Түркістанға сапар
Егемен еліміздің жарқын болашағына сеніммен қарап, жақсы күндерді жақындатқан аға ұрпақ ардагерлеріміздің бай тәжірибесі, дархан даналығы – біз үшін тамаша тағылым. Кейінгі ұрпақтың бойында ізгілік пен мейірбандылық, Отанымызға адал қызмет ету секілді елжанды қасиеттер болса, ол әрбіріміздің үйіміздегі қазыналарымыздың арқасы. Осы ретте ауданымызда ардагерлерге құрмет көрсету мақсатында жақсы іс-шара ұйымдастырылды.Бұл жолғы іс-шараның ұйымдастырылуына Салтанат Қуандықова басқаратын аудандық тарихи-өлкетану музейі бастамашы болды. Музей ұжымы Айдарлы мен Жетікөл ауылының 20-ға жуық ардагерлерінің қасиетті Түркістан қаласына саяхаттауын жоспарлап, бұл ұсынысты жүзеге асыру үшін аудандық мәслихат депутаты Анар Қалдыбаеваға айтқан. Ұсынысты құп алған депутат мереке қарсаңында ардагерлерге қуаныш сыйлап, қолдау білдірген.
«Жақсыдан – шарапат» деп бекер айтылмаса керек-ті. Жақсы іске жанашырлық танытып, қолдау білдірген аудандық мәслихат депутаты бұл істі перзенттік парызы санайтынын айтады.
– Аудандық тарихи-өлкетану музейінің ұжымы ерекше бастама көтергенде қуана қабылдадым. Талай жыл еңселі еңбек етіп, ауыл өмірімен біте қайнасқан ардагерлерге құрметіміз ерекше. Елдің дамуына зор үлес қосқан қазыналы қарияларымыздың мәртебесін көтеруді өзімізге міндет санаймыз. Үлкенге бас иіп, айрықша ілтипат көрсетуге мүдделіміз. Барлық ардагерді биыл атап өтіп жатқан мерейтойымен шын жүректен құттықтаймын, – деді Анар Қалдыбаева қарттардың қасиетті шаһарға сапарына орай ұйымдастырылған басқосуда.
Сапар барысында қос ауылдың 70, 80 жасқа толған қазыналы қарттары Түркістан қаласының көрікті жерлерін аралап көрді. «Керуен сарай» кешенін аралаған қариялар ерекше көріністерге куә болды. Сонымен қатар ардагерлер Қожа Ахмет Яссауи және Арыстан баб кесенесіне барып, бабалар рухына тәу етті. Біз ардагерлердің де пікірін білдік.
– Сапарымыз «Мединеде – Мұхаммед, Түркістанда – «Қожа Ахмет» деп халық арасында тарап кеткен аңызда айтылатын Мұхаммед (с.а.у.) пайғамбарымыздың ізбасары саналатын Қожа Ахмет Яссауи мавзолейімен танысумен басталды. Деректі аңыздарға сүйенсек, сағананы Әмір-Темір түсіне кірген аян бойынша Қожа Ахмет Яссауиге арнап салдырған. Сағананы аралап танысқан ардагерлерді оның салыну тарихы қатты қызықтырды. Бұл жерде қазақ хандары, басқа да әулие адамдардың сүйектері жерленген. Мұнда біз тазалықтың, айшықты жасыл желекпен, гүлдермен көмкерілген орындардың, мәдениеттіліктің куәсі болдық, – дейді Жетікөл ауылының ардагері П.Аяшев.
Бұл пікірді айдарлылық ардагерлер де қуаттап, ұйымдастырушыларға ризашылығын білдіріп, ақ батасын берді.
– Түркістанға жасаған сапарымыздан ерекше әсер алдық. Білуімізше, кесенені шәкірті Қожа Ахмет Яссауидің тапсыруымен Әмір-Темір салдырған екен. Арыстан баб Исламға дейін 39 дінді біліп, соның ішінде ислам дінін мойындаған Мұхаммедтің (с.а.у.) ізбасары болған екен. Меккеде Мұхаммед (с.а.у.) пайғамбар халықты жинап, өзі қайтқаннан кейін төрт жүз жылдан соң түркі елінде ізбасарының дүниеге келетіндігін, соған аманат ретінде құрманың сүйегін беруді Арыстан бабқа тапсырады. Алланың әмірімен Арыстан баб бес жүз жыл жасап, осы уақыт бойына құрманың сүйегін тілінің астына сақтап, соңында болашақ Мұхаммед (с.а.у.) пайғамбардың ізбасары бала Қожа Ахмет Яссауиге аманатты тапсырып, оның «…саған түнесін, менен тілесін, аумин» деген батасын алыпты. Міне, содан бері зияратқа келген халықтың Арыстан бабқа түнеп, Ахмет Яссауиден тілеуі содан қалған дәстүр екен. Осы дәстүрді ұстанған қос ауылдың ардагерлері қасиетті орынға зиярат жасадық. Кесене жанындағы 4000-ға жуық кітап қоры сақталған кітапхананы да көрдік. Онда ежелгі көркем әдебиеттер, ескі құрандар және құнды қолжазбалар сақталыпты, – дейді айдарлылық ардагер Б.Сұлтанбекова.
А.ИБРАГИМҰЛЫ
