-ақ іргелі аймақтың даму деңгейін жоғары бағалады.

– Ауданда тұңғыш рет аудан әкімдерінің сайлауы өтіп, аудан тұрғындары ауызбіршіліктің үлгісін көрсетті.

Жыл аяғына дейін де жақсы жаңалықтар болып, оның бәрі аудан тарихында алтын әріппен жазылатын болады.

Дайындаған
Аружан Мұханбетқали